ნებისმიერ ჩვენთაგანს ახსოვს თუჯის ჭურჭელზე მომზადებული საკვების გემო - წვნიანი კატლეტი, ჩაშუშული ბოსტნეული, ხორცი, შემწვარი კარტოფილი. ბოლო წლებში თუჯი უთმობს პოზიციებს ტეფლონისა და კერამიკის ჭურჭელს, თუმცა აღსანიშნავია, რომ მზარეულთა უმრავლესობა მაინც იყენებს თუჯის ჭურჭელს, რომლის პლუსებზე ჩვენ ამ სტატიაში მოგიყვებით.

• ეკოლოგიურობა. თუჯის ჭურჭლის დამზადებისას არ გამოიყენება ისეთი ქიმიური ნივთიერებები, რომლის გახურებისას გამოიყოფა მავნე ტოქსინები.
• ხანგრლივობა. სწორი მოვლის პირობებში თუჯის ჭურჭელს გამოიყენებთ არაერთი ათწლეულის განმავლობაში.
• თბოგამტარობა. სხვა ლითონებთან შედარებით თუჯი ნელა ცხელდება, მაგრამ ამავე დროს კარგად ინარჩუნებს სითბოს და უზრუნველყოფს ზედაპირზე ტემპერატურის თანაბარ განაწილებას. ამის ხარჯზე კერძიც თანაბრად მზადდება, არ იწვის, არ რჩება უმი და იხსნება გემოს სრული სპექტრი.
• უნივერსალობა. თუჯის გამძლეობა საშუალებას გაძლევთ მოამზადოთ კერძები ნებისმიერ ზედაპირზე.

აღნიშნული გამძლეობის მიუხედავად, თუჯი საკმაოდ მყიფე მასალაა და მოითხოვს სწორ მოვლას. ასევე მას ახასიათებს დიდი წონა. საშუალო ზომის ტაფის წონა 2 კგ-ს აღწევს. ამან არ უნდა შეგაშინოთ. ჩვენი რეკომენდაციების გათვალისწინებით თქვენ გაგიმარტივდებათ თუჯის ჭურჭლის შერჩევა და გამოყენება საკმაოდ ხანგრძლივი პერიოდის განმავლობაში.

განსაზღვრეთ თუჯის ჭურჭლის დანიშნულება. ცნობილია, რომ ამა თუ იმ კერძის მომზადებისთვის მნიშვნელოვანია სწორი ზედაპირის მქონე ჭურჭლის შერჩევა: ბლინი საჭიროებს ტაფას თხელი ძირით, შუშვა - ღრმა ტაფას ან ქვაბს გუმბათისებრი ფორმის თავსახურით, ხორცის შეწვისთვის საჭიროა ტაფა დაღარული ძირით, ღუმელში გამოყენებისთვის აუცილებელია ჭურჭელი მონოლითური ან მოხსნადი სახელურებით. ყაზანის შემთხვევაში მნიშვნელობა ენიჭება ძირის ფორმას. იგი უნდა იყოს მომრგვალო და მას უნდა მოყვებოდეს სპეციალური ქვესადგამი წონასწორობის უზრუნველყოფისთვის.

დარწმუნდით, რომ ჭურჭელს არ აქვს წუნი. ზემოთ მოგახსენეთ, რომ თუჯი მყიფე მასალაა. თუჯის ჭურჭლის შეძენისას კარგად დაათვალიერეთ იგი და დარწმუნდით, რომ მას არ აქვს ბზარი ან სხვა დეფექტები. ამგვარი დაზიანება შეიძლება მომავალში იყოს ჭურჭლის გამოუსადეგრობის მიზეზი.

შეარჩიეთ თავსახური. როგორც წესი, თუჯი ჭურჭელი იყიდება იგივე მასალისგან დამზადებულ თავსახურთან ერთად. ეს არის დიდი პლუსი, რადგან მძიმე თავსახური მჭიდროდ ჯდება და კეტავს ორთქლს, წვენებს და კერძის სურნელს.

როგორ მოვამზადოთ ჭურჭელი გამოყენებისთვის. შეძენის შემდეგ ჭურჭელი უნდა მოემზადოს გამოყენებისთვის, ანუ თქვენ უნდა გამოწვათ იგი და შექმნათ ბუნებრივი მიმწვრობის საწინააღმდეგო საფარი. ალბათ მოგეჩვენებათ, რომ ეს არის ხანგრძლივი და შრომატევადი პროცესი, მაგრამ ამ პროცედურას თქვენ ჩაატარებთ ერთჯერადად და წარმატებულად გამოიყენებთ ჭურჭელს მომავალში.

ჭურჭლის მომზადება მოიცავს რამდენიმე ეტაპს:

• დადგით ჭურჭელი ძლიერ ალზე. რამდენიმე წუთში შეამჩნევთ, რომ ზეთი, რომლითაც თუჯს ამუშავებდნენ საწარმოში, დაიწყებს წვას და გამოჩნდება კვამლი. დაახლოებით ნახევარ საათში კვამლი გაქრება და ლითონი მიიღებს ნაცრისფერ შეფერილობას. დროდადრო მოაბრუნეთ ჭურჭელი - ამით თქვენ მიაღწევთ ჭურჭლის ყველა კედლის საგულდაგულო გათბობას.
• ჩააქრეთ ალი. თუჯი ოდნავ უნდა გაცივდეს. მოაშორეთ ხენჯი, დაზეთეთ ქაღალდის ხელსახოცი და კარგად გაპოხეთ თუჯის ზედაპირი. გამოცვალეთ ხელსახოცები მანამ, სანამ ჭვარტლი ბოლომდე არ მოშორდება, და კარგად გააშრეთ ზედაპირი. ისევ დაასხით ზეთი და კარგად გაათანაბრეთ ფუნჯით. ასევე დაამუშავეთ ჭურჭლის პირი და გარე ზედაპირი სულ მცირე ზეთით.
• დადგით ჭურჭელი საშუალო ალზე. დაელოდეთ, სანამ კვამლი გაქრება, დააყენეთ ალი მინიმალურ ნიშნულზე და ათანაბრეთ ზეთი ფუნჯით იმისთვის, რომ ზეთიანი აფსკა მოეფინოს სწორი ფენით. გააგრძელეთ თუჯის გამოწვა დაახლოებით 20 წუთის განმავლობაში. ზეთის ფენა არ უნდა დარჩეს წებვადი. აიღეთ ჭურჭელი ალიდან და ისევ გაპოხეთ ზეთით. ამის შემდგომ შეგიძლიათ დაიწყოთ ჭურჭლის გამოყენება.

თუჯის სწორი მოვლა

თუჯის ჭურჭელი მოითხოვს სათუთ მოვლას. პირველ რიგში უნდა იცოდეთ, რომ მასში არ შეიძლება მზა საკვების დატოვება. გამოყენების შემდეგ იგი უნდა გაირეცხოს მაქსუმუმ ორ საათში. წინააღმდეგ შემთხვევაში თუჯი ჟანგდება, თუმცა ჟანგის მოშორება არ წარმოადგენს სერიოზულ პრობლემას. საკმარისია მოაცილოთ ჟანგი და თავიდან გამოწვათ და გაპოხოთ ჭურჭელი. მიმწვრობის საწინააღმდეგო საფარის შესანარჩუნებლად გამოიყენეთ ხის ან პლასტმასის კოვზი, რომელიც არ კაწრავს ზედაპირს.

თუჯისთვის ასევე გამანადგურებელია ტემპერატურათა ცვალებადობა, ამიტომ ცივ წყალში გახურებული ჭურჭელი არ გარეცხოთ. თუჯი ირეცხება ცხელი წყლით და რბილი ღრუბლით. არ გამოიყენოთ ჭურჭლის სარეცხი მანქანა. თუ საჭმელი ზედაპირსაა მიკრული, ნუ ხეხავთ მას, უბრალოდ ჩაასხით ჭურჭელში ცხელი წყალი და დაელოდეთ ნარჩენების დალბებას. გარეცხვის შემდეგ გააშრეთ ჭურჭელი ქაღალდის ხელსახოცით, დადგით ალზე რამდენიმე წუთით, დაზეთეთ და დატოვეთ შემდეგ გამოყენებამდე.

ჩვენს საიტზე თუჯის ჭურჭლის საკმაოდ დიდი არჩევანია, შეგიძლიათ შეარჩიოთ თქვენთვის ოპტიმალური ვარიანტი.

„დომინო“ გისურვებთ წარმატებებს!