რემონტი ყოველთვის არცთუ მცირე ფინანსებთანაა დაკავშირებული. თანაც, ამ პროცესს გაუთვალისწინებელი ხარჯებიც მუდმივად ახლავს, ამიტომ ბუნებრივია, რომ სავარაუდო ბიუჯეტის განსაზღვრისას ყოველთვის ოპტიმალური ვარიანტის შერჩევას ცდილობთ. თუმცა, არსებობს მასალები და სამუშაოები, რომლებზე თანხის დაზოგვამაც შესაძლოა, საპირისპირო შედეგი მოგცეთ და საბოლოო დანახარჯი კიდევ უფრო გაგიზარდოთ.

ამ ბლოგპოსტით სწორედ იმ რეკომენდაციებს გაგაცნობთ, რომლებიც დაგეხმარებათ, წინასწარ განსაზღვროთ, რაში ღირს დანაზოგის გაკეთება და რაში — არა.

სანიტარული კვანძები და გაყვანილობა

მარტივად რომ ვთქვათ, ის, რაც არ ჩანს, განსაკუთრებულ ყურადღებას იმსახურებს. წყლისა და გათბობის მილების, მათი გამართვისთვის საჭირო დეტალებისა და მასალების შერჩევა ყოველთვის ხარისხზე ორიენტირებული უნდა იყოს. გაითვალისწინეთ, რომ სანტექნიკა სარემონტო სამუშაოების ერთ-ერთი ყველაზე საპასუხისმგებლო ეტაპია: უხარისხო გაყვანილობა შესაძლოა, მარტივად დაზიანდეს ან მწყობრიდან გამოვიდეს, რამაც დისკომფორტი და სირთულეები არა მარტო თქვენ, არამედ მთლიანად სამეზობლოს შეუქმნას. შესაბამისად, თანხის დაზოგვის გამო, ხარისხთან კომპრომისი ამ შემთხვევაში ნამდვილად არ გიღირთ.

ჰიდროიზოლაცია

სანტექნიკის შემდეგ ყურადღების გამახვილებას ჰიდროიზოლაციაზე გირჩევდით, მით უმეტეს, რომ ამ მნიშვნელოვან ეტაპზე ხშირად უარს სწორედ დანახარჯების შემცირების მიზნით ამბობენ. უფრო მეტიც, ზოგჯერ ხელოსნებიც ირწმუნებიან, რომ მასში თანხის გადახდა არ ღირს. სინამდვილეში ეს მასალა არც ისე ძვირი ჯდება, სამაგიეროდ კი, წყლის გაჟონვისგან თქვენც გიცავთ და მეზობლებსაც.

და თუ რემონტისთვის განსაკუთრებით მცირე ბიუჯეტი გაქვთ, გირჩევთ, ჰიდროიზოლაცია ფილების დაგებამდე მხოლოდ სანტექნიკის წერტილებთან გამოიყენოთ და არა მთლიან იატაკსა და კედლებზე.

თბოიზოლაცია

თუ გადაწყვეტილების მიღება თბოიზოლაციის გამოყენებაზე მოგიწევთ, აუცილებლად გაითვალისწინეთ, რამდენად ენერგოეფექტური მასალითაა კედლები აგებული, როგორია ოთახების განლაგება, მზის განაწილება და ა.შ. კერძო სახლის მშენებლობის ან რემონტის შემთხვევაში კი, თბოიზოლაცია აუცილებლობას ნამდვილად წარმოადგენს. თუმცა, თანამედროვე რეკომენდაციით, მასზე დაზოგვა არც ბინის რემონტისას ღირს: ის არა მარტო სტაბილურ ტემპერატურას შეგინარჩუნებთ, არამედ მასალების გამძლეობის შენარჩუნებაში, ხმის იზოლაციასა და კომუნალური გადასახადების შემცირებაშიც დაგეხმარებათ.

ელექტრობა

ელექტროგაყვანილობის გადაკეთება ურთულესი პროცესია, ამიტომ დაქსელვისთვის საჭირო ფინანსები თავიდანვე სრულად გაითვალისწინეთ. შეეცადეთ, სანტექნიკის მსგავსად, ელექტრობის ბიუჯეტიც არ დაინანოთ, როზეტებისა და ჩამრთველების რაოდენობა კი თქვენი საჭიროებებით განსაზღვროთ და მათი რიცხვი თანხის გამო არ შეამციროთ.

კიდევ ერთი მნიშვნელოვანი ფაქტორი განათებაა: შესაძლოა, ენერგოეფექტური, ხარისხიანი სანათები უფრო ძვირი ღირს, თუმცა პერსპექტივაში ისინი ელექტრონერგიის ხარჯებს გიმცირებთ, ამიტომ დაფიქრდით: თანხის ერთჯერად დაზოგვას ყოველთვიურად ნაკლები გადასახადები ხომ არ სჯობს?

ფილები

რემონტის დროს ერთ-ერთი მნიშვნელოვანი მასალა ფილაა, განსაკუთრებით აბაზანასა და აივანზე, რადგან ამ სივრცეებში ტემპერატურის ცვლილება, სინესტე, წყალი და ა.შ. ყველაზე ხშირია. სწორედ ამიტომ, მათი შერჩევისას მთავარი კრიტერიუმი მაინც ხარისხი უნდა იყოს და არა — ფასი. გაითვალისწინეთ, რომ დღეს ბაზარზე ფილების მრავალფეროვანი ასორტიმენტი არსებობს, ამიტომ ოპტიმალურ ვერსიას აუცილებლად მიაგნებთ. თუმცა, თუ ბიუჯეტის შეკვეცა მაინც გჭირდებათ, უმჯობესია, თანხა ზომის ხარჯზე დაზოგოთ და დიდი ფილები შეიძინოთ. ამ შემთხვევაში საჭირო მასალის რაოდენობაც შეგიმცირდებათ და ხელოსნის ანაზღაურებაც, რადგან მათი დაგება მცირე ზომის ფილებზე ნაკლები ღირს.

იატაკი

თუ იატაკი თქვენთვის მნიშვნელოვანი პრიორიტეტია, რა თქმა უნდა, მაღალი ხარისხის მასალას შეარჩევთ და ნამდვილად სწორ გადაწყვეტილებას მიიღებთ, რადგან თანხის განსაკუთრებული დაზოგვა არც ამ შემთხვევაში გიღირთ.

ცხადია, პარკეტს უკვე ბევრი წლის გამოცდილება აქვს, თუმცა შეგიძლიათ, უფრო ნაკლები ბიუჯეტით საკმაოდ ხარისხიანი ლამინატი ან კერამოგრანიტის ფილაც შეარჩიოთ და აქცენტი იატაკის გამძლეობაზე გააკეთოთ.

მასალების ზედმეტობით შეძენა

ზოგჯერ მასალები, მით უმეტეს ძვირადღირებული, არც თუ ისე მცირე თანხა ღირს, თუმცა ყოველთვის სჯობს, ეკონომიაზე უარი თქვათ და ყველაფერი ზედმეტობით შეიძინოთ. ადვილი შესაძლებელია, ხელოსანმა სწორად ვერ დაითვალოს და სამუშაოების მიმდინარეობისას აღმოაჩინოთ, რომ მაგალითად, ფილა ან სამღებრო ქაღალდი დაგაკლდათ. გარდა იმისა, რომ ეს თქვენგან დამატებით დროს მოითხოვს, შესაძლოა, იმავე პროდუქტს საერთოდ ვეღარ მიაკვლიოთ და კიდევ უფრო რთულ მდგომარეობაში აღმოჩნდეთ.

ამასთან, არავინაა დაზღვეული, რომ გარკვეული პერიოდის მერე რამე არ დაუზიანდება, ამიტომ  მასალის ზედმეტობით შეძენა და სათადარიგოდ შენახვა სინამდვილეში წინდახედულობაა და არა უყაირათობა.

პროექტი და სამუშაოების ზედამხედველი

თუ თქვენი ბიუჯეტი შესაძლებლობას გაძლევთ, ალბათ, არქიტექტორ-დიზაინერისა და სამუშაოების ზედამხედველის მომსახურებებით სარგებლობაც არ იქნებოდა ურიგო. ცხადია, შეგიძლიათ, ბინის დიზაინი თავად შექმნათ და სამუშაოების მიმდინარეობაც აკონტროლოთ, თუმცა თუ ძალიან დაკავებული ხართ და დროც ნაკლებად გაქვთ, მაშინ უმჯობესია, თანხა ამ მომსახურებებისთვისაც გამოყოთ.

და ბოლოს, დარჩენილი საკითხები საკუთარი ინდივიდუალური საჭიროებებითა და ცხოვრების სტილით უნდა განსაზღვროთ. მაგალითად, თუ ალერგიული ხართ, მასალების შერჩევისას უპირველესად სწორედ ეს ფაქტორი უნდა გაითვალისწინოთ, ან თუ მცირეწლოვანი ბავშვები გყავთ, მარტივად გასაწმენდი საღებავი შეარჩიოთ. ნებისმიერ შემთხვევაში, „დომინოში“ დაგეხმარებით, სახლი თავიდან ბოლომდე ისე გაარემონტოთ, რომ თანხა ოპტიმალურად დაზოგოთ.