ინტერიერის დიზაინში ტიხრის სხვადასხვა სახით გამოყენება დიდი ხნის წინ დაიწყო, თუმცა ცხოვრების სტილისა და ტრენდებიდან გამომდინარე, ის მუდმივად იცვლებოდა, ადამიანების ახლებური მოთხოვნებისა და საჭიროებების შესაბამისი ხდებოდა.

ამჟამადაც დეკორატიული ტიხრის გამოყენება თანამედროვე დიზაინისა და ყოველდღიურობის თავისებურებებს პასუხობს, თანაც, სტუდიოს ტიპის ბინების გავრცელების პირობებში მისი პოპულარობა განსაკუთრებით გაზრდილია. რადგან ტიხარი სახლის დაგეგმარებისა და რემონტის ერთ-ერთი ყველაზე ტრენდული გადაწყვეტილებაა, ახალ ბლოგპოსტში სწორედ  მისი ფუნქციებისა და გამოყენების შესახებ გიამბობთ.

როდის გამოვიყენო დეკორატიული ტიხარი

დეკორატიული ტიხრის გამოყენება შეგიძლიათ ყოველთვის, როცა მოგინდებათ, თუმცა არის გარკვეული შემთხვევები, როცა მას განსაკუთრებით ეფექტიანად და ელეგანტურად შეუძლია სივრცის მოსახერხებლად გადანაწილებაც და ინტერიერის გალამაზებაც.

რასაკვირველია, ასეთ დროს უპირველესად სტუდიოს ტიპის ბინები გვახსენდება — მისაღები ზონისა და სამზარეულოს ზონების გამოსაყოფად დიზაინერებიცა და მომხმარებლებიც ყველაზე ხშირად სწორედ დეკორატიულ ტიხარს ირჩევენ. თუმცა, გაითვალისწინეთ, რომ ის ძალიან კარგი შესაძლებლობაა სხვა ფუნქციის ოთახებშიც და შესანიშნავად ყოფს, მაგალითად, საძინებელსა და მცირე აბაზანას ან საგარდერობე კუთხეს, ან თუნდაც სამუშაო კაბინეტსა და მისაღებს. 

მთავარი, რის გამოც ტიხარზე ვაკეთებთ არჩევანს, ფართის დაზოგვა და სასურველი ნაწილის იზოლირებაა. კარისა და კედლისგან განსხვავებით, ის ვიზუალურად ნაკლებად ამცირებს სივრცეს, ბუნებრივ სინათლესაც ინარჩუნებს, გამძლე, ფუნქციური და გამოსაყენებლად მარტივია, თანაც, ინტერიერს მართლაც გამორჩეულად ხვეწს.

ტიხარი მოსახერხებელი და უსაფრთხო გადაწყვეტილებაა მაშინაც, თუ სამზარეულოს უფანჯრო სივრცეში ათავსებთ: ბუნებრივი აირის გაყვანილობისთვის მნიშვნელოვანია, ფართი აუცილებლად ნიავდებოდეს, თუ სამზარეულოს ზონას ფანჯრიანი ოთახისგან მცირე ტიხრით გამოყოფთ, ეს სუფთა ჰაერის ცირკულაციაშიც დაგეხმარებათ და ზონირებაშიც.

რა უნდა გავითვალისწინო, თუ ტიხარი მინდა

სურვილთან ერთად, რამდენიმე დეტალის გათვალისწინება მართლაც მნიშვნელოვანია. უპირველესად გახსოვდეთ, რომ კარგი იქნება, თუ რემონტის დაწყებამდე, წინასწარ გეცოდინებათ სად და როგორი ტიხრის დამონტაჟება გსურთ. 

სპეციალისტისთვის, რომელსაც ამ სამუშაოს შესრულება ან დამზადება მოუწევს, მნიშვნელოვანია, იცოდეს, როგორია კედელი და იატაკი, სადაც ის მაგრდება. საქმე იმაშია, მათი მასალა დამონტაჟების სპეციფიკაზე ახდენს გავლენას, ამიტომ ხელოსანს წინასწარ შეუთანხმეთ, რისგანაა ნაგები კედელი - ბლოკით თუ თაბაშირ-მუყაოთი, გადის თუ არა მასში გაყვანილობა და თუ გადის. წყლისა და გათბობის გაყვანილობას განსაკუთრებული ყურადღებით იატაკის შემთხვევაში მოეკიდეთ, რათა არასათანადოდ შესრულებულმა სამუშაოებმა მილები არ დაგიზიანოთ და სირთულეები არ შეგიქმნათ. ზოგადად, რემონტის დროს სპეციალისტები გვირჩევენ, რომ გაყვანილობის ადგილი ზედმიწევნით ზუსტად დავიმახსოვროთ, ან იატაკის მოჭიმვამდე მას მარტივად ფოტო გადავუღოთ. ცხადია, გაყვანილობის არსებობა არ ნიშნავს, რომ ტიხარს იმ ადგილას ვერ დაამონტაჟებთ, უბრალოდ ამ შემთხვევაში სჯობს, ტიხარი სტატიკური და ფუნქციურად ნაკლებად დატვირთული იყოს, სპეციალისტმა კი მისი დამაგრებისას შესაბამისი ატრიბუტები გამოიყენოს.

რომელი მასალა მირჩევნია
დეკორატიული ტიხრები შეიძლება სტატიკური, ლიანდაგზე გასაგორებელი, ერთ ან რამდენიმეფრთიანი იყოს. ისინი კი, როგორც წესი, სხვადასხვა მასალისგან მზადდება. ყველაზე ხშირად გავრცელებული ფოლადისა და ალუმინის ტიხრებია, თუმცა გვხვდება ხისგან, MDF-ისგან ან სულაც თაბაშირისგან დამზადებული პანელებიც. ფოლადის ტიხრები არა მარტო ტრენდული, არამედ გამძლეობითაც გამორჩეულია, თუმცა ინტერიერის დიზაინისა და ფაქტურების შესაბამისად, სხვა მასალების გამოყენებაც თქვენი სურვილის მიხედვით შეგიძლიათ.

სხვათა შორის, შესაძლებელია მასალების და არა მარტო მათი შეხამებაც. მაგალითად, საკმაოდ ლამაზი და ორიგინალური გადაწყვეტაა ვიწრო ტიხრისა და მაღალი მცენარეების ერთად გამოყენებაც. ასეთ დროს არც ფართი მცირდება, ოთახი კი მწვანდება და ჯანსაღდება.
კიდევ ერთი ფაქტორი ტიხრისთვის მინის შერჩევაა. ძალიან გავრცელებულია დაბურული ფაქტურა, რომელიც სხვადასხვა ფუნქციის სივრცეების, მაგალითად, სამუშაო კუთხის გამოყოფისას მართლაც კარგი გადაწყვეტილებაა. გაითვალისწინეთ, რომ უსაფრთხოებისთვის მნიშვნელოვანია, მინები აუცილებლად ნაწრთობი იყოს.

თუ ჰიპერმარკეტ დომინოში გვესტუმრებით, ტიხრებისთვის პანელებსაც შეარჩევთ და მცენარეებსაც. ასე რომ, შემოგვიარეთ და დამატებითი რეკომენდაციებისთვის ჩვენს კონსულტანტებსაც გაესაუბრეთ.