შარშან დომინოს ფილიალების სექციებში წარმოდგენილმა  ნაძვის ხეებმა ჩვენც ძალიან გაგვახალისა და წინასაახალწლო ფუსფუსში ჩართულ მომხმარებლებსაც საუკეთესო სადღესასწაულო განწყობა შეუქმნა. რა თქმა უნდა, ტრადიცია წელსაც გავაგრძელეთ და დიღმისა და ისთ ფოინთის ფილიალების სექციების თანამშრომლებს ორიგინალური, განსხვავებული და პროდუქციის შესაბამისი, თემატური ნაძვის ხეების დადგმა ვთხოვეთ.

რადგან ინიციატივამ კვლავაც დიდი დაინტერესება გამოიწვია, გადავწყვიტეთ, ახალ ბლოგპოსტში ჩვენს შიდა სამზარეულოში შეგახედოთ და იმ ადამიანების განწყობებზე გიამბოთ, რომლებიც ამ საოცარ ნაძვის ხეებს ქმნიან.

ახალი წლის მოახლოებასთან ერთად, ფილიალებში ნაძვის ხეების იდეებს სულ უფრო და უფრო დიდი დრო ეთმობოდა. ზოგჯერ ჩანაფიქრი იცვლებოდა, ზოგჯერ მოულოდნელი სირთულეები ჩნდებოდა, თუმცა საბოლოოდ ყველა ნაძვის ხე გამორჩეული გამოვიდა.

ენთუზიაზმითა და ხალისით შეუდგნენ ნაძვის ხის აწყობას დიღმის ფილიალის დიასახლისები. სურდათ, წელსაც მათი იდეა თუ რეალიზება გამორჩეული ყოფილიყო. ერთმანეთს აზრებს უზიარებდნენ და პირვანდელ ვერსიას ახალ-ახალ დეტალებს ამატებდნენ: „დიდი მონდომებით ვაწყობდით, ცვლილებებიც ხშირად შეგვქონდა. გვინდოდა, ჩვენს ნაძვის ხეს მოწონება დაემსახურებინა და ვფიქრობთ, შევძელით კიდეც“, - გვითხრეს მათ.

აზრი ბევრჯერ შეიცვალეს ისთ ფოინთის განათების სექციის თანამშრომლებმაც: „უამრავი იდეა გვქონდა, ამიტომ რამდენჯერმე ყველაფერი თავიდან დავიწყეთ. გვსურდა, ჩვენი ნაძვის ხე სექციასავით კაშკაშა და ბრდღვიალა ყოფილიყო. მგონი, გამოგვივიდა. ზოგადად, ნაძვის ხე სიხარულისა და ბედნიერების ემოციებს გვმატებს, ამიტომ აწყობის პროცესსაც სულ ეს შეგრძნებები ახლდა თან“, - აღნიშნეს განათების სექციის თანამშრომლებმა.

სწორედ გადამდები საახალწლო განწყობის შექმნა და გახალისება იყო ნაძვის ხის შექმნისას დიღმის ფილიალის სანტექნიკის სექციის მთავარი მოტივაცია: „შევეცადეთ, ნაძვის ხე ჩვენი შესაძლებლობების გათვალისწინებით აგვეწყო და გვეჩვენებინა, რომ ბედნიერება მართლაც წვრილმანებშია“, - ამბობენ სექციის თანამშრომლები.

ისთ ფოინთის ფილიალის იმავე სექციის თანამშრომლებმა კი არასტანდარტული, გამორჩეული ნაძვის ხის შესაქმნელად განსაკუთრებით რთული იდეის რეალიზება გადაწყვიტეს: „გვინდოდა, ნაძვის ხის ქვეშ გამწოვი დაგვეყენებინა და შიგნით თოვლს ებრუნა. ბევრჯერ გადავაკეთეთ, რადგან სასურველ შედეგს ვერ ვიღებდით, ბოლოს ისევ იმ ჭეშმარიტებამდე მივედით, რომ ძალა ერთობაშია და მენეჯერმა, კონსულტანტმა, პრომოუტერმა თუ სტაჟიორმა იდეის რეალიზებაზე ერთად ვიზრუნეთ. სწორედ ერთიანობამ, ჟინმა და აზარტმა მიგვიყვანა ამ შედეგამდე“, - გვითხრეს ისთ ფოინთის სანტექნიკის სექციაში.

დიღმის ფილიალის ჭურჭლის სექციამ საახალწლოდ ფერად-ფერადი ნივთები შეარჩია და ნაძვის ხის აწყობისას ცუგოების სათამაშო აქსესუარებიც გამოიყენა: „ნაძვის ხის მორთვა ხომ ახალი წლის ჯადოსნური ნაწილია, ამიტომ ისევ სიამოვნებით ჩავერთეთ და, სხვათა შორის, მისი აწყობისას მომხმარებლების მოწონებაც დავიმსახურეთ“, - აღნიშნავენ სექციის თანამშრომლები.

ნაძვის ხის მორთვას განსაკუთრებულად ელოდნენ ისთ ფოინთის დეკორის სექციაში. წინასწარ ვერსიებზეც ფიქრობდნენ და შემოქმედებით ნაწილზეც: „ბევრი კრეატიული იდეა გვქონდა, თუ როგორი შეიძლებოდა ყოფილიყო ჩვენი ნაძვის ხე და რაც წარმოვადგინეთ, სწორედ ამ იდეების შედეგია“, - ამბობენ სექციაში.

თავად „დომინოს“ თანამშრომლების გამორჩეული ინტერესს დურგლების ნაძვის ხე იწვევდა. სექციაში რამდენიმე ვარიანტის შექმნაზე მსჯელობდნენ, საბოლოოდ კი ნაძვის ხე წარმოდგენილზე ბევრად ლამაზი გამოუვიდათ: „მორთვასა და დეკორაციების შერჩევაში სხვა თანამშრომლებიც ჩართულები იყვნენ. იმ დღეების განმავლობაში ნამდვილი საახალწლო განწყობა და მხიარულება გვქონდა“, - აღნიშნავენ დიღმის ფილიალის სადურგლოს სექციაში.

ნამდვილი საახალწლო განწყობა კი „დომინოში“ კვლავაც გრძელდება. თანაც, ახლა განსაკუთრებული, სადღესასწაულო ფასდაკლებებიც გვაქვს. ასე რომ, გვეწვიეთ, შეიძინეთ ყველაფერი, რასაც სანტას ვერ სთხოვთ და ჩვენი თანამშრომლების მიერ შექმნილი, გამორჩეული ნაძვის ხეებიც ადგილზე დაათვალიერეთ.