შემოდგომა მალე მიიწურება და ბუნებაც მიძინებას დაიწყებს, თუმცა მცენარეების მოყვარულებმა გული არ გაიტეხოთ: ზოგი მათგანი სწორედ ამ სეზონზე ყვავილობს და, თანაც, ათასფრად. მაგალითად, ქრიზანთემა — შემოდგომის სიმბოლოდ ქცეული ხუჭუჭა ყვავილი, რომელიც ნოემბრის ბოლომდე, სანამ კარგად დაზამთრდება, გარემოს ალამაზებს და ფერადოვნებით მართლაც შესანიშნავ განწყობას ქმნის.  

ჩვენი ბლოგპოსტიც სწორედ ქრიზანთემებზეა: გამოგვყევით და გაიგეთ მეტი მათი მოვლის შესახებ. 

სად შეგიძლიათ ქრიზანთემის დარგვა 

ყველგან, სადაც მოისურვებთ: ეზოშიც, ტერასაც, აივანზეც და ოთახშიც. უხვი ყვავილით გამორჩეული მცენარე საკმაოდ ამტანია, ორპირსაც უძლებს და ცუდ ამინდსაც, ამიტომ თამამად მოუძებნეთ ადგილი. გაითვალისწინეთ, რომ გამწვანებაში ორი სახეობის ქრიზანთემა გამოიყენება: ერთი ჯუჯა, დაბალი ჯიშია (მულტიფლორა - კორეული სელექციის მცენარეები), ბურთის ფორმა აქვს და ყვავილებით მთლიანად იფარება, მეორე კი —შედარებით მაღალია და გაზაფხულზე სჭირდება გასხლვა, რაც უნდა გაითვალისწინოთ სივრცის მოწყობისას. მაგალითად, ჯუჯა ქრიზანთემები დასაკიდ ქოთნებში ჩარგოთ და აივნის ან ტერასის ორიგინალურ დეკორაციად აქციოთ, შედარებით მაღლები კი ეზოში განათავსოთ. 

რადგან ქრიზანთემა შემოდგომის ყვავილია, მას სითბო დიდად არ უყვარს. უმჯობესია, თუ ჰაერის ტემპერატურა 20 გრადუსზე მეტს არ ასცდება, მცენარეს კი მზის პირდაპირ სხივებს მოარიდებთ, რომ არ გახმეს და ყვავილობაც მალე არ დაამთავროს. სამაგიეროდ, ქრიზანთემას ძალიან მოსწონს სინათლე, რომელიც აყვავებაშიც ეხმარება, ამიტომ შეეცადეთ, ადგილი შესაბამისი შეურჩიოთ.  

სხვათა შორის, ქრიზანთემა იმ მცენარეებს შორისაა, რომლებიც ჰაერს მავნე ნივთიერებებისა და ტოქსინებისგან კარგად ასუფთავებენ, ამიტომ შეგიძლიათ, ეს შესანიშნავი ყვავილი სამზარეულოში ან მისაღებშიც განათავსოთ და ოთახში სიფერადესთან ერთად, სიჯანსაღეც შეიტანოთ. 

როგორ მოვუაროთ ქრიზანთემას 

ქრიზანთემას მოვლა რთული ნამდვილად არ არის. მას ფხვიერი მიწა, ნოყიერი, ნეიტრალური ნიადაგი (pH 5.5-6.5) და ტენიანი გარემო სჭირდება, ამიტომ ხშირად უნდა მორწყათ, განსაკუთრებით  ზაფხულში. სანამ აყვავდება, შეგიძლიათ, წყალი მიასხუროთ კიდეც, ხოლო შემოდგომაზე ინტენსივობა შეამციროთ. შეეცადეთ, წყალი არ დაუგუბდეს, მოსარწყავად კი საღამოს პერიოდი შეარჩიეთ. ასე ქრიზანთემა არც გახმება და სიჯანსაღესაც შეინარჩუნებს.  

არ დაგავიწყდეთ, რომ ქრიზანთემებს მავნე მწერები ხშირად ერჩიან, ამიტომ კარგად დააკვირდით თქვენს ყვავილებს. თუ ყურადღებას დროულად გამოიჩენთ და მალევე შეწამლავთ, მათ მარტივად დაცვას შეძლებთ.  

გაითვალისწინეთ, რომ მაღალი ჯიშის ქრიზანთემები გაზაფხულზე აუცილებლად უნდა გასხლათ. ზამთრის დადგომასთან ერთად კი, შეგიძლიათ, გადაჭრათ, ზედ გამხმარი ფოთლები დაალაგოთ და ფესვები ამგვარად შეინახოთ. გაზაფხულიდან თქვენი ქრიზანთემა გამოიღვიძებს, შემოდგომაზე კი ფერადი ყვავილებით ისევ გაგახარებთ.  

დომინოს ბაღში შეთავაზება ახლა სწორედ ქრიზანთემებზე გვაქვს. გვესტუმრეთ, შეარჩიეთ სხვადასხვა ფერისა თუ ზომის ყვავილები განსაკუთრებულ ფასად და გაილამაზეთ სასურველი სივრცე.