ფილების შერჩევა და დაგება სახლის რემონტის ერთ-ერთი საპასუხისმგებლო და რთული ეტაპია. საქმე იმაშია, რომ ამ დროს დაშვებული შეცდომების გამოსწორება განსაკუთრებით პრობლემატურია ხოლმე, ამიტომ, როგორც წესი, ფილების, მით უფრო, არასტანდარტული მასალის დაგებას, გამორჩეული ყურადღებით უნდა მოვეკიდოთ.

ფილების შერჩევის შესახებ ადრეც არაერთი საინტერესო რეკომენდაცია მოგვიცია, ჩვენს ახალ ბლოგპოსტში კი გვსურს, ყურადღება დაგების პროცესზეც გავამახვილოთ და განსხვავებული, სასარგებლო და პრაქტიკული რჩევები შემოგთავაზოთ. 

წინასწარ განსაზღვრეთ ფილების კრიტერიუმები

რა თქმა უნდა, ფილების შერჩევისას ძალიან მნიშნველოვანია სახლის ინტერიერის საერთო ფერები და დიზაინი, თუმცა არის კიდევ რამდენიმე კრიტერიუმი, რომელზეც ამ მასალის შეძენამდე უნდა ჩამოყალიბდეთ. 

უპირველესად, განსაზღვრეთ, სად უნდა დააგოთ შერჩეული ფილა: კედელზე თუ იატაკზე და რომელი სივრცისთვის გჭირდებათ ის. მაგალითად, აივნისთვის განკუთვნილი მასალა აუცილებლად ყინვაგამძლე უნდა იყოს. მაღალი მდგრადობა სჭირდება აბაზანისა და სამზარეულოს წინსაფრისთვის განკუთვნილ ფილასაც, რადგან ამ ადგილებში ტემპერატურის ცვალებადობა, ნესტი და ორთქლი განსაკუთრებით ხშირია.

მნიშვნელოვანი კრიტერიუმია პრაქტიკულობაც: პრიალა ზედაპირიანი ფილები მართლაც ძალიან ლამაზია, მაგრამ სრიალებს კიდეც, ამიტომ აბაზანაში მათი გამოყენება ზოგჯერ არაპრაქტიკულია. ზოგადად, გაითვალისწინეთ, რომ ფილას, რომელსაც იატაკისთვის შეარჩევთ, მოცურების საწინააღმდეგო საფარიც უნდა ჰქონდეს და ამ მხრივ გლუვი ზედაპირი მეტად გამოსადეგია.

მნიშვნელოვანი ფაქტორია ფილების მოვლის სიმარტივეც. მომხმარებლების გამოცდილება აჩვენებს, რომ ტრენდული მქრქალი ზედაპირები უფრო რთულად იწმინდება და მეტ გარჯას მოითხოვს. თუ თქვენთვისთვისაც ეს ფაქტორი მნიშვნელოვანია, მაშინ ღია ფერის ფილების გამოყენებასაც გირჩევდით: მუქ ტონებზე, რომლებიც ძალიან ელეგანტური და პოპულარულია, წყლის მცირე წვეთებიც კი შესამჩნევია, ამიტომ მათ მოვლის კუთხით განსაკუთრებული ძალისხმევა სჭირდება.

სწორად შეარჩიეთ წებოცემენტი

როგორც იცით, წებოცემენტი ფილების დაგების პროცესის აუცილებელი ნაწილია. სამუშაოების პროფესიულად შესრულებისა და გამძლეობისთვის, ძალიან მნიშვნელოვანია, ეს მასალა არა მარტო ხარისხიანი, არამედ ოპტიმალურად შერჩეულიც იყოს. სწორედ ამიტომ, წებოცემენტის შეძენისას განსაკუთრებული ყურადღება მიაქციეთ მის მიზნობრიობას — მახასიათებლებს, კლასიფიკაციას, ტიპსა და იმ მანიშნებლებს, რომლებიც მწარმოებლების მიერ შეფუთვაზეა განთავსებული. 

ბევრმა მომხმარებელმა არ იცის, რომ წებოცემენტის შერჩევა უპირველესად ფილების ზომაზეა დამოკიდებული. მცირე და დიდ ფილებს სხვადასხვა კატეგორიის მასალა სჭირდება. მაგალითად, თუ მასშტაბურ, დეკორატიულ კერამოგრანიტზე მეტროს ტიპის ფილისთვის განკუთვნილი წებოცემენტს გამოიყენებთ, დროთა განმავლობაში, შესაძლოა, ის კედელს დაშორდეს და არა მარტო ვიზუალურად შესამჩნევი, არამედ საფრთხის შემცველიც გახდეს. აუცილებელია, გაითვალისწინოთ ისიც, რომ მნიშვნელოვანია, წებოცემენტის შეძენისას წინასწარ იცოდეთ მას შიდა სივრცეში იყენებთ, თუ გარეთ, რამდენად ხშირი იქნება იქ ნესტი, ფიზიკური დატვირთვა, ტემპერატურის ცვლილება და ა.შ.

ასეთ შემთხვევებში ყურადღება მიაქციეთ მასალის შეფუთვას, რომელზეც აუცილებლად უნდა ეწეროს მაღალი ელასტიურობის მანიშნებლები — S1 ან S2, თავად წებოცემენტი კი C2 კლასის იყოს. გაითვალისწინეთ, რომ C0 და C1 კლასები შიდა მოხმარების მცირე და საშუალო ზომის ფილებზე გამოიყენება, ვერტიკალური ზედაპირებისთვის განკუთვნილ წებოცემენტს აუცილებლად T მანიშნებელი აქვს აღნიშნული, F – სწრაფი შრობის ფუნქციას, E კი — გახანგრძლივებულ სამუშაო ფუნქციას აღნიშნავს. 

ფუგა — განსხვავებული შტრიხი და დაცულობა 

ფუგა, რომელიც ფილებს შორის არსებული ნაპრალების შემავსებლად გამოიყენება, ბოლო წლებია, ინტერიერის განსხვავებულ შტრიხადაც იქცა. მაგალითად, ხშირად შეხვდებით მცირე ზომის, ე.წ. მეტროს თეთრფილებიან აბაზანას, რომელიც შავი, რუხი ან თუნდაც წითელი ფუგითაა გაფორმებული და მართლაც გამორჩეულად ლამაზია. ან სულაც პირიქით: ფილების იდენტური ფერის ფუგით დამუშავება სივრცის ერთიან აღქმას ქმნის და მას ვიზუალურად ზომაშიც მეტად ზრდის. 

თუმცა, ფერის გარდა, ფილების დაგებისას ფუგა კომპონენტების მიხედვითაც უნდა შეარჩიოთ. გაითვალისწინეთ, რომ ერთკომპონენტიანი, ხარისხის მიუხედავად, გამძლეობით ორკომპონენტიანს ჩამორჩება, ამიტომ იმ სივრცეში, სადაც მეტი ფიზიკური დატვირთვაა მოსალოდნელი, უმჯობესია, ორკომპონენტიანი მასალა გამოიყენოთ. რა თქმა უნდა, უნდა შეარჩიოთ წყალგაუმტარი ფუგა, რომელსაც სოკოს საწინააღმდეგო ეფექტი ექნება, გარე სივრცეში კი ფილები აუცილებლად ყინვაგამძლე მასალით დაამუშაოთ.

გახსოვდეთ, რომ ყველა ფუგას აქვს ნაკერის ზომის ლიმიტი, ანუ ზოგიერთი მათგანი 6 მმ-მდე, ზოგი —10-მმდე, ზოგიც — 20 მმ-მდე ზომის ნაკერისთვის გამოიყენება. შესაბამისად, შეძენისას ამ კრიტერიუმის გათვალისწინებაც დაგჭირდებათ. ამას გარდა, გახსოვდეთ, რომ ფილებზე, რომელთა ქვეშაც იატაკქვეშა გათბობა გადის, სპეციფიკური ფუგა გამოიყენება. 

აკონტროლეთ დაგების ხარისხი 

მიუხედავად იმისა, რომ მწარმოებლები ფილებისთვის ელეგანტურ კუთხოვანებსა და პროფილებს გვთავაზობენ, დიზაინის თანამედროვე ტრენდი უპირატესობას კიდეების 45-გრადუსიან დამუშავებას ანიჭებს. თუმცა, აუცილებელია, ხელოსანს წინასწარ შეუთანხმოთ ეს დეტალი და ფილაც ისეთი შეარჩიოთ, რომელზეც ამგვარი დამუშავება მარტივად გამოვა. 

გაითვალისწინეთ, რომ ახალაშენებულ კორპუსებში კედლები რამდენიმე წლის განმავლობაში ფორმას იცვლის, რის გამოც ფილა შესაძლოა გაიბზაროს. ამ და სხვა გაუთვალისწინებელი შემთხვევებისთვის სჯობს, მასალა ყოველთვის ზედმეტი რაოდენობით შეიძინოთ და გარკვეული მარაგები იქონიოთ. 

და ბოლოს: ჰიპერმარკეტ “დომინოში”ფილების კვირეული გვაქვს. 
გვესტუმრეთ ფილიალებში, ჩვენს კონსულტანტებთან ერთად შეარჩიეთ სასურველი, ოპტიმალური, უსაფრთხო მასალები და გაიმარტივეთ რემონტის პროცესი.