გარე სივრცეების მაქსიმალურად ოპტიმალურად ათვისება თანამედროვე სახლის მოწყობის ერთ-ერთი გავრცელებული ტენდენციაა. სწორედ ეს ტენდენცია განაპირობებს გარე სამზარეულოს პოპულარობასაც, რომელსაც ბოლო პერიოდში მთელ მსოფლიოში სულ უფრო ბევრი ადამიანი ირჩევს.

ჩვენს ახალ ბლოგპოსტშიც ამჯერად სწორედ გარე სამზარეულოზე გიამბობთ — სივრცეზე, რომელიც ნებისმიერ ტერასას ან ვერანდას ერთდროულად ამშვენებს კიდეც და დამატებით ფუნქციონალსაც მატებს. 

რატომ უნდა მოიწყოთ გარე სამზარეულო

გარე სამზარეულო მართლაც ძალიან მოსახერხებელია: გარდა იმისა, რომ გარე სივრცეში კერძების მომზადება სასადილო ოთახში სუნისა და კვამლისგან დაგიცავთ, დაგეხმარებათ, ახალ-ახალი კულინარიული ექსპერიმენტები მოსინჯოთ, დრო უბრალოდ კარგ გარემოში გაატაროთ, სასიამოვნო საღამოები ან მხიარული წვეულებები მოაწყოთ, თან ისე, რომ სამზადისის დროს თქვენც სტუმრებთან ან ოჯახის წევრებთან ერთად იყოთ და გამასპინძლების პროცესი კიდევ უფრო გაახალისოთ.

გასათვალისწინებელია კიდევ ერთი ფაქტორი: კარგი გარე სამზარეულო კარგი ინვესტიციაცაა და სახლის ღირებულებაზე მხოლოდ პოზიტიურად აისახება, ამიტომ, თუ ფართი საშუალებას გაძლევთ, მის მოწყობაზე უარი არ თქვათ: ნამდვილად კმაყოფილი დარჩებით.

როდის და როგორ დაგეგმოთ გარე სამზარეულო

გარე სამზარეულოს მოსაწყობად დღესდღეობით თქვენთვის მოსახერხებელ, დახვეწილ დიზაინს, ფერებსა თუ ინტერიერს ბევრ აპლიკაციაში, მათ შორის პოპულარულ Pinterest-ზეც, მრავლად იპოვით. დასაწყისისთვის მთავარია, მისი ფართობი და მდებარეობა განსაზღვროთ. წინასწარ დაგეგმოთ, რა სივრცეს დაიკავებს ის და აივანზე იქნება განთავსებული თუ ტერასაზე. როგორ გარე სამზარეულოს შეარჩევთ — დახურულს, ნახევრად ღიას თუ შემინულს, ესეც თქვენს გემოვნებასა და მიზანზეა დამოკიდებული.

ზოგადად, უმჯობესია, გარე სამზარეულო სახლის რემონტის ეტაპზევე დაგეგმოთ და მისთვის, სივრცესთან ერთად, ელექტროენერგიის წყარო, ბუნებრივი აირისა და წყლის გაყვანილობები გაითვალისწინოთ. ეს დამატებით კომფორტსაც შეგიქმნით, სამომავლოდ კი ზედმეტ ფინანსურ ხარჯებსა და სირთულეებს აგარიდებთ.

გარე სამზარეულოს მასალები

გირჩევთ, გარე სამზარეულოს ბიუჯეტის დაგეგმვისას მთავარი აქცენტი მასალების გამძლეობაზე გააკეთოთ და პრიორიტეტი სწორედ ამ კრიტერიუმს მიანიჭოთ. ეს სივრცე გარემო პირობების ცვალებადობას კარგად უნდა უძლებდეს, ამიტომ საფარი, პანელები, ჭერი, ტექნიკა თუ ნივთების სათავსოები აუცილებლად გარე სივრცისთვის უნდა იყოს განკუთვნილი. სპეციალისტები რეკომენდაციას ძირითადად უწევენ ყინვაგამძლე, წყალგაუმტარ და ლითონის უჟანგავ მასალებს, რომელთა შეძენაც დღესდღეობით სირთულეს ნამდვილად აღარ წარმოადგენს.

რა ტექნიკა დაგჭირდებათ გარე სამზარეულოსთვის

გარე სამზარეულოში ნიჟარა, მაცივარი, ჭურჭლისა და სარეცხი მანქანებიც კი თავსდება.  გირჩევთ, სივრცის დასაზოგად, არჩევანი მცირე ზომის, კომპაქტურ და მრავალფუნქციურ მოწყობილობებზე შეაჩეროთ. თუ ფართი საშუალებას გაძლევთ, მსუბუქი ტექნიკა — მიკროტალღური ღუმელი, ჩაიდანი, ტოსტერი, სენდვიჩებისა და, რა თქმა უნდა, ყავის აპარატიც გამოგადგებათ, თუმცა, გარე სამზარეულოს განსაკუთრებულ ფუნქციონალსა თუ ხიბლს მაინც გარე სივრცის ტექნიკა მატებს.

თანამედროვე ცხოვრების წესის ტრენდებს მწარმოებლებიც ითვალისწინებენ, ამიტომ მომხმარებლებს ამ კუთხით მართლაც მრავალფეროვან არჩევანს სთავაზობენ.  ასორტიმენტში შეხვდებით როგორც პრემიუმ კლასისა და დიზაინის, მაღალხარისხიანი მასალის, ფუნქციურ გრილი-ბარბექიუს მოდელებს, ისე კერამიკულ გრილებს, რომლებიც ერთდროულად ღუმელიცაა და საშაშხეც, საკვებს კი მართლაც განუმეორებელ გემოს აძლევს. გარე სამზარეულოს ტექნიკაზე საუბრისას გვერდს ვერ ავუვლით ნახშირის გრილს, რომელიც აირზე მომუშავესთან შედარებით, უფრო ბიუჯეტურია და, ასევე, პორტატიულ, გადასატან გრილსა თუ მაყალს, მით უმეტეს, რომ ეს მოწყობილობები არა მარტო ეზოში ან ვერანდაზე, არამედ პიკნიკზეც ძალიან გამოგადგებათ.

და თუ გარე სამზარეულოს მოწყობას ტერასაზე აპირებთ და საკმარისი სივრცეც გაქვთ, ბაღის ბუხარს გირჩევდით: ამ ძალიან დახვეწილი დიზაინისა და პრაქტიკული ფუნქციონალის მოწყობილობით ტერასაზე დამატებით სიმყუდროვესაც შექმნით და გემრიელ კერძებსაც.

გარე სამზარეულოს გაფორმება

ტექნიკის გარდა, აუცილებლად დაგჭირდებათ ავეჯი, რომელიც შეგიძლიათ, ბაღის ავეჯის კატეგორიიდან  შეარჩიოთ და შემდეგ მათ სურვილისამებრ, დამატებითი სილამაზისა და სიმყუდროვისთვის ინტერიერის დეკორატიული ნივთები  და აქსესუარები შეუხამოთ.

კარგი იდეაა გარე სამზარეულოს ორიგინალური გარე განათებით გაფორმება და, რა თქმა უნდა, არ უნდა დაგავიწყდეთ მცენარეებიც, რომლებიც ამ სივრცეს თქვენი სახლის ერთ-ერთ ყველაზე მომხიბვლელ და ჯანსაღ ადგილად აქცევენ.

თუ გარე სამზარეულო თქვენი დიდი ხნის სურვილია, ახლა მისი ასრულებისთვის სწორედ რომ საუკეთესო დროა. გვესტუმრეთ „დომინოში“ და ჩვენი კონსულტანტები დაგეხმარებიან, თქვენი სახლის ეს შესანიშნავი ადგილი თავიდან ბოლომდე ერთ სივრცეში გაარემონტოთ და მოაწყოთ.