იატაკის საფარი სივრცის ფუნქციური ზონირების ერთ-ერთი საუკეთესო ხერხია. თანამედროვე დიზაინერები, სხვადასხვა მასალის შეხამებით, ბინის გადანაწილების მართლაც ეფექტურ და საინტერესო ვარიანტებს ქმნიან.  ამ პროცესის განუყოფელი ნაწილი კი საფარის გამძლე, მოსახერხებელი, დახვეწილი გადაბმაა და მას ყოველთვის დიდი ყურადღება ექცევა.

როგორ შევარჩიოთ ზღურბლი ან უბრალოდ გადაბმა, რომელსაც მას ხშირად უწოდებენ ხოლმე — ახალ ბლოგპოსტში, გვსურს, რჩევები სწორედ ამ თემაზე გაგიზიაროთ.

 სანამ იატაკის გადაბმას შეარჩევთ

ზღურბლის შერჩევამდე, როგორც კი იატაკის მოხვეწას დაიწყებთ, დაახლოებით უკვე უნდა იცოდეთ ის მასალები, რომლებსაც საფარად გამოიყენებთ. დიზაინი და ფერი ნაკლებად მნიშვნელოვანია, მთავარია, სიმაღლე გქონდეთ განსაზღვრული, რათა სახლში ერთდონიანი იატაკი გართულებების გარეშე გამოვიდეს. თითქოს მარტივი და აშკარა რეკომენდაციაა, მაგრამ ბევრი ადამიანის გამოცდილება აჩვენებს, რომ ზოგჯერ მას არ ითვალისწინებენ და შემდეგ დამატებითი ფინანსური თუ დროითი რესურსის დახარჯვა უწევთ.

უფრო მეტიც: მასალების სიმაღლე უნდა იცოდნენ სანიტარული კვანძების გაყვანილობის, იატაკის მოხვეწისა და ფილების დაგების ხელოსნებმაც. თუ შემსრულებელი პროფესიონალია, ის მიახლოებით სიმაღლეს წინასწარ აუცილებლად გკითხავთ, ამიტომ აუცილებელია, მასალებზე რემონტის დასაწყისშივე ჩამოყალიბდეთ.

განსაზღვრეთ, სად დაგჭირდებათ გადამყვანების გამოყენებაც: კარებთან თუ უბრალოდ სხვადასხვა სივრცის ეფექტური ვიზუალური გამოყოფისთვის. თუ ამ რეკომენდაციებს გაითვალისწინებთ, ზღურბლის შერჩევა ბევრად გაგიმარტივდებათ. 

ზღურბლი კართან

თუ ზღურბლი რომელიმე ოთახის კართან უნდა დამონტაჟდეს, საჭიროა, წინასწარ გქონდეთ შერჩეული კარიც, მისი განთავსების ზუსტი ადგილიც და გაღების მიმართულებაც. ამგვარად შეძლებთ, ის უშუალოდ კარის ქვეშ მოაქციოთ და მაქსიმალურად დამალოთ. გაითვალისწინეთ, რომ ჯერ კარი მონტაჟდება, შემდეგ კი ზღურბლი. ასე ის ნაკლებად დაზიანდება და შესაცვლელადაც მარტივი იქნება.

გადაბმა სივრცის ზონირებისთვის

სივრცის ზონირებისთვის გადამყვანებს განსაკუთრებით ხშირად სტუდიოს ტიპის ბინებში იყენებენ. ამ დროს, როგორც წესი, სხვადასხვა საფარს ანიჭებენ უპირატესობას. მაგალითად, სამზარეულოსა და შემოსასვლელში ფილას აგებენ, რომელიც გაცილებით გამძლე და მარტივი მოსავლელია, მისაღებისთვის კი ლამინატს ან პარკეტს ირჩევენ.

ზღურბლის მასალები

დღესდღეობით მწარმოებლები სხვადასხვა ფაქტურისა და ფერის ზღურბლის მრავალფეროვან არჩევანს გვთავაზობენ. მათ შორისაა, ალუმინის ან PVC-სგან დამზადებული გადამყვანები, რომლებიც ნაკლოვანებებს იდეალურად ფარავს, მყარია და მექანიკურ დატვირთვას იმ ადგილებშიც კარგად უძლებს, სადაც განსაკუთრებით ინტენსიური მოძრაობაა.

ასევე, ძალიან ტრენდულია გადამყვანად კორპის მასალის გამოყენება, რომელიც განსაკუთრებით კარგად ეხამება პარკეტსა და ლამინატს. თუმცა, გაითვალისწინეთ, რომ ის შედარებით რბილი მასალაა, ამიტომ მეტ მოფრთხილებას მოითხოვს. 

გადაბმა ზღურბლის გარეშე

რასაკვირველია, შეგიძლიათ, ზღურბლი საერთოდ არ გამოიყენოთ და ფილებისა და ლამინატის ან პარკეტის გადაბმა ორიგინალურად გააფორმოთ. ორი სხვადასხვა ფილის შემთხვევაში სამუშაოები ბევრად მარტივია, მაგრამ თუ მასალები განსხვავებული ფაქტურისაა, პროცესი შესრულების დიდ ხარისხსა და პროფესიონალიზმს მოითხოვს. თუ რემონტს თავად, დიზაინერის გარეშე აკეთებთ, შესაბამის ბევრ საინტერესო იდეას პინტერესტზეც მარტივად იპოვით. 

ჰიპერმარკეტ „დომინოს“ ფილიალებში გადამყვანების მრავალფეროვანი არჩევანი გვაქვს. ჩვენი კონსულტანტების დახმარებით, იატაკის საფარსაც შეარჩევთ და გადაბმასაც იდეალურად შეუხამებთ.