რაც არ უნდა დიდი კარადა გქონდეთ, მაინც აუცილებლად დგება დრო, როცა რაღაცას ვეღარ ატევთ, ან, ადგილის სიმცირის გამო, სასურველ სამოსს თუ ფეხსაცმელს მარტივად ვეღარ პოულობთ. უკვე ბევრი წელია, სახლის თანამედროვე დაგეგმარებაში ამ პრობლემას საუკეთესოდ აგვარებს სპეციალური სივრცე — საგარდერობო ოთახი, რომელიც ფუნქციურობითა და კომფორტულობით სულ უფრო პოპულარული ხდება.

ამ ბლოგპოსტში საგარდერობო ოთახის მოწყობაზე გიამბობთ. გაგაცნობთ რჩევებს, რომლებიც თქვენს სურვილებზე მორგებული, მოსახერხებელი და მარტივად გამოსაყენებელი სივრცის შექმნაში დაგეხმარებათ.

 სად მოვაწყოთ საგარდერობო

ზოგადად, საგარდერობო ოთახისთვის სპეციალური ზონის გამოყოფა ხშირად სახლის მთლიან ფართზეა დამოკიდებული. რა თქმა უნდა, მისი მოწყობა დიდ ბინებში  გაცილებით კომფორტული და მარტივია, თუმცა თუ პატარა ბინა გაქვთ, გულს მაინც ნუ გაიტეხთ: ოპტიმალური, შედარებით მოკრძალებული გადაწყვეტები მცირე ზომის სივრცეებისთვისაც არსებობს.

ნებისმიერ შემთხვევაში, რემონტის დაწყებამდე, ზუსტად უნდა იცოდეთ, გსურთ, თუ არა ტანსაცმლისა და აქსესუარებისთვის სპეციალური ოთახის მოწყობა და რამდენი ადამიანისთვის იქნება ის განკუთვნილი. ხშირად ამ ფუნქციით სივრცეს საძინებელში ან შემოსასვლელში გამოყოფენ ხოლმე, თუმცა თანამედროვე დიზაინერები მისთვის ადგილს უკვე შედარებით დიდი ზომის სააბაზანოშიც პოულობენ. 

ასეთ დროს დახვეწილი ზონირებისთვის კარი და ტიხარი გამოიყენება. განსაკუთრებით ეფექტურია გასასრიალებელი ან დასაკეცი შიდა კარის გამოყენება — ის მცირე ადგილს იკავებს, ძალიან ელეგანტურია და ხშირად ოთახის ინტერიერის დამატებით შტრიხადაც იქცევა ხოლმე. საკმაოდ გავრცელებულია საგარდირობეს დეკორატიული ტიხრებით გამიჯვნაც, რომელიც ახლა დიზაინერების ერთ-ერთი საყვარელი ტრენდია და თანამედროვე ინტერიერს მართლაც გამორჩეულად უხდება.

როგორი განლაგება შევარჩიოთ

რა თქმა უნდა, ძალიან მნიშვნელოვანია საგარდერობოს ფუნქციური ზონირებაც: ვერტიკალური სათავსოების გამოყოფა, უჯრებისა და თაროების განლაგება. ბევრი რამ თავად სივრცის სპეციფიკაზეა დამოკიდებული, თუმცა გირჩევთ, აუცილებლად გაანაწილოთ ოთახი აქტიურ და პასიურ ზონებად: აქტიურ ნაწილში შეინახავთ ნივთებს, რომლებსაც ყოველდღიურად იყენებთ, პასიურში კი, მაგალითად ყველაზე მაღალ თაროებზე, ჩემოდნებს, სეზონურ სამოსს ან აქსესუარებს.

საგარდერობოს მოწყობისას უმჯობესია, მაქსიმალურად ბევრი უჯრა და თარო გაითვალისწინოთ. გამოყავით სპეციალური სივრცე არა მარტო სხვადასხვა ზომის ფეხსაცმლისთვის, არამედ აქსესუარებისა და სამკაულებისთვისაც. ეს თქვენს საგარდირობეს მეტად მოსახერხებელს გახდის. 

ყურადღება მიაქციეთ იმ კარადის ზომებს, სადაც საკიდებს განათავსებთ: მნიშვნელოვანია, ყველა მათგანი კარადაში თავისუფლად ეტეოდეს, თქვენ კი არა მარტო სათავსოების სიმაღლე, არამედ სიღრმეც ზედმიწევნით გქონდეთ გათვლილი.

აუცილებლად შეარჩიეთ ხარისხიანი მექანიზმები, რომლებიც ხშირ გამოყენებასა და დატვირთვას ხანგრძლივად გაუძლებს. ეს ის დეტალებია, რომლებზეც თანხის დაზოგვა არ ღირს, რადგან შესაძლოა მათ გამოსწორებაზე მომავალში დამატებითი დროისა და ფინანსების დახარჯვა დაგჭირდეთ.

თუ საგარდერობოს ფართი საშუალებას გაძლევთ, გირჩევთ, ადგილი პუფის ან პატარა ბენჩისთვისაც გაითვალისწინოთ, რათა, საჭიროების შემთხვევაში, მაგალითად, ფეხსაცმლის მოსინჯვისას, კომფორტულად მოთავსდეთ.

სხვათა შორის, თუ კარგ საგარდერობოს მოაწყობთ, საძინებელში თუ სააბაზანოში ბევრად ნაკლები ავეჯის განთავსება დაგჭირდებათ, რაც დამატებით ფართსაც დაგიზოგავთ და ხარჯებსაც.

განათება

საგარდერობოს სრულფასოვანი და კომფორტული ფუნქციონირებისთვის უდიდესი მნიშვნელობა განათებას აქვს და ეს ფაქტორი რემონტის, კონკრეტულად კი ელექტრობის გაყვანილობის დაგეგმვიდანვე უნდა გაითვალისწინოთ. აუცილებელია, პროფესიონალმა — არქიტექტორმა, დიზაინერმა თუ ელექტრიკოსმა წერტილები ოპტიმალურად გადაანაწილოს, რათა სინათლე ნებისმიერ, ყველაზე მცირე კუთხესაც საჭირო რაოდენობით ხვდებოდეს და სასურველი ნივთის მოძიებას გიმარტივებდეთ. 

დაგეგმვისას არ გამოგრჩეთ კარადებისა და თაროების შიდა განათებები, რომელთა გარეშეც მაქსიმალური შედეგის მიღწევა გაგიჭირდებათ. ყველაზე ხშირად ამ მიზნით  წერტილოვან ლენტურ განათებებს იყენებენ. გაითვალისწინეთ, რომ დღესდღეობით მწარმოებლები თბილი, ნეიტრალური და ცივი ტონების პროდუქციას გვთავაზობენ, ამიტომ მათი შეხამება სახლის საერთო განათებასთან არ გაგიჭირდებათ.  

სხვათა შორის, საგარდერობო ოთახის სინათლეზე მნიშვნელოვან გავლენას ახდენს ფერებიც. რა თქმა უნდა, ეს სივრცეც სახლის საერთო დიზაინსა და ტონებს უნდა იმეორებდეს, თუმცა, მაინც უნდა ითქვას, რომ ღია ფერები დამატებით შუქსაც ქმნის და სივრცეს ვიზუალურადაც ადიდებს. ფართს დამატებით კიდევ უფრო გაზრდის მასიური სარკე, რომელიც საგარდერობოში ისედაც დაგჭირდებათ.

საგარდერობო ოთახის მოსაწყობად საჭირო ბევრ პროდუქტს ჰიპერმარკეტ „დომინოში“ აღმოაჩენთ. გვეწვიეთ  ფილიალებში, გაესაუბრეთ ჩვენს კონსულტანტებს და კომფორტული და მოსახერხებელი საგარდირობე სივრცე მათთან ერთად დაგეგმეთ.