გარკვეული პერიოდის წინ არსებობდა მოსაზრება, რომ საძინებელში მცენარეების განლაგება სასურველი არ არის, თუმცა ბოლო დროს ეს მიდგომა სრულიად საპირისპირო რეკომენდაციებით შეიცვალა. არაერთი კვლევა ადასტურებს, რომ სიმწვანე ნებისმიერ ოთახში, მით უმეტეს ქალაქში მაცხოვრებლებისთვის, ერთგვარ აუცილებლობასაც წარმოადგენს. განსაკუთრებით კი იმ მცენარეების, რომლებიც ინტერიერის გალამაზებასთან ერთად, ღამით აქტიურად გამოყოფილი ჟანგბადით ოთახს ამდიდრებენ, ნახშირორჟანგს შთანთქავენ, ჰაერს მავნე ნივთიერებებისგან ასუფთავებენ და სასურველ ტენიანობასაც ინარჩუნებენ.

თუ საძინებლის გამწვანებას ახლა გეგმავთ, აუცილებლად გაეცანით ჩვენს ბლოგპოსტს, რომელშიც სწორედ ამ ოთახისთვის განკუთვნილ მცენარეებსა და მათ სასარგებლო თვისებებზე გიამბობთ.

ერთ-ერთი ყველაზე პოპულარული მცენარე, რომელსაც საძინებლისთვის გავუწევდით რეკომენდაციას, სანსევიერია, იგივე გველის მცენარეა. მისი მთავარი უპირატესობა სწორე ღამით ჟანგბადის აქტიური გამოყოფაა. თანაც, სანსევიერია მარტივად  მოსავლელია და ნებისმიერ ინტერიერს ძალიან უხდება.

ჟანგბადის კიდევ ერთი წყარო საშობაო კაქტუსია, რომელსაც ზოგჯერ შლუმბერგერას ან დეკემბერას სახელითაც შეხვდებით. გარდა იმისა, რომ ეს მცენარე ძალიან სასარგებლოა, როგორც სახელიც მიგანიშნებთ, ულამაზესი ყვავილებით სწორედ ზამთარში გაგახარებთ. გაითვალისწინეთ, რომ საშობაო კაქტუსი სრულიად უწყინარია და მისი განთავსება საბავშვო ოთახშიც თამამად შეგიძლიათ.

გაალამაზეთ საძინებელი ალოე ვერას ქოთნითაც. გარდა იმისა, რომ ღამით ის ჟანგბადით მოგამარაგებთ და მშვიდად დაგაძინებთ, ალოე ვერას გელი სამედიცინო ან კოსმეტიკური მიზნებითაც გამოგადგებათ. 

ტოქსინებისგან საძინებლის ჰაერს კარგად წმენდს და ატენიანებს პალმა არეკა, რომელიც უფრო დიფსისის სახელითაა გავრცელებული. ამავე ფუნქციებს კარგად ასრულებს ქლოროფიტუმიც. თანაც, გაითვალისწინეთ, რომ ორივე მათგანი შინაურ ცხოველებთანაც კარგად მეგობრობს.

ღამის ჟანგბადის გამოყოფის განსაკუთრებული უნარი აქვს ორქიდეასაც: გამორჩეულ სილამაზესთან ერთად, ის ძალიან მარტივი მოსავლელიცაა, ამიტომ ოთახსაც დაგიმშვენებთ და ჰაერსაც გაგიჯანსაღებთ.

ბევრ თანამედროვე საძინებელში ხშირად ფიკუსსაც შეხვდებით. ღამით იგი არა მარტო ჟანგბადის წყაროა, არამედ  ჰაერს მავნე ნივთიერებებისგან ბუნებრივადაც ფილტრავს. გაითვალისწინეთ, რომ ფიკუსს სინათლე მოსწონს, ამიტომ ადგილიც შესაბამისი შეურჩიეთ. 

საძინებლისთვის კარგი არჩევანია ულამაზესი ფილოდენდრონი და მისი სახეობები, რომლებსაც ჰაერს მავნე ნივთიერებებისგან გაწმენდა შეუძლიათ, თუმცა ისინი შინაურ ცხოველებსა და ბავშვებს აუცილებლად მოარიდეთ. იგივე ფუნქციას შესანიშნავად ასრულებს ინგლისური სუროც, მაგრამ გაითვალისწინეთ, რომ თუ ალერგიული ხართ, სჯობს, მისგან თავი შეიკავოთ.

ღამით ჟანგბადს აქტიურად გამოყოფენ ბრომელიანდები და სუკულენტებიც, რომლებიც საძინებლისთვის შესანიშნავი არჩევანი იქნება. ძილის ხარისხის გაუმჯობესებისა და რელაქსაციისთვის კი ლავანდას, დაფნას, ოთახის ჟასმინსა და გარდენიას გირჩევდით.

ოთახის ჟანგბადით გამდიდრებისა და მავნე ნივთიერებებისგან გაწმენდისთვის კარგი არჩევანია ობობა მცენარე (ქლოროფიტუმი),  კაქტუსი, პერალგონია, სპატიფილუმი (მშვიდი ლილია), ნეფროლეპისი, კამელია,   გერანია, ჰერბერა, კალანხოე, ბეგონია, ეპიპრემნუმი, კროტონი და ყოჩივარდა. ყველა მათგანი ჟანგბადს სწორედ ღამით გამოყოფს და საძინებელს იდეალურად მიესადაგება.

ასე რომ, არჩევანი მართლაც დიდია. მთავარია, მცენარეების შეძენისას აუცილებლად იკითხოთ, შეიძლება თუ არა მისი საძინებელში დადგმა. გაითვალისწინეთ, რომ ზოგიერთმა მათგანმა უძილობა, თავის ტკივილი ან ინტოქსიკაციაც კი შეიძლება გამოიწვიოს. განსაკუთრებული ყურადღება კი მიაქციეთ იმ მცენარეებს, რომლებსაც ბავშვის ოთახისთვის შეარჩევთ, რადგან ამ შემთხვევაში კიდევ უფრო მეტი სიფრთხილის დაცვაა საჭირო. რა თქმა უნდა, არ დაგავიწყდეთ ტრადიციული კრიტერიუმებით — სინათლისა და ტენიანობის ხარისხით, ტემპერატურითა და მოვლის სირთულით დაინტერესებაც.

როგორც ხედავთ, საძინებლისთვის მცენარეების შერჩევა საკმაოდ საპასუხისმგებლოა, ამიტომ პროფესიონალის რეკომენდაციას დიდი მნიშვნელობა აქვს. გვესტუმრეთ დომინოს ბაღში და ყველაზე ოპტიმალური, საუკეთესო ვარიანტების შერჩევაში ჩვენს მებაღეებთან ერთად დაგეხმარებით.