წელიწადის ყველა დროს მცენარეების მოვლაში განსხვავებული წესები შემოაქვს და, რა თქმა უნდა, ამ მხრივ არც ზაფხულია გამონაკლისი. მაღალი ტემპერატურა და მზის გადაჭარბებული სიკაშკაშე ზოგჯერ მათ გამოუსწორებელ ზიანს აყენებს, ამიტომ თქვენგან განსაკუთრებულ ყურადღებას მოითხოვს.

სანამ ზაფხული ძალას იკრებს, გაეცანით ჩვენს ბლოგპოსტს მარტივი რეკომენდაციებით, რომელთა გათვალისწინებით თქვენს მცენარეებს სიხასხასის, სიმწვანისა და სიჯანსაღის შენარჩუნებაში დაეხმარებით.

სწორი მორწყვა

ზაფხულის სიცხეში, რა თქმა უნდა, მცენარეების მორწყვას განსაკუთრებული მნიშვნელობა აქვს. წელიწადის ამ დროს მიწა უფრო სწრაფად შრება, ამიტომ თუ თქვენს „მწვანე მეგობრებს“ წყალს მოაკლებთ, ზრდას შეაჩერებენ და შეიძლება, მათი გამოცოცხლებისთვის კიდევ უფრო დიდი ძალისხმევა დაგჭირდეთ.

ზაფხულობით უმჯობესია, მცენარეები საღამოს ან გამთენიისას მორწყოთ — ამ დროს ისინი მზის სხივებისგან შედარებით დაცულები არიან და არც წყალი აორთქლდება დიდი ინტენსივობით. თუმცა, განსაკუთრებულ სიცხეში, შესაძლოა, მორწყვისა და დანამვის სიხშირე გაზარდოთ. მნიშვნელოვანია ზომიერების დაცვაც, რადგან მათ არც ზედმეტი წყალი მოსწონთ. საუკეთესო და უტყუარი გამოსავალი მორწყვამდე მიწის შემოწმებაა: თუ ის დაახლოებით 1 სანტიმეტრზე ჯერ კიდევ ნამიანია, მაშინ მცენარეს წყალი არ სჭირდება. პატარა ქოთნის შემთხვევაში კი უმჯობესია, მისი ძირის სისველე შეამოწმოთ და მორწყვის საჭიროება ამის მიხედვით განსაზღვროთ. გაითვალისწინეთ, რომ ოთახის მცენარეებისთვის აუცილებლად ოთახის ტემპერატურის წყალია საჭირო.

გახსოვდეთ, რომ ისევე როგორც მოვლის ბევრი წესი, მორწყვაც ინდივიდუალურია. მაგალითად, კაქტუსებს, სუკულენტებს, ფიკუსს, მონსტერასა და ქრიზანთემას იმდენად ბევრი წყალი არ სჭირდება, როგორც , ბეგონიებსა და სხვა ნაზფოთლოვან ყვავილებს. ხშირი მორწყვა აუცილებელია ოთახის კალების, ვარდების, ჟასმინის, ორქიდეების, ფურისულასა და ციპერუსისთვის. სუროს, გვიმრასა და დრაცენას კი შესხურებაც ძალიან მოსწონთ, თუმცა ნუ დაუნამავთ ფოთლებს მცხუნვარე მზის ქვეშ, ასე შეიძლება მცენარე  დაწვათ. 

ადგილის სწორად შერჩევა

მზის პირდაპირი სხივები ბევრ მცენარეს აზიანებს. გახმობისგან რომ დაიცვათ, თქვენს „მწვანე მეგობრებს“ ზაფხულში ადგილი სწორად უნდა შეურჩიოთ. მოარიდეთ ისინი კაშკაშა მზეს, განსაკუთრებით შუადღისას, ან მოაწყვეთ ხელოვნური ჩრდილი ნაჭრით ან ბადით. თუმცა, არსებობს გამონაკლისებიც: მაგალითად, სუკულენტები და კაქტუსები, პალმები, გარდენიები, ჰიბისკუსები და ოლეანდრები მზის სხივების ქვეშ თავს მშვენივრად გრძნობენ.

გაითვალისწინეთ ისიც, რომ გახმობისგან დაცვა მცენარეების სიბნელეში დადგმას არ ნიშნავს. სიბნელემ ისეთივე ნეგატიური გავლენა შეიძლება იქონიოს ოთახების გამწვანებაზე, როგორც მზეზე დიდი ხნით დატოვებამ. რასაკვირველია, ამ შემთხვევაშიც მცენარის თავისებურებების გათვალისწინებაა საჭირო: მაგალითად, ბეგონიასა და კალანჰოეს აუცილებლად კაშკაშა სინათლე სჭირდებათ, გვიმრას კი ჩრდილი ურჩევნია.

მნიშვნელოვანია სათანადო ტემპერატურის შენარჩუნებაც. მცენარეთა უმეტესობისთვის ოპტიმალური მაჩვენებელი 18-24 გრადუსია, თუმცა ზოგს, მაგალითად, დრაცენას, აზალიას, ჟასმინს, ფურისულასა და იას შედარებით დაბალი ტემპერატურა მოსწონთ, კაქტუსებს, ფიკუსსა და ბარაქის ხეს კი — უფრო მაღალი.

და კიდევ ერთი რეკომენდაცია: ბევრ მცენარეს ორპირი არ სიამოვნებს და ოთახის განიავებისას მათ დიდხანს ქარში ნუ დატოვებთ.

კვება და სისუფთავე

მცენარეების სასუქით გამოკვება გაზაფხულიდან იწყება და, ბუნებრივია, ზაფხულშიც გრძელდება. თქვენს „მწვანე მეგობრებს“ წელიწადის ამ დროს საკვები თვეში 1-2-ჯერ დასჭირდებათ, თუმცა აუცილებელია, ზომიერება დაიცვათ და სასუქის რაოდენობა ოპტიმალურად შეარჩიოთ. გახსოვდეთ, პირველ ჯერზე დოზა მცირეა და ის თანდათან უნდა გაიზარდოს. ამასთან, ახალგადარგულ მცენარეს სასუქი არ სჭირდება, უხვად მოყვავილე კი პირიქით, უფრო მეტად უნდა გაამდიდროთ.

ზაფხულში განსაკუთრებით მნიშვნელოვანია მცენარეების სისუფთავეც: გაწმინდეთ და გააპრიალეთ ისინი ზომის მიუხედავად. ფოთლებზე არსებული მტვერი ფოტოსინთეზის პროცესს აფერხებს. თანაც, სისუფთავის დაცვა მცენარეებს გამოაცოცხლებს, სიხასხასესა და ბზინვარებას შემატებს.

მწერებისგან დაცვა

აბეზარი მწერები ზაფხულში მცენარეებისთვისაც საფრთხეს წარმოადგენენ. დაზიანება დროულად რომ აღმოაჩინოთ, თქვენს „მწვანე მეგობრებს“ ფოთლები სისტემატურად და გულდასმით გაუსინჯეთ. ფლორისტების რჩევით, მწერებისგან დაცვის ერთ-ერთი ხერხი სუფთა წყლის შესხურებაა, ამიტომ ნუ მოაკლებთ მათ დანამვას. 

თითოეულ მცენარეს წელიწადის ნებისმიერ დროს მაინც ინდივიდუალური მიდგომა და მოვლა სჭირდება. გვესტუმრეთ დომინოს ბაღში, აღმოაჩინეთ  თქვენი ახალი „მწვანე მეგობრები“ და მოისმინეთ დეტალური რეკომენდაციები ჩვენი მებაღეებისგან.