საძინებელი სახლის განსაკუთრებული სივრცეა — ის ერთდროულად მშვიდი, მყუდრო, კომფორტული და ფუნქციური უნდა იყოს, ამიტომ მისი დაგეგმვა არაერთი მნიშვნელოვანი დეტალის გათვალისწინებას მოითხოვს.

ამ ბლოგპოსტში ყველაზე პრაქტიკულ რეკომენდაციებსა და თანამედროვე ტრენდებს მოვუყარეთ თავი, ამიტომ თუ ამჟამად საძინებელს გეგმავთ ან მის გაახლებას აპირებთ, ჩვენი რჩევები ძალიან გამოგადგებათ.

სივრცის განსაზღვრა

საძინებლის დაგეგმვაც, სახლის სხვა ნაწილების მსგავსად,შესაბამისი ფართის გამოყოფით იწყება. გახსოვდეთ, რომ მისთვის მთლიანი სივრცის ყველაზე ნაკლებად ხმაურიანი ნაწილი უნდა შეარჩიოთ. გავრცელებული და გამოცდილი რეკომენდაციაა საძინებელში ხმის იზოლაციის გამოყენებაც, მით უმეტეს, თუ თქვენი კედელი მეზობლისას ესაზღვრება და მეტი შანსია, ხმაურმა შეგაწუხოთ.

ფართიდან გამომდინარე, შეგიძლიათ, საძინებლის ზონირებაც. მაგალითად, თუ შედარებით დიდი სივრცე გაქვთ და საგარდირობე ოთახი გსურთ, გამოყავით ის დეკორატიული ტიხრით. გასასრიალებელი ტიხრის გამოყენება კარგი ხერხია სააბაზანოს გასამიჯნადაც.

საძინებლის სივრცის გადანაწილების შესახებ დიზაინერები და ინტერიერის სპეციალისტების რამდენიმე გავრცელებულ შეცდომას აღნიშნავენ ხოლმე. მაგალითად, არ არის სწორი საძინებელში სამუშაო კუთხის ან წიგნების თაროს განთავსება. უმჯობესია, ეს ოთახი მხოლოდ რელაქსაციისთვის გამოიყენოთ, წიგნებისთვის კი სხვა ადგილი გამოყოთ, მით უმეტეს, რომ ალერგიული ადამიანებისთვის ისინი მართლაც საფრთხილოა.

განათება

საძინებლის მიახლოებითი გეგმარების ცოდნა რემონტის პირველივე ეტაპზეა საჭირო, რათა ელექტრობის გაყვანა მაქსიმალური სიზუსტით შესრულდეს. სწორედ ამიტომ, წინასწარ უნდა განსაზღვროთ, გჭირდებათ თუ არა საძინებელში ტელევიზორი, განათება საწოლის ტუმბოებთან, დამატებითი წერტილი სარკესთან და ა.შ.

ზოგადად, საძინებელი ის ადგილია, სადაც ყოველდღიურ ცხოვრებაში სხვადასხვა სიმძლავრის განათებაა აქტუალური. მაგალითად, მაკიაჟის პროცესში მეტი შუქი დაგჭირდებათ, ამიტომ შეგიძლიათ, ჭერში წერტილოვანი ნათურები გაითვალისწინოთ, სიმყუდროვის შესაქმნელად, შედარებით დაბალი სიმძლავრის ჭაღი ან კედლის ბრა გამოიყენოთ, საკითხავად — სანათები საწოლის ტუმბოებთან და ა.შ. საკმაოდ პოპულარულია საძინებელში საფარდე განათების გამოყენებაც, რომელიც ოთახის ატმოსფეროს განსაკუთრებულ განწყობას სძენს. გახსოვდეთ, რომ თუ საფარდე განათებას დააპირებთ, წინასწარ ჭერის ხელოსანიც გააფრთხილეთ, რათა მან LED ლენტისთვის „ჯიბე“ აუცილებლად გაითვალისწინოს.

ავეჯის განლაგება

საძინებელში მთავარი საწოლია, დანარჩენი ავეჯი კი — მეორეხარისხოვანი. შესაბამისად, ყველაფერი მისი მიხედვით უნდა განლაგდეს. არსებობს რამდენიმე წესი, რომლებიც საწოლისთვის ადგილის შერჩევისას უნდა გაითვალისწინოთ. განათავსეთ ის ისე, რომ თავით კედელს სრულად ებჯინებოდეს, სარკეში არ ირეკლებოდეს, ოთახის კარის შეღებისას მისი ბოლო ნაწილი პირდაპირ არ ჩანდეს, სიგრძეზე კი, ტუმბოების გასწვრივ, ორივე მხრიდან  თავისუფალი სივრცე ჰქონდეს. კიდევ ერთი დეტალი: უსაფრთხოებიდან გამომდინარე, არ შეიძლება საწოლის ფანჯარასთან დადგმა და მის უკან, კედელზე დიდი დეკორის, ნახატის ან სარკის დაკიდება.  

რაც შეეხება კარადებს, თუ საძინებელი პატარაა, უმჯობესია, არჩევანი მაღალ, ჭერამდე ასულ კარადაზე შეაჩეროთ. ისინი ვიზუალურად ფართსაც გაგიზრდიან და ბევრი სათავსოც გექნებათ. სხვათა შორის, სივრცის შენარჩუნებაში დაგეხმარებათ ნათელი ფერების გამოყენება და სარკე, რომელიც საძინებელში ისედაც დაგჭირდებათ. თუ ფართი პატარაა,  საწოლიც ოპტიმალური ზომის შეარჩიეთ. ასეთ დროს კარგი გადაწყვეტილებაა შედარებით დაბალი მოდელის და King-ის (180/200 სმ) ნაცვლად, Queen-ის (160/200 სმ) გამოყენება.

აუცილებლად გადაამოწმეთ, რამდენად შეუფერხებლად გაიღება არა მარტო კარადის, არამედ თავად ოთახში შესასვლელი და აივნის კარები. კარადის შემთხვევაში, ალტერნატივად და სივრცის დასაზოგად, გასასრიალებელი კარის დამონტაჟებაც შეგიძლიათ.

ავეჯის მასალას რაც შეეხება, მზა ან შეკვეთით დამზადებული MDF-ის გარდა, რომელიც კონკრეტულად თქვენს სივრცეს მოერგება, ბოლოს დროს ძალიან ტრენდულია ჭილოფის მასალის გამოყენება, რომელიც საძინებელს სიმსუბუქესა და სიმყუდროვეს შემატებს. ლოფტის სტილის დიზაინს კი შესანიშნავად მიესადაგება ლითონის საწოლი, რომელიც ასევე ერთ-ერთი ტრენდია.

ფერები და გამწვანება

საძინებელში უმეტესად პასტელური, მშვიდი ფერების გამოყენებაა გავრცელებული, თუმცა მიუხედავად იმისა, რომ ამ სივრცეში, ფუნქციიდან გამომდინარე, ძირითადად სისადავეს ირჩევენ, არ არის გამორიცხული კედლის განსხვავებული ან სულაც მკვეთრი ფერისა და კომპოზიციის დეკორის შერჩევა. რჩევა მუქი ტონების მოყვარულებისთვისაც: უმჯობესია, ისინი დეტალების სახით გამოიყენოთ და ღია ფერებს შეუხამოთ.

სივრცის გამრავალფეროვნება შეგიძლიათ გამწვანებითაც, მით უმეტეს, რომ ზოგიერთი მცენარე ღამის განმავლობაში ჟანგბადს გამოყოფს, ნახშირორჟანგს შთანთქავს, ჰაერს მავნე ნივთიერებებისგან ასუფთავებს და განსაკუთრებულად აჯანსაღებს. ამ მცენარეებს შორისაა, პალმა არეკა, ალოე ვერა, ორქიდეა, ფიკუსი, ქლოროფიტუმი და ა.შ. ძილის ხარისხის გაუმჯობესებაში კი ლავანდა, დაფნა, ოთახის ჟასმინი და გარდენია დაგეხმარებათ.

სხვათა შორის, რელაქსაციისა და კარგი ძილისთვის, გახსოვდეთ, რომ საძინებელში, სხვა ოთახებთან შედარებით, დაბალი ტემპერატურა უნდა იყოს, თუმცა თუ ცივი იატაკი, მაგალითად, ფილა გაქვთ, ხალიჩის დაგება, თუნდაც საწოლთან, აუცილებლად დაგჭირდებათ.

დაგეგმეთ საძინებელი და შემოგვიარეთ „დომინოში“ — მყუდრო და კომფორტული გარემოს შესაქმნელად, ჩვენთან ბევრ საინტერესო ნივთს აღმოაჩენთ.