აბაზანისა თუ სამზარეულოს ნიჟარა ის ნივთია, რომელსაც ყოველთვის დიდი ხნის პერსპექტივით ვყიდულობთ და გვინდა, რომ რაც შეიძლება ბევრი წლის განმავლობაში გამოვიყენოთ. თანაც, მას ერთდროულად რამდენიმე ფუნქციის შესრულება უწევს: საყოფაცხოვრებო დანიშნულებაც აქვს და ზოგჯერ ინტერიერის გამორჩეული ნაწილიცაა.

სწორედ ამიტომ, როდესაც ნიჟარას ვყიდულობთ, ხშირად მის გამძლეობასთან ერთად, ზომებს, ფორმებსა და მასალასაც ვითვალისწინებთ. ჩვენ ბლოგპოსტში სწორედ ამ კრიტერიუმებზე გიამბობთ და დაგეხმარებით, სასურველი, ოპტიმალური ნიჟარა მარტივად შეარჩიოთ.

საუკეთესო ადგილი ნიჟარისთვის

ნიჟარისთვის ადგილის შერჩევაზე მნიშვნელოვნადაა დამოკიდებული, თუ რა ზომის ან ფორმის უნდა იყოს თქვენთვის ოპტიმალური ნიჟარა. აბაზანის შემთხვევაში, სპეციალისტების რეკომენდაციით, ხელსაბანის საუკეთესო ადგილი ის კედელია, რომელიც შეღებისას ჩანს, რადგან, როგორც წესი, სარკეც ამ ნაწილშია განთავსებული და ყურადღებასაც მეტად იქცევს.

გაითვალისწინეთ, რომ ნებისმიერი ნიჟარის დამონტაჟებისას აუცილებელია დაიცვათ სიმაღლის პარამეტრი და ის 90 სმ-ზე დაბლა არ განათავსოთ. სწორედ ეს არის ყველაზე ოპტიმალური და კომფორტული პარამეტრი ადამიანებისთვის. 

რომელი დიზაინი და მასალა სჯობს
ნიჟარის ტიპები და ფორმები სხვადასხვაგვარია. შეგიძლიათ, შეარჩიოთ ინტეგრირებული, დასადგამი, ჩამოსაკიდი და საყრდენზე მდგომიც.

ყველა მათგანს საკუთარი ადგილი და ფუნქცია აქვს: ინტეგრირებული სივრცეს გიზოგავთ, ტრენდულია და დახვეწილი. ძალიან პოპულარულია დასადგამი ნიჟარებიც, რომლებიც ფერებითა და ფორმებით ხშირად აბაზანის საერთო დიზაინის გამორჩეული ელემენტიცაა. დამატებით ავეჯს არ საჭიროებს და სივრცის ოპტიმალური გადანაწილებისა და სადა სტილის ინტერიერისთვის კარგი არჩევანია ჩამოსაკიდი ნიჟარაც, თუმცა, ყველა მათგანი შედარებით ძვირადღირებულია. კვლავაც შეხვდებით საყრდენზე მგდომ ნიჟარებს, რომლებიც მოძველებულად მიიჩნევა და დიდ ადგილსაც იკავებს თუმცა, სამაგიეროდ, ბიუჯეტურია.

ფორმების თვალსაზრისით დღესდღეობით ბაზარზე საკმაოდ დიდი არჩევანია: მრგვალს შეიძენთ, ოთხკუთხედს თუ ოვალურს, თქვენს გემოვნებაზეა დამოკიდებული. თუმცა, ყურადღება მიაქციეთ, რომ, მაგალითად, აბაზანის, შხაპის, უნიტაზის, ონკანებისა და ა.შ. ფორმები ერთმანეთს ემთხვეოდეს. სპეციალისტების მხრიდან დამატებითი რეკომენდაცია ასეთია: ოთხკუთხედ ნიჟარას მაინც ოდნავ მეტი სივრცე სჭირდება, მრგვალი კი ნაკლებ ფართს წაიღებს, ამიტომ თუ მცირე სააბაზანო გაქვთ, უპირატესობა სწორედ ამ ფორმას მიანიჭეთ.

რა თქმა უნდა, ძალიან მნიშვნელოვანია ფერის შერჩევაც. ყველაზე პოპულარული მაინც თეთრეია, თუმცა ბოლო წლებში, რადგან ნიჟარამ დეკორის ფუნქციაც შეითავსა, სულ უფრო ხშირად გვხვდება ფერადი ან სხვადასხვა პრინტით გაფორმებული ნიჟარები. 

სამზარეულოს ნიჟარა - მნიშვნელოვანი არჩევანი

სამზარეულოს ნიჟარის შერჩევაც თავად სივრცის ზომაზე, ავეჯის განლაგებასა და, ბუნებრივია, თქვენს საჭიროებებზეა დამოკიდებული.

თუ ოჯახში ბევრი წევრია და სამზარეულოს ფართიც მათზეა გათვლილი, მაშინ უმჯობესია, არჩევანი ორგანყოფილებიან ნიჟარაზე გააკეთოთ. ის მართლაც ძალიან პრაქტიკული და კომფორტულია: განსაკუთრებით ჭურჭლის რეცხვის დროს: რეცხავთ ერთ განყოფილებაში, სუფთას კი მეორეში ალაგებთ.

თუ არც ისე დიდი სივრცე გაქვთ, მაშინ ერთგანყოფილებიანიც საკმარისი იქნება, რადგან ნიჟარის ზომა თავად სამზარეულოს ფართობის ადეკვატური იყოს. გახსოვდეთ, რომ ზომაზე მეტად, ამ შემთხვევაში ნიჟარის სიღრმეა გასათვალისწინებელი. აუცილებელია, ის მინიმუმ 15 სანტიმეტრის სიღრმის იყოს, რათა ჭურჭლის რეცხვისას წყალი მარტივად არ გადმოგესხათ.

სხვათა შორის, ნიჟარის ზომა შეგიძლიათ ფორმით დააბალანსოთ: მართკუთხა ან კვადრატული ფორმის ნიჟარები უფრო ტევადია, ვიდრე მრგვალი. ცხადია, სივრცეს ძალიან ზოგავს ინტეგრირებული, ზემოდან ჩადგმული ნიჟარა, რომელიც თანამედროვეცაა და პრაქტიკულიც. სხვათა შორის, უჟანგავი ფოლადის ბევრ ნიჟარას ამ მიზნით სპეციალური ფრთაც აქვს, თუმცა, სხვა შემთხვევაში შეგიძლიათ, შესაფერისი დიზაინის, დასაკეცი ჭურჭლის სადგამიც შეიძინოთ და საჭიროების დროს გამოიყენოთ.

სამზარეულოს ნიჟარებზე საუბრისას აუცილებლად უნდა გაითვალისწინოთ მასალაც. ზოგადად, ეს პროდუქტი ძირითადად უჟანგავი ფოლადისგან, კვარცისგან, კერამოგრანტისიგან ან ბუნებრივი ქვისგან მზადდება. უჟანგავი ფოლადი ძალიან გამძლე, ბიუჯეტური და მარტივად მოსავლელი მასალაა, თუმცა კვარცი და კერამოგრანიტი გაცილებით დახვეწილად გამოიყურება. თუმცა, თუ ქვის ნიჟარაზე გააკეთებთ არჩევანს, გახსოვდეთ, რომ ყოველთვის სჯობს, სიფრთხილე გამოიჩინოთ და ცხელი სითხის ჩასხმისას, ცივი წყალი აუცილებლად მოუშვათ, რათა ნიჟარა გაბზარვის რისკისგან დაიცვათ. განსაკუთრებულ ფრტხილ მოვლას საჭიროებს ბუნებრივი ქვაც, თუმცა გაცილებით ძვირადღირებული მასალაა. სამაგიეროდ, ის სამზარეულოს ზედაპირს ორგანულად ერწყმის და მისი შემადგენელი ნაწილი ხდება. 

რაც შეეხევა ფერებს, ბოლო წლებში ტრენდულია შავის გამოყენება, თუმცა გაითვალისწინეთ, რომ ეს ფერი მართლაც ძალიან ელეგანტურია, თუმცა მოსავლელად გაცილებით მეტ ენერგიას მოითხოვს. თუმცა, თუ მუქი ტონები მოგწონთ და ბინის საერთოდ დიზაინიც საშუალებას გაძლევთ, ნაცრისფერ ან რუხ ნიჟარას გირჩევდით: ეს ტონები ბევრ ინტერიერსაც უხდება და ყოველდღიურობაში კომფორტული გამოსაყენებელია. პოპულარობით სარგებლობს კრემისფერი და თეთრიც, რომელთა შეხამებაც ბინის საერთო დიზაინზე არც ისე რთულია.

არ გამოგრჩეთ ნიჟარისთვის ყველაზე ოპტიმალური ადგილის შერჩევაც. ის მაცივარსა და ქურასთან ერთად, სამზარეულოს „სამუშაო სამკუთხედის“ ერთ-ერთი ნაწილია, ამიტომ მნიშვნელოვანია მაქსიმალურად პრაქტიკული ადგილი შეურჩიოთ და სამივე ნაწილს მარტივად მისწვდეთ. გაითვალისწინეთ უსაფრთხოებაც და აუცილებელად დაიცავით დისტანცია ნიჟარას, მაცივარსა და ქურას შორის.