რატომ გვჭირდება ჰიდროიზოლაცია
რატომ გვჭირდება ჰიდროიზოლაცია
სახლის რემონტის დროს, როდესაც პირველ ეტაპზე ვართ და იმ საფეხურებში ვერკვევით, რომლებიც სამუშაოების დროს უნდა გავიაროთ, ხშირად გვიჩნდება კითხვა: გავაკეთოთ, თუ არა ჰიდროიზოლაცია. სამწუხაროდ, ზოგჯერ თავად ხელოსნებიც ამბობენ, რომ ეს ეტაპი დროისა და თანხის არარაციონალური ხარჯვაა, თუმცა სინამდვილეში რეალობა სხვაგვარია. ჰიდროიზოლაცია მართლაც გონივრული გადაწყვეტილებაა, რომელიც ბევრი სამომავლო რისკისგან გაზღვევთ და გეხმარებათ, რემონტმა დიდხანს გაძლოს.
ჩვენი ახალი ბლოგი სწორედ ამ თემაზეა - მოგიყვებით, რატომ გვჭირდება ჰიდროიზოლაცია და გაგიზიარებთ რჩევებს, რომლებიც ამ ტიპის სამუშაოების სწორად და საიმედოდ შესრულებაში დაგეხმარებათ.
რას ნიშნავს ჰიდროიზოლაცია
ჰიდროიზოლაცია, იგივე წყალგაუმტარობა, არის მასალა, რომელიც სახლის კედლებსა და იატაკს სისველისგან, ნესტისა და ობისგან იცავს, ქმნის ჯანსაღ საცხოვრებელ გარემოს, გაძლევთ გარანტიას, რომ მეზობელთან წყალი არ ჩავა და ზიანის ანაზღაურებისთვის გაუთვალისწინებელი ხარჯების გაღება არ მოგიწევთ.
შესაძლოა, რემონტის დროს მოისმინოთ, რომ ჰიდროიზოლაცია საჭირო არ არის, რადგან წებოცემენტი, ფილები და ფუგა წყალს ისედაც არ ატარებს. თუმცა, ეს შეხედულება დღეს უკვე მცდარ მოსაზრებად მიიჩნევა: ფუგა, რომელსაც ამჟამად სარემონტო სამუშაოებისას იყენებენ, გარკვეული რაოდენობის სისველის მიმართ სრულად მედეგი არ არის. თანაც, დროთა განმავლობაში ის მცირე ბზარებსაც იკეთებს, რაც წყალგაუმტარობასაც საფრთხეს უქმნის.
სად გავაკეთოთ ჰიდროიზოლაცია
რა თქმა უნდა, განსაკუთრებით იქ, სადაც წყალს იყენებთ: აბაზანაში, სამზარეულოს ნიჟარასთან და, ასევე, აივნის ფილების ქვეშ, მით უფრო მაშინ, როცა სივრცე ღიაა და ნალექის დროს იქ დიდი რაოდენობით წყალი შემოდის.
თუმცა, განსაკუთრებული ყურადღება, ცხადია, აბაზანას ექცევა. სპეციალისტების რეკომენდაციით, სასურველია, სახლის ამ ნაწილში ჰიდროიზოლაციით კედლები და იატაკი სრულად დაფაროთ, თუმცა არსებობს შედარებით ბიუჯეტური გადაწყვეტა, რომელიც მომხმარებლებს შორისაც მეტადაა გავრცელებული: მასალას იყენებთ მხოლოდ იქ, სადაც საშხაპეა ან აბაზანა დგას. რა თქმა უნდა, მნიშვნელოვანია იმ ზონების კედლებისა და იატაკის წყალგაუმტარობაც, სადაც ონკანები და მილები გადის, რათა დაზიანების ან სხვა გაუთვალისწინებელ შემთხვევაში, მინიმუმ წყლის მეზობელთან გაჟონვისგან დაიზღვიოთ თავი და თქვენი სარემონტო სამუშაოების ხარისხიც მაქსიმალურად დიდხანს შეინარჩუნოთ.
რემონტის რომელ ეტაპზე კეთდება ჰიდროიზოლაცია
ჰიდროიზოლაცია აუცილებლად უნდა გაკეთდეს კედლისა და იატაკის ფილების დაგებამდე, ზედმიწევნით მშრალ, სწორ და გლუვ ზედაპირზე, აუცილებლად ორ ფენად. განსაკუთრებით გასათვალისწინებელია გადაბმის ადგილები და კუთხეები — შედარებით სუსტი ადგილები, სადაც სპეციალისტები ჰიდროიზილაციის მასალასთან ერთად, შესაბამისი ლენტის გამოყენებასაც გვირჩევენ.
ძალიან მნიშვნელოვანია, ყურადღება მიაქციოთ, რომ ჰიდროიზოლაციის მასალა კარგი ხარისხის იყოს. შეეცადეთ, შეძენისას მაქსიმალურად დეტალურად გამოიკითხოთ მისი მახასიათებლები, გამოყენების სივრცეები და წესები. მომდევნო ეტაპზე კი თვალი ადევნოთ, რომ ხელოსანმა ზუსტად შეასრულოს სამუშაო და დეტალურად მიჰყვეს მწარმოებლის ინსტრუქციას: ზედმიწევნით დაიცვას ფენებს შორის შრობის ინტერვალი და დრო, რომლის შემდეგაც ფილის ან სხვა მასალის გამოყენებაა რეკომენდებული.
გახსოვდეთ, რომ არაერთი სპეციალისტის აზრით, ჰიდროიზოლაციის გამოყენების შედეგად გაცილებით დაცული ხართ. ამ სამუშაოებში ინვესტიცია ნამდვილად აგარიდებთ სამომავლოდ გაუთვალისწინებელ უსიამოვნებებსა და ხარჯებს. შესაბამისად, მისი გამოტოვება არა თანხის დაზოგვა, არამედ რისკია, რომელსაც გაწევაც არ ღირს.
ჰიპერმარკეტ „დომინოში“ ჰიდროიზოლაციის მაღალი ხარისხის პროდუქციის მრავალფეროვანი არჩევანი გვაქვს. ეწვიეთ თქვენთვის სასურველ ფილიალს და ჩვენი კონსულტანტები ოპტიმალური ბიუჯეტის ფარგლებში, ხელსაყრელი მასალების შერჩევაში კომპეტენტური რეკომენდაციებით დაგეხმარებიან.