გაზაფხული რემონტის აქტიური სეზონია. ბევრ ადამიანს კი ამ დროისთვის პირველი ეტაპები — გაყვანილობების დამონტაჟება და ფილების დაგება უკვე დასრულებულიც აქვს და ლესვისა და სამღებრო სამუშაოებისთვის ემზადება.

რემონტის ეს ნაწილიც განსაკუთრებულ პასუხისმგებლობას მოითხოვს, ამიტომ გადავწყვიტეთ, ახალი ბლოგპოსტი სწორედ სამღებრო სამუშაოებს მივუძღვნათ. მით უმეტეს, რომ ბოლო პერიოდში ერთი კედლის ან თუნდაც მისი მცირე ნაწილის საკუთარი ხელით შეღებვა ერთგვარ სიმბოლურ ტრენდადაც იქცა. ასე რომ, გაეცანით რეკომენდაციებს, რომლებიც დაგეხმარებათ, რემონტის ეს საფეხური მარტივად გაიაროთ და საუკეთესო შედეგიც მიიღოთ. 

ლესვა — კედლების შესაღებად მომზადების მნიშვნელოვანი ეტაპია

სანამ უშუალოდ შეღებვას დაიწყებდეთ, აუცილებელია, კედლები სათანადოდ მოამზადოთ: შელესოთ და ფითხით კარგად დაამუშაოთ. გაითვალისწინეთ, რომ ბოლო პერიოდში გაჯის გამოყენება ნაკლებად პოპულარულია, დიზაინერები და ხელოსნები კი რეკომენდაციას თაბაშირის ფუძეზე დამზადებული ბათქაშით ლესვას უწევენ.

მას შემდეგ, რაც შებათქაშებული კედელი კარგად გაშრება, ფითხით დამუშავების ეტაპი იწყება. როგორც წესი, მნიშვნელოვანია, რომ ფითხი 3-4 პირად იყოს წასმული, შუალედებში კი მაქსიმალურად დაიცვათ შრობის დრო. არ აჩქარდეთ, რათა საბოლოო შედეგით კმაყოფილი დარჩეთ. კედლების მაქსიმალური სიმყარის მისაღწევად და ბზარებისგან დასაცავად კი, შეგიძლიათ, ფითხამდე სპეციალური ბათქაშის ბადეც გამოიყენოთ.

ფითხით ლესვის შემდეგ კედლები აუცილებლად ზუმფარის ქაღალდით სუფთავდება, რაც  ზედაპირების მაქსიმალურ სიგლუვესა და საღებავის თანაბარ, ერთგვაროვან გადანაწილებას უზრუნველყოფს. 

სამუშაოები, რომლებიც ლესვის პარალელურად უნდა შესრულდეს

გაითვალისწინეთ, რომ ლესვის პარალელურად, შესაძლოა, სხვა სამუშაოების შესრულებაც იყოს საჭირო, მაგალითად, ელექტროგაყვანილობის. ზოგადად, ელექტროგაყვანილობა რამდენიმე საფეხურისგან შედგება და ერთ-ერთი მათგანი სწორედ ლესვის ეტაპს ემთხვევა.  წინასწარ შეუთანხმდით ელექტრობის ხელოსანს, რათა შებათქაშებამდე მან კაბელების კედლებში მონტაჟი დაასრულოს და მათი ხელახალი გათხრა არ დაგჭირდეთ. 

მხედველობიდან არ გამორჩეთ კარებიც. ბოლო პერიოდში განსაკუთრებით ტრენდულია ფარული კარების გამოყენება და თუ თქვენც არჩევანს ამ მოდელზე შეაჩერებთ, გაითვალისწინეთ, რომ ასეთი კარის ჩარჩო აუცილებლად ლესვამდე მონტაჟდება, საბოლოო სახეს კი ის ფითხით დამუშავების დროს იღებს. 

კიდევ ერთი რეკომენდაცია კუთხოვანას ეხება. თანამედროვე მიდგომებით, მათი გამოყენება მიზანშეწონილი უკვე აღარ არის, თუმცა ამის შესახებ ხელოსანი აუცილებლად წინასწარ გააფრთხილეთ და სთხოვეთ, კუთხეები მაქსიმალურად სწორად და სუფთად დაამუშაოს.

სამღებრო ქაღალდისა და საღებავის შერჩევა

საღებავის ფერი მთლიანად თქვენს გემოვნებასა და ბინის საერთო ინტერიერზეა დამოკიდებული, თუმცა კონკრეტული ოთახის ფუნქციონალიდან გამომდინარე, რამდენიმე ფაქტორი აუცილებლად უნდა გაითვალისწინოთ.

ნებისმიერი ტიპის საღებავამდე უმჯობესია, კედლებზე სამღებრო ქაღალდი გააკრათ. გარდა იმისა, რომ ის ზედაპირის ერთგვაროვნებას აუმჯობესებს, მას ბზარების გაჩენისგანაც იცავს. გახსოვდეთ, რომ ახალაშენებული კორპუსისა და მისი კედლების საბოლოო ფორმირებას რამდენიმე წელი სჭირდება, ამიტომ ამ პერიოდის განმავლობაში ბზარების გაჩენა არცთუ იშვიათია. სამღებრო ქაღალდი კი დაგეხმარებათ, ისინი ზედაპირზე არ გამოჩნდეს. სხვათა შორის, სამღებრო ქაღალდის გარდა, წლებია, ბაზარზე პოპულარობით სარგებლობს შესაღები შპალერებიც, რომლებიც ბზარებსაც მალავენ და ინტერიერს დამატებითი შტრიხებსაც მატებენ. 

რაც შეეხება უშუალოდ საღებავებს, უნდა ითქვას, რომ დღესდღეობით თანამედროვე მწარმოებლები მომხმარებლებს მართლაც განსაკუთრებულად მრავალფეროვან არჩევანს სთავაზობენ. მათ შორის საუკეთესო ეკოლოგიურად სუფთა, ანტიალერგიული პროდუქციაა, მით უმეტეს, თუ ალერგია მართლაც გაწუხებთ. კიდევ ერთი მთავარი ფაქტორი, რომელსაც საღებავის შერჩევისას უნდა მიაქციოთ ყურადღება, მოვლის სპეციფიკაა. რაც უფრო მარტივად იწმინდება ის, მით უფრო მოსახერხებელია ყოველდღიურობაში, განსაკუთრებით, როცა პატარა ბავშვები გყავთ.

პროდუქტის შერჩევის შემდეგ უშუალოდ ღებვის პროცესი იწყება. გახსოვდეთ, რომ სრულყოფილი ფერის მისაღებად, საღებავის მინიმუმ 2 ფენაა საჭირო და ამას თავად მწარმოებლების ინსტრუქციაც დაგიდასტურებთ. გაითვალისწინეთ, რომ, საუკეთესო შედეგისთვის, ამ შემთხვევაშიც ფენებს შორის შრობის ინტერვალების დაცვაა მნიშვნელოვანი.
კიდევ ერთი საგულისხმო რეკომენდაცია სივრცის ფუნქცია უკავშირდება. ბოლო წლებში საღებავის გამოყენება უკვე აბაზანაშიც აქტუალურია და მან ფილებიც კი ჩაანაცვლა. გაითვალისწინეთ, რომ ასეთ შემთხვევაში, აუცილებლად ნესტგამძლე პროდუქცია უნდა შეიძინოთ და კედლებიც შესაბამისად დაამუშაოთ. ცხადია, არ უნდა დაგავიწყდეთ ჰიდროიზოლაციის გამოყენებაც მინიმუმ იმ ადგილებში, რომლებსაც წყალი უშუალოდ ხვდება.

გაითვალისწინეთ მარაგები
შეეცადეთ სამღებრო მასალები, განსაკუთრებით ქაღალდი და თავად საღებავი ზედმეტობით შეიძინოთ. შესაძლოა, რემონტის პროცესში რომელიმე მათგანი დაგაკლდეთ და ბაზარზე ანალოგიურის პოვნა გაგიჭირდეთ.
ამას გარდა, არაერთი მომხმარებლის გამოცდილებამ აჩვენა, რომ ავეჯის მონტაჟის დროს შეღებილი კედლები ხშირად ზიანდება, ამიტომ ამ ხარვეზების გამოსასწორებლად საღებავის თუნდაც მცირე მარაგი აუცილებლად დაგჭირდებათ.
ზედმეტობით შეძენის გარდა, ჩაინიშნეთ ან დაიმახსოვრეთ საღებავების კოდები, რომლებსაც რემონტის დროს გამოიყენებთ. მათი დახმარებით, სამომავლოდ იმავე ფერის საღებავს მარტივად მიაგნებთ.

ცხადია, მასალების შერჩევისას, მნიშვნელოვანია, ისინი ხარისხიანი იყო, ამიტომ აუცილებელია, პროდუქციის შეძენისას არჩევანი საიმედო სივრცეზე გააკეთოთ. გვესტუმრეთ ჰიპერმარკეტ „დომინოში“, ჩვენთან სამღებრო მასალების ფასისა და ხარისხის საუკეთესო კომბინაციები და მრავალფეროვანი არჩევანი დაგხვდებათ.