შემოსასვლელი სახლის ერთ-ერთი განსაკუთრებული სივრცეა: სწორედ ის ქმნის პირველ, დაუვიწყარ შთაბეჭდილებას და თან ფუნქციურადაც დატვირთულია. შესაბამისად, მაქსიმალურად მოსახერხებელი, კომფორტული და ტრენდული შემოსასვლელის მოსაწყობად, არაერთი მნიშვნელოვანი ფაქტორის გათვალისწინებაა საჭირო. ჩვენს ახალ ბლოგპოსტში სწორედ ამ ფაქტორებზე ვისაუბრებთ და თანამედროვე დიზაინერების პრაქტიკულ რეკომენდაციებსაც გაგაცნობთ.

დაგეგმარება

ოპტიმალური შემოსასვლელის მოწყობა მთლიანი ფართის სწორად დაგეგმარების გარეშე რთულია. სხვადასხვა დანიშნულების ოთახების გადანაწილება და შიდა ტიხრების ეფექტიანი განლაგება ამ პროცესში მნიშვნელოვან როლს ასრულებს, განსაკუთრებით კი მაშინ, როცა შემოსასვლელის სივრცე არც ისე დიდია. შესაბამისად, თუ ტიხრები ბინაში მზად გხვდებათ, ეცადეთ, ისინი კრიტიკულად შეაფასოთ და თუ დაგჭირდებათ, შეცვალოთ კიდეც.

შემოსასვლელის ტიხრების შეფასებისას გაითვალისწინეთ, რომ იდეალურ შემთხვევაში ამ სივრცეში კარადა, ჩამოსაჯდომი და სარკე უნდა განთავსდეს. თუ არქიტექტორის სერვისით გისარგებლებთ, პროფესიონალი განლაგების სხვადასხვა ვერსიას თავადაც შემოგთავაზებთ, თუმცა, გარკვეული გადაწყვეტილებების მიღება დამოუკიდებლადაც შეგიძლიათ. მაგალითად, თუ შემოსასვლელის კედლები თუნდაც მცირე კარადის დამონტაჟების საშუალებას არ გაძლევთ, მაშინ რაღაც აუცილებლად უნდა გადააკეთოთ. მართალია, დანგრევა და ხელახალი აშენება დამატებით დროსა და ფინანსებთანაა დაკავშირებული, თუმცა, სამაგიეროდ, საბოლოო შედეგით ბევრად უფრო კმაყოფილი დარჩებით და არც დახარჯულ რესურსს ინანებთ.

ერთი პრაქტიკული რჩევაც, რომელიც შემოსასვლელის დაგეგმარებისას გამოგადგებათ: თუ ძალიან პატარა ფართი გაქვთ, შეგიძლიათ, გარე გაღების ლითონის კარი დაამონტაჟოთ და სივრცე ამგვარად დაზოგოთ.

განათება

შემოსასვლელში განსაკუთრებით საპასუხისმგებლო განათების დაგეგმვაა. როგორც წესი, სახლის ამ ნაწილში ბუნებრივი შუქი ყველაზე ნაკლებად აღწევს, ამიტომ შეეცადეთ, ელექტროგაყვანილობა თავიდანვე ისე დაამონტაჟოთ, რომ მან ოპტიმალური სინათლე უზრუნველყოს.

დიდი ზომის შემოსასვლელში ყველაფერი გაცილებით მარტივია, თუმცა პატარა ფართის შემთხვევაში, სჯობს, დიდი ზომის ჭაღებისა და კედლის ბრებისგან თავი შეიკავოთ, რათა გადაადგილება მაქსიმალურად მოსახერხებელი იყოს, სათანადო სინათლის უზრუნველყოფას კი ჭერის წერტილოვანი სანათებით გირჩევთ.

საუკეთესო შედეგისთვის კიდევ ერთი რეკომენდაცია კარადაში ლენტური განათების დამონტაჟებაა. შესაძლოა, თავდაპირველად ეს გადაწყვეტილება ზედმეტად და არცთუ საჭიროდ მოგეჩვენოთ, თუმცა არაერთი ადამიანის გამოცდილება ადასტურებს, რომ შემოსასვლელის კარადის განათება პრაქტიკაში მართლაც ძალიან მოსახერხებელია. 

ელექტროგაყვანილობაზე საუბრისას გაითვალისწინეთ კიდევ ერთი ფაქტორი: დენისა და სინათლის წყარო შემოსასვლელში რკინის კართან მაქსიმალურად ახლოს დაამონტაჟეთ, რათა შუქის ანთება ბინაში შესვლისთანავე შეძლოთ.

იატაკი

შემოსასვლელის იატაკი სახლის ერთ-ერთი ყველაზე დატვირთული ნაწილია. შესაბამისად, ის განსაკუთრებული სიფრთხილით უნდა შეირჩეს. შეეცადეთ, რაც შეიძლება გამძლე და მარტივად მოსავლელი მასალა გამოიყენოთ. უმჯობესი იქნება, თუ უპირატესობას მაღალი ხარისხისა და გლუვი ფაქტურის ფილას მიანიჭებთ, რომელიც წვიმიან ან თოვლიან ამინდში სახლში დაბრუნებისას არ გასრიალდება.

მნიშვნელოვანია ფერის შერჩევაც: მუქი ფერის საფარი, რომელსაც მცირე მტვერიც კი ეტყობა, ამ შემთხვევაში ნაკლებად გამოგადგებათ. შემოსასვლელისთვის უმჯობესია, ნაცრისფერი და ბეჟი ტონები გამოიყენოთ. კარგი გადაწყვეტილება იქნება ჭრელი ან ტერაცოს ფაქტურის ფილებიც, რომლებიც ახლა ძალიან ტრენდულია.  

ფერები

შემოსასვლელის კედლის ფერები, ბუნებრივია, სახლის ზოგად დიზაინს უნდა შეესაბამებოდეს, თუმცა, სპეციალისტები გვირჩევენ, რომ ამ შემთხვევაში უპირატესობა ღია ტონებს მივანიჭოთ. სწორად შერჩეულ განათებასთან ერთად, თეთრი და ბეჟი ფერები  შემოსასვლელში ოპტიმალურ, საუკეთესო სინათლეს ქმნის.

და თუ სტუდიოს ტიპის ბინა გაქვთ, შეეცადეთ, ამ სივრცის კედლები სამზარეულოს ან მისაღების იდენტური იყოს. ეს გადაწყვეტა ერთიან აღქმას შეუწყობს ხელს და ვიზუალურადაც ფართს უფრო გაზრდის.

ბოლო დროს ვიწრო შემოსასვლელებისთვის ძალიან ტრენდულია ლითონის კარისა და ჭერის კედლებისგან განსხვავებულ ფერში შეღებვა, რაც სივრცის ამ ნაწილებს დამატებით ხიბლს ანიჭებს და დიზაინის გამორჩეულ ელემენტებადაც აქცევს.

ავეჯი და დეკორი

შემოსასვლელი სივრცის განუყოფელი ნაწილი კარადაა, რომლის ზომაც, ცხადია, ფართზეა დამოკიდებული. თუმცა, არსებობს რეკომენდაციებიც, რომლებიც მის ოპტიმალურ შერჩევაში დაგეხმარებათ.

თუ ზოგადად ავეჯის დამზადებას გეგმავთ, შეეცადეთ, შემოსასვლელის კარადა სამზარეულოს ფერისა და ფაქტურის იდენტური იყოს. სივრცის მაქსიმალურად დაზოგვისთვის, უმჯობესია, თუ მისი ზომა — ჭერამდე, ფერი კი ღია იქნება. შეგიძლიათ, უარი თქვათ სახელურებზე და უპირატესობა „თაჩ“ საკეტებს მიანიჭოთ.

შემოსასვლელის კარადაში საკიდებისა და ფეხსაცმლის სათავსოები აუცილებელია, თუმცა თანამედროვე ტრენდის შესაბამისად, ბევრი მომხმარებელი მასში სარეცხის მანქანასაც ათავსებს. თუ თქვენც იმავეს გადაწყვეტთ, ჯერ სარეცხის მანქანა შეარჩიეთ, აუცილებლად ფიზიკურად გაზომეთ და შემდგომში კარადა მას მოარგეთ. საქმე იმაშია, რომ ონლაინ ან თავად მოწყობილობაზე დატანილი ზომა ზოგჯერ რეალურს არ ემთხვევა, ამიტომ უმჯობესია, თუ სარეცხის მანქანას ადგილზე, თავად გაზომავთ. კარადის დამზადებისას გაითვალისწინეთ ისიც, რომ მოწყობილობას გვერდებში რამდენიმე სანტიმეტრი თავისუფალი სივრცე უნდა დარჩეს. 

თუ დაგეტევათ, შემოსასვლელში აუცილებლად გამოყავით სივრცე ჩამოსაჯდომისთვისაც, რომელიც ფეხსაცმლის ჩაცმისას ძალიან მოსახერხებელია. ცხადია, შემოსასვლელში აუცილებლად დაგჭირდებათ სარკეც, რომელშიც თავიდან ბოლომდე, სრულად გამოჩნდებით.

თქვენს სურვილებსა და საჭიროებებზე მორგებული შემოსასვლელის მოსაწყობად „დომინოს“ ფილიალებში ყველაფერს აღმოაჩენთ. გვესტუმრეთ და ჩვენს კონსულტანტებთან ერთად საუკეთესო არჩევანს გააკეთებთ.