ლამაზი გამწვანება და ფერადი ყვავილები აივნისთვის საუკეთესო დეკორაციაა. მცენარეები აქ გატარებულ დროს, მართლაც, კიდევ უფრო სასიამოვნოს ხდიან, თუმცა, ამავდროულად, მათი შერჩევა ბევრი დეტალის გათვალისწინებასაც ითხოვს. მცენარეები კარგად უნდა ეგუებოდნენ კლიმატურ პირობებს, უძლებდნენ ამინდის ცვალებადობას და შესანიშნავ გარემოსა თუ განწყობას წელიწადის ნებისმიერ დროს გიქმნიდნენ. 

გაზაფხული ის დროა, როცა აივნის მოწყობა განსაკუთრებულად აქტუალური ხდება, ამიტომ ჩვენს ახალ ბლოგპოსტში იმ მცენარეებზე გიამბობთ, რომლებიც სწორედ გარე სივრცეს გაგილამაზებენ.

რა კრიტერიუმებით შევარჩიოთ მცენარეები

აივნისთვის მცენარეების შერჩევა უპირველესად თავად სივრცის შეფასებით იწყება. ჯერ აუცილებლად მდებარეობა უნდა განსაზღვროთ: მზიანია ის, ნახევრად მზიანი თუ ჩრდილიანი, რამდენად ხშირია ქარი, როგორია ფართი, სიმაღლე და ა.შ. მაგალითად, თუ პატარა აივანი გაქვთ, სჯობს, არჩევანი ხვიარა ან გადასაკიდებელ მცენარეებზე შეაჩეროთ, ან სულაც ქოთნებით კედლები გააფორმოთ. 

რაც შეეხება კონკრეტულ მცენარეებს, აივანს მართლაც ძალიან უხდება ვიოლები, რომლებიც ადრეული გაზაფხულიდან იწყებენ ყვავილობას და მარადმწვანე ჰებე. მას შესანიშნავი ყვავილებიც აქვს და საოცარი სილამაზის ბუჩქებსაც ქმნის. შეგიძლიათ, ამ ორი მცენარით ლამაზი კომპოზიცია ააწყოთ და თან იმედიანადაც იყოთ, რადგან ორივე მათგანი მზესაც, ნახევრად ჩრდილსაც და ქარსაც კარგად უძლებს. კარგი არჩევანია კესანე, ვერბენა, მაჩიდა, და გოდეცია.

არაპრეტენზიული, მარტივად მოსავლელი და ძალიან პოპულარულია მრავალფეროვანი პეტუნია და ჰიბისკუსი, რომელიც საკმაოდ მაღალი იზრდება. თუმცა, გაითვალისწინეთ, პეტუნია ყინვას ვერ უძლებს, მაგრამ ისეთი ლამაზია, რომ ადგილს თქვენს აივანზე აუცილებლად იმსახურებს.

კარგი არჩევანია გვირილები და გაზანიებიც, რომლებსაც მზე ძალიან უყვართ. მზეს კარგად იტანენ პელარგონია, იგივე ბალბა, აფრიკული გვირილა, ჯუჯა მიხაკი, გულყვითელა, ფლოქსი, გეორგინა, ასტრა და სურნელოვანი ბარდაც. არაჩვულებრივი გადაწყვეტილებაა ლავანდაც, რომელსაც შესანიშნავი სურნელი აქვს და ალისუმი, რომელიც თანაბრად ეგუება მზესაც და ჩრდილსაც. მზის მოყვარულთა შორის, ცხადია, არიან სუკულენტებიც, რომელთა ზოგი სახეობა ყინვასაც კარგად უძლებს. 

აივნისთვის კარგი მცენარეებია დეკორატიული კომბოსტო, ჰორტენზია, მარადმწვანე აკუბა და მრავალფეროვანი, ულამაზესი აზალია, თუმცა გაითვალისწინეთ, რომ მათ მწველი მზე არ უყვართ. 

ნახევრად მზიანი აივნებისთვის ვერბენასა და დეკორატიულ ან ჯუჯა ვარდებს გირჩევდით, რომლებიც აივნის გალამაზების ერთ-ერთ ყველაზე პოპულარულ ხერხად რჩება. თუ ნაკლებად მზიანი ან ზედმეტად ჩრდილიანი აივანი გაქვთ, იპატიენსი, ფერად-ფერადი ბეგონია და ფუკსია გამოგადგებათ. ყინვას კარგად უძლებენ კამელია და ყოჩივარდა, რომლებიც თავიანთი ყვავილებით ზამთარშიც გაგახარებენ. 

ხვიარა მცენარეები - ბუნებრივი და საუკეთესო გამწვანება

ხვიარა მცენარეებით არა მარტო გაამწვანებთ და გაახალისებთ აივანს, არამედ, მცირე დისტანციის შემთხვევაში, მეზობლებთან ერთგვარ ბუნებრივ კედელსაც შეიქმნით და თქვენს დასასვენებელ სივრცეს სიმყუდროვესაც შემატებთ.

დღესდღეობით თანამედროვე აივნებისთვის რამდენიმე პოპულარულ ხვიარა მცენარეს იყენებენ. მათ შორის, კლემატისს, ხვიარა ვარდსა და სუროს. თუმცა, გაითვალისწინეთ, რომ კლემატისს ნესტი არ უყვარს, ხვიარა ვარდებსა და სუროს კი მწველი მზე არ მოსწონთ. თანაც, სურო ტოქსიკური მცენარეა და ბავშვებსა და შინაურ ცხოველებს აუცილებლად უნდა მოარიდოთ. 

მზიანი აივნების შემთხვევაში, დედოფლის ყვავილი, აბილილი, ცხრატყავა, სურნელოვანი ბარდა ან ჩინური ლიმონური გამოგადგებათ. პოპულარულია კატაბარდაც, თუმცა ის ყინვას ნაკლებად უძლებს. ხვიარა მცენარეებს შორის კარგი არჩევანია ჟასმინი, რომლის ყვავილების სურნელი მწერებსაც აფრთხობს და მარტივად მოსავლელი, მზის მოყვარული გარდენია. 

თუ ჩრდილიანი აივანი გაქვთ, ამერიკულ უსურვაზსაც გირჩევდით, მით უმეტეს, რომ ის ქარსაც კარგად უძლებს. ყინვის მიმართ ამტანობით კი ბზა, კვიპაროსი და დეკორატიული ნაძვი გამოირჩევიან.

ქალაქური ბოსტანი  - ლამაზი, ტრენდული და პრაქტიკული გადაწყვეტილება

აივნის მცენარეებით გამწვანების ერთ-ერთი ყველაზე პოპულარული ტრენდი მცირე ბოსტნის მოწყობაა. გარდა იმისა, რომ ეს მცენარეები შესანიშნავი სურნელით გაგანებივრებენ, საკუთარი ხელით მოყვანილი, ჯანსაღი ბოსტნეულითა თუ მწვანილითაც მოგამარაგებენ. ქალაქური ბოსტნით საშუალება გექნებათ, მართლაც საუკეთესო კერძები მოამზადოთ, თავადაც ისიამოვნოთ და სხვებსაც გაუმასპინძლდეთ. 

თუ მზიანი აივანი გაქვთ, გირჩევთ, ის აუცილებლად გამოიყენოთ პესტოს ბუჩქის, როზმარინისა და რეჰანისთვის, ნაწილობრივ მზიანის შემთხვევაში კი უპირატესობა ქინძსა და ხახვს მიანიჭოთ. ძალიან კარგი გადაწყვეტილება იქნება ნაკლებად პრეტენზიული პიტნისა და ბაზილიკის მოყვანაც, რომლებსაც კულინარიაშიც შესანიშნავად გამოიყენებთ. 

აივნის ბოსტანს აუცილებლად დაამშვენებს ბულგარული წიწაკა, სალათის ფოთლები, მცირე ზომის პამიდორი და კიტრი. თუმცა, ბოსტნეულის გარდა, შეგიძლიათ, გარე სივრცე ციტრუსების ან თუნდაც ბროწეულისთვისაც გამოიყენოთ. 

და ბოლოს: გახსოვდეთ, რომ სასურველი და ლამაზი გამწვანება დროს, მცენარეებზე ზრუნვასა და ეტაპობრივ განახლებას მოითხოვს. თანაც, მათ შერჩევის შემდეგ მოვლაც შესაბამისი სჭირდებათ. თუმცა, დომინოს ბაღში ვიზიტი ამ ყველაფერს ძალიან გაგიმარტივებთ: ჩვენი მებაღეები თქვენი აივნის შესაბამის მცენარეებსაც შეგარჩევინებენ,  ქოთნებსაც და ბევრ სასარგებლო რეკომენდაციასაც მოგცემენ.