ბოლო წლებში მცირე ზომის საცხოვრებელი ფართები და სტუდიოს ტიპის ბინები განსაკუთრებით პოპულარულია. თუმცა, მათი შეძენისას ბევრი ჩვენგანი ოპტიმალურ გადანაწილებაზეც ფიქრობს: როგორ მოვაწყოთ სივრცე ისე, რომ ის ფუნქციურად მაქსიმალურად დაიტვირთოს, ზომაში კი არ შემცირდეს.

ამ მოთხოვნამ დიზაინსა და არქიტექტურაში ახალი ტრენდები მოიტანა. გაჩნდა არაერთი რეკომენდაცია, რომელიც გვეხმარება სახლის დაგეგმვისას ფართი არათუ დავკარგოთ, არამედ ვიზუალურად კიდევ უფრო გავზარდოთ. ჩვენს ახალ ბლოგპოსტში სწორედ ეს რეკომენდაციები გავაერთიანეთ.

დაგეგმარება

მცირე ზომის ფართის დაგეგმარება ყოველთვის გაცილებით მეტ ძალისხმევას მოითხოვს. რემონტის დაწყებამდე შეეცადეთ, პრაქტიკულად შეაფასოთ ბინაში არსებული განლაგება და ტიხრები. ზოგჯერ მათი შეცვლა სივრცეს არა მარტო გაზრდის, არამედ რეალურად კიდევ უფრო ფუნქციურს გახდის.

რასაკვირველია, ეს გადაწყვეტილება მეტ ძალისხმევასა და რესურსს მოითხოვს, თუმცა, საბოლოოდ, ნამდვილად კმაყოფილი დარჩებით. სხვათა შორის, ფართის ეკონომიისთვის თავდაპირველ განლაგებას ბევრი თანამედროვე დიზაინერი ცვლის, ამიტომ საწყის ეტაპზე თუნდაც მცირე კონსულტაციის პროფესიონალთან გავლას ნამდვილად გირჩევდით.

ჭერი და იატაკი
მაღალი ჭერის შენარჩუნება სივრცის გაზრდის ერთ-ერთი მნიშვნელოვანი ფაქტორია. ზოგადად, როცა ბინაში დაბალი ჭერია, სპეციალისტები უპირატესობას ბეტონის დატოვებასა და მის დამუშავებას ანიჭებენ. ეს ტრენდი თანამედროვე დიზაინში ძალიან პოპულარულია, ფართის შენარჩუნების კუთხით კი — საკმაოდ გამოცდილი. თუ ბეტონის ჭერი არ მოგწონთ, შეგიძლიათ, ფრანგული, გასაჭიმი ჭერი სცადოთ. გაითვალისწინეთ ისიც, რომ მისი პრიალა ფაქტურა ფართს კიდევ უფრო გაგიზრდით.

რაც შეეხება სხვა პოპულარულ გადაწყვეტებს, თაბაშირ-მუყაოსა და შეკიდულ ჭერს, დაბალჭერიან ბინებში ამ მასალების გამოყენებას არ გირჩევდით. მათი დამონტაჟებისას სივრცის სიმაღლეში მართლაც იკლებს.

რაც შეეხება იატაკს, თუ ბინაში ორი ფაქტურის საფარის, მაგალითად, ფილისა და პარკეტის ან ფილისა და ლამინატის გამოყენება გაქვთ გადაწყვეტილი, შეეცადეთ, მასალები დაახლოებით მსგავსი სისქის შეარჩიოთ. ამ შემთხვევაში სიმაღლის გათანაბრება და იატაკის ზედმეტად მოჭიმვა აღარ მოგიწევთ.

აბაზანა

მცირე ფართში კომფორტული აბაზანის მოწყობა განსაკუთრებით საპასუხისმგებლოა, ამიტომ ამ შემთხვევაში არაერთი დეტალის გათვალისწინებაა საჭირო.

დავიწყოთ ფილების შერჩევით: ასეთ დროს სპეციალისტები ერთმნიშვნელოვნად ღია ფერისა და თხელი ფაქტურის, პრიალა ფილებს უწევენ რეკომენდაციას. გაითვალისწინეთ მათი წყობაც: თუ ფილებს ჰორიზონტალურად განალაგებთ, ეს ფართს სიგანეში გაზრდის, ვერტიკალური კი — სიმაღლეში. ასე რომ, მისი შერჩევა თქვენს კონკრეტულ საჭიროებაზეა დამოკიდებული. 

რა თქმა უნდა, მცირე ზომის აბაზანაში შეკიდული უნიტაზის მონტაჟი აჯობებს. უკეთესი იქნება, თუ ცალკემდგომ აბაზანას ან საშხაპე კაბინაზე უარს იტყვით და მარტივ სისტემას აირჩევთ, რომელსაც დანარჩენი სივრცისგან შუშის მინიმალისტური ტიხრით გამოყოფთ.

კედლის ფერი

ფერები სივრცის გაზრდას მართლაც ძალიან ეხმარება. ცნობილია, რომ კედლების ღია და ცივ ტონებში გადაწყვეტა ფართს მეტად მოცულობითს ხდის. მნიშვნელობა არ აქვს, საფარისთვის საღებავს გამოიყენებთ თუ შპალერს, პატარა ზომის ბინისთვის უმჯობესია, არჩევანი სწორედ ასეთ ფერებზე შეაჩეროთ.

კიდევ უფრო მეტ ვიზუალურ ეფექტს მიიღებთ, თუ კედლებსა და ჭერს ერთ ტონში გადაწყვეტთ. ამას გარდა, უარს იტყვით ზედმეტი დეტალების, მაგალითად, მოლდინგების გამოყენებაზე, რომლებიც, მართალია, ტრენდულია, თუმცა სივრცეს ვიზუალურად ამცირებს.

კარები

პატარა ბინისთვის მნიშვნელოვანია შიდა კარების ოპტიმალური შერჩევაც. ასეთ შემთხვევაში მასიური, დიდი ზომის კარი ნამდვილად არ გამოგადგებათ. თუმცა, თანამედროვე მწარმოებლები მცირე სივრცისთვისაც არაერთ ტრენდულ გადაწყვეტას გვთავაზობენ: მაგალითად, გასასრიალებელ, დასაკეც ან ფარულ კარს, რომელიც კედელში მონტაჟდება, მისსავე ფერად იღებება და პრაქტიკულად არ ჩანს. 

განათება

თუ სივრცის გაზრდა გსურთ, დიდი ზომის, გრძელი ჭაღებისა და კედლის ბრების გამოყენებას არ გირჩევთ. პატარა ფართისთვის გაცილებით ხელსაყრელი ჭერში დასამონტაჟებელი განათებისა და თხელი, მინიმალისტური სანათების გამოყენებაა.

ავეჯი

მცირე ზომის ფართში ავეჯის სწორად გადანაწილებაც არანაკლებ საპასუხისმგებლოა, განსაკუთრებით სამზარეულოს შემთხვევაში. დიზაინერები გვირჩევენ, რომ კუნძულსა და ბარზე უარი ვთქვათ, არჩევანი კი მაქსიმალურად დახურულ, ღია ფერის, ჭერამდე ასულ კარადებზე შევაჩეროთ. სივრცის გაზრდისთვის კარგი გადაწყვეტილებაა ვერტიკალურად დაფრეზილი ფაქტურაც, რომელიც, ამავდროულად, ძალიან ტრენდულიცაა. გაითვალისწინეთ, რომ პატარა სამზარეულოსთვის ცალკემდგომის ნაცვლად, ჩასაშენებელი ტექნიკის გამოყენება სჯობს.

კიდევ ერთი რეკომენდაცია რბილ ავეჯს უკავშირდება: ტრადიციული სამეული ღია ფერის, დაბალი და მოცულობითი კუთხით ჩაანაცვლეთ, რომელიც ტევადიცაა და ფართსაც ზოგავს. რაც შეეხება საძინებელს, ამ შემთხვევაშიც უმჯობესია, კარადების სიმაღლე ჭერამდე იყოს, საწოლი კი —  სათავსოების გარეშე, მაქსიმალურად დაბალი და მინიმალისტური. სხვათა შორის, მცირე ზომის სივრცეს შესანიშნავად მიესადაგება ბოლო დროს პოპულარული რატანის მასალა, რომლისგან დამზადებული საწოლი თუ ტუმბოები თხელი, ჰაეროვანი და ძალიან დახვეწილია.

დეკორი

პატარა სივრცისთვის საუკეთესო დეკორი სარკეებია. დიდი სარკე ეფექტურ ვიზუალსაც ქმნის და დიდი ფართის შთაბეჭდილებასაც.

დეკორთან დაკავშირებით უნდა ვახსენოთ ფარდებიც. მცირე ბინისთვის იდეალური ღია ფერისა და მსუბუქი ქსოვილის ფარდებია: ისინი თქვენს სახლს ბუნებრივი შუქით აავსებს და ვიზუალურადაც გაზრდის.

სივრცის დაზოგვისთვის საჭირო მასალებსა თუ ნივთებს „დომინოში“ მრავლად იპოვით. გვესტუმრეთ და ჩვენი კონსულტანტების დახმარებით საუკეთესო გადაწყვეტილებებს მიიღებთ.