მასალების შერჩევა სარემონტო სამუშაოების განუყოფელი და მნიშვნელოვანი ნაწილია, თუმცა ამ პროცესშიც არსებობს განსაკუთრებით საყურადღებო პრიორიტეტები, მაგალითად, იატაკისა თუ კედლის მოსაპირკეთებელი ფილები, რომელთა ასორტიმენტიც თანამედროვე ბაზარზე მართლაც ძალიან მრავალფეროვანია.

თუმცა, მრავალფეროვნება ზოგჯერ არჩევანის გაკეთებასაც ართულებს, ამიტომ თუ  ფილების შეძენას აპირებთ, ჩვენი ახალი ბლოგპოსტი არ გამოგრჩეთ: გაეცანით რეკომენდაციებს, რომლებიც სასარგებლო მეგზურობასაც გაგიწევთ და რემონტის პროცესსაც გაგიმარტივებთ.

სად რა მასალისა და ფაქტურის ფილა დაგჭირდებათ

ფილების სახეები მათი მთავარი დანიშნულების მიხედვით რომ დავყოთ, ასეთ სურათს მივიღებთ: არსებობს კონკრეტულად იატაკის ფილები, კერამიკული, რომლებიც კედლებისთვისაა განკუთვნილი და უნივერსალური, რომელიც ორივე ტიპის ზედაპირზე იგება და კერამოგრანიტის სახელითაა ცნობილი. 

სანამ ფილებს შეიძენთ, სწორედ ის სივრცე უნდა განსაზღვროთ, სადაც მათ დაგებას აპირებთ და შესაბამისი მახასიათებლებიც გაითვალისწინოთ. მაგალითად, გარე სივრცეებისთვის — აივნებისა და ტერასებისთვის — აუცილებლად ყინვაგამძლე ფილა დაგჭირდებათ, სააბაზანოსა და სამზარეულოში სპეციალური საფარით, რომელიც მოცურების საწინააღმდეგო და უსაფრთხოა. გახსოვდეთ, რომ ფილა ტემპერატურის ცვლილებასა და ნესტს კარგად უნდა უძლებდეს. ამას გარდა, მდგრადი იყოს ქიმიური საწმენდი საშუალებების მიმართ, რომელთა გამოყენებაც დასუფთავების პროცესში აუცილებლად დაგჭირდებათ. 

ფაქტურა, ფერი და წყობა

ფილების ფაქტურა მთლიანად თქვენს გემოვნებაზეა დამოკიდებული, თუმცა გაითვალისწინეთ, რომ პრიალა, კაშკაშა ზედაპირები, რომლებიც სივრცეს ელვარებას აძლევს და ვიზუალურად ეფექტურია, სრიალებს, ამიტომ იატაკზე ისინი ნაკლებად გამოიყენება.

ბოლო წლებში პოპულარულია მქრქალი ან ნახევრად მქრქალი ფაქტურებიც, რომლებიც ინტერიერს დახვეწილად და მყუდროდ წარმოაჩენს. თანაც, სწორედ ამ ტიპის ზედაპირითაა დაფარული ძალიან ტრენდული ტერაცო და ბეტონის მსგავსი ფილები, რომლებიც ლოფტის ტიპის დიზაინში მართლაც შესანიშნავად გამოიყურება და ბევრი ადამიანის მოწონებასაც იმსახურებს. 

სპეციალისტები სასარგებლო რჩევებს ფერებსა და ფორმასთან დაკავშირებითაც გვაძლევენ: როგორც მთლიანად სახლის დიზაინის შექმნისას, ფილების შემთხვევაშიც ფერები, ძირითადად, ფართის ზომიდან გამომდინარე ირჩევა. თეთრი და კრემისფერი ტონები ყოველთვის ძალიან პოპულარულია: ისინი სივრცეს ვიზუალურად ზრდის, ანათებს და მოსავლელადაც მარტივია. ტრენდულია ხის ფაქტურის, ღია მწვანის, ცისფრის, ვარდისფრისა და ნაცრისფრის გამოყენებაც. ცხადია, თქვენი გემოვნებით, შეგიძლიათ, არჩევანი მუქი ფერებზე, ლურჯის ან თუნდაც შავზე შეაჩეროთ, თუმცა პრაქტიკაში ეს ტონები მოვლის დროს დიდ ძალისხმევას მოითხოვს, თანაც, პატარა ფართს ზომაში კიდევ უფრო ამცირებს და დამატებით განათებასაც საჭიროებს.

სივრცის აღქმაზე გავლენას ახდენს ფილების ზომა და წყობაც: დიდი ზომის, ვერტიკალურად განლაგებული, მართკუთხა ფილა მას გაცილებიც მეტ სიმაღლეს აძლევს, ჰორიზონტალურად განლაგებული კი — სიგანეს. თუმცა, ბოლო პერიოდის ტრენდი პატარა, მართკუთხა ან კვადრატული ფორმის მეტროს ტიპის ფილებია, რომლებიც მოდურიცაა და დახვეწილიც. მით უმეტეს, რომ დიზაინერები ხშირად ასეთ თეთრ ფილებს შავ ან ნაცრისფერ ფუგას უხამებენ და, მართლაც, ეფექტურ ვიზუალს იღებენ. სხვათა შორის, კლასიკური შავ-თეთრის გარდა, შეგიძლიათ, უფრო თამამი გადაწყვეტილებაც სცადოთ და ფილა წითელი ან ჟოლოსფერი ფუგით გააფორმოთ, კლასიკურის ნაცვლად კი, არასტანდარტული წყობა გამოიყენოთ ან თუნდაც დამატებით დეტალად დეკორატიული ან რელიეფური ფილა გამოიყენოთ. კარგად შერჩეული დეკორატიული ფილა სადად გაფორმებულ სივრცეს როგორც სააბაზანოში, ისე სამზარეულოში ნამდვილად მიმზიდველ შტრიხს შემატებს.

სპეციალისტების კიდევ ერთი რეკომენდაცია სხვადასხვა სივრცის ფილების შეხამებაზეა: თუ ფილა ერთი ოთახიდან მეორეში, ან, მაგალითად, აივანზე გრძელდება, სასურველია, ის ერთი ან მაქსიმალურად დაახლოებული ფაქტურის, ფერისა და წყობის იყოს. რაც შეეხება განსხვავებული მასალების — ფილისა და ლამინატის ან პარკეტის დაკავშირებას, ასეთ დროს უმჯობესია, გადაბმის ადგილებზე კორპის მასალა გამოიყენოთ. ის ყველაზე ნაკლებად შესამჩნევი და დახვეწილია.

ყველა ფილა წინასწარ შეათანხმეთ ხელოსანთან

ფილების შერჩევის შემდეგ მათი ფაქტურა, ვიზუალი, ფერი თუ წყობა აუცილებლად შეათანხმეთ ხელოსანთან. გაითვალისწინეთ, რომ პატარა ზომის ფილების დაგება, სამუშაოდან გამომდინარე, უფრო ძვირი ღირს. ძალიან მნიშვნელოვანია, წინასწარ განსაზღვროთ, ნამდვილად გამოვა თუ არა ამ ტიპის ფილების დაგება, მაგალითად 45 გრადუსით, კუთხოვანების გარეშე, რაც ახლა განსაკუთრებით ტრენდულია. ამ შემთხვევაშიც ხელოსნის ანაზღაურება იზრდება, რადგან შესრულებული სამუშაო არა კვადრატულობით, არამედ გრძივი მეტრობით ითვლება.

ფილები ხელოსანს აუცილებლად ზედმეტობით დაათვლევინეთ, რადგან შესაძლოა, მასალა რემონტის პროცესში დაგაკლდეთ ან დაგიზიანდეთ. აუცილებლად შეიძინეთ და შეინახეთ სათადარიგო ფილებიც. საქმე იმაშია, რომ წლებთან ერთად, ტრენდები იცვლება, ამიტომ მწარმოებლებიც ასორტიმენტს ახალი ტექნოლოგიებისა და მასალების მიხედვით აახლებენ და ძველ პროდუქციას აღარ წარმოებენ. დროთა განმავლობაში კი ფილის გამოცვლა რომ დაგჭირდეთ, ზუსტად იდენტურის პოვნა შესაძლოა, გაგიჭირდეთ.

და ბოლოს: ჰიპერმარკეტ „დომინოში“ ფილების კვირეული გვაქვს. შეგიძლიათ, გვესტუმროთ და თქვენთვის სასურველი სპეციალურ ფასად შეიძინოთ, ჩვენი კონსულტანტებისგან კი დამატებით, სასარგებლო რეკომენდაციებიც მიიღოთ.