საკმაოდ დიდი ხნის განმავლობაში რემონტისა და დიზაინის ტრენდი სააბაზანო ოთახში მხოლოდ საშხაპესა და მაქსიმალურ მინიმალიზმს მოიაზრებდა, ჩასაწოლი აბაზანის დამონტაჟება კი მოძველებულ ტენდენციებთან ასოცირდებოდა. თუმცა, ბოლო წლებია, ეს მიდგომა რადიკალურად შეიცვალა, თანამედროვე ადამიანის დატვირთულმა, აჩქარებულმა ცხოვრების რიტმმა კი სახლში მაქსიმალურად მეტი სარელაქსაციო შესაძლებლობის გამოყენება გახადა აქტუალური.

რა თქმა უნდა, აბაზანის შერჩევასა თუ მონტაჟსაც სჭირდება ცოდნა და ისეთი პრაქტიკული დეტალების გათვალისწინება, რომლებიც შემდგომში მის გამოყენებას მარტივს, მოსახერხებელსა და კომფორტულს გახდის. ჩვენს ახალ ბლოგპოსტში სწორედ ამ რეკომენდაციებს გაგაცნობთ.

წინასწარ გამოყავით შესაბამისი ფართი და ადგილი

თუ აბაზანის დამონტაჟებას აპირებთ, მაშინ რემონტის დაწყებამდე მისთვის სათანადო ზომის ფართი უნდა გამოყოთ. სივრცე ყველა ოთახში, მათ შორის აბაზანაშიც, ისე უნდა გადანაწილდეს, რომ გადაადგილების საშუალება არ შეიზღუდოს. კიდევ ერთი ფაქტორი აბაზანის ადგილია, რადგან დაგეგმარებისას მისი გათვალისწინებაც აუცილებელია. ზოგადად, მიღებულია, რომ აბაზანა შესასვლელი კარის შეღებისას პირდაპირ არ უნდა ჩანდეს და ის მარჯვენა ან მარცხენა მხარეს, შედარებით ნაკლებად თვალში საცემ სივრცეში უნდა განთავსდეს. შესაბამისად, გახსოვდეთ, რომ საჭიროა, ეს ნიუანსი არა მარტო აბაზანის, არამედ ზოგადად სანიტარული კვანძების გაყვანილობის მონტაჟის პროცესშივე გაითვალისწინოთ. 

ცალკემდგომი აბაზანა თუ ჩასაშენებელი?
რა თქმა უნდა, აბაზანის ზომის, ფორმისა და მასალის შერჩევა თქვენს სურვილსა და საჭიროებებზეა დამოკიდებული, თუმცა ამ შემთხვევაშიც მნიშვნელოვან როლს ფართი თამაშობს. ცალკემდგომი აბაზანა მეტ სივრცეს მოითხოვს, მით უმეტეს თუ ის კედელზე პირდაპირ არ მონტაჟდება. თუ არჩევანს ამგვარ მოდელზე შეაჩერებთ, გაითვალისწინეთ, რომ აბაზანას ირგვლივ აუცილებლად უნდა დარჩეს საკმარისი ფართი, სადაც გადაადგილებას თავისუფლად შეძლებთ.

თუმცა, არსებობს ერთგვარი შუალედური გამოსავალიც: შეგიძლიათ, აკრილის, თხელი, ჩასაშენებელი აბაზანა შეიძინოთ და კედლის ან იატაკის ფილის იდენტური ფერისა და ფაქტურის მასალით მოაპირკეთოთ. ამგვარად ის ინტერიერის ნაწილად იქცევა, დიზაინშიც ჰარმონიულად ჩაეწერება და ფართსაც ნაკლებად გადატვირთავს. 

გაითვალისწინეთ, რომ აბაზანა უნიტაზისა და ნიჟარის ფორმასა და ფერს აუცილებლად უნდა ეხამებოდეს. თანამედროვე მწარმოებლები ამ თვალსაზრისით მრავალფეროვან მოდელებს გთავაზობენ, ამიტომ მართკუთხედ, ოვალურ თუ ასიმეტრიულ აბაზანებს შორის სასურველ ფორმას მარტივად შეარჩევთ.

ხელოვნური ქვის აბაზანა - ეკოლოგიურად სუფთა და მარტივად მოსავლელი

სააბაზანო ის სივრცეა, სადაც ტემპერატურა ხშირად იცვლება, ამიტომ სანტექნიკისა თუ სარემონტო მასალების შერჩევისას მათ გამძლეობას განსაკუთრებული ყურადღება ექცევა. სწორედ ამ ფაქტორის გამო გახდა ტრენდული ცალკემდგომი აბაზანების დასამზადებლად ხელოვნური ქვის გამოყენება.

ხელოვნურ ქვას გლუვი და თანაბარი ზედაპირი აქვს, ეკოლოგიურად სუფთაა და, თანაც, მასზე მავნე მიკრობები არ ჩნდება. ამას გარდა, ამგვარი აბაზანა მოსავლელად საკმაოდ მარტივია და ჩვეულებრივი საყოფაცხოვრებო  საშუალებებით შესანიშნავად იწმინდება. ზოგიერთ მათგანს კი სპეციალური ანტიბაქტერიული საფარიც აქვს, რაც მოვლას კიდევ უფრო აიოლებს. 

ჰიდრომასაჟური აბაზანა - სპა და რელაქსაცია სახლში

თუ სპა და მასაჟი გიყვართ, თან შესაბამისი ფართიც გაქვთ გამოყოფილი, მაშინ ჰიდრომასაჟური აბაზანის დამონტაჟებას გირჩევდით. ამგვარი აბაზანები არა მხოლოდ ჰიგიენურ, არამედ გამაჯანსაღებელ ფუნქციებსაც ასრულებს. სპეციალური სისტემა, რომლითაც ისინია აღჭურვილი, ტემპერატურას აკონტროლებს და წყლის ნაკადს მასაჟის ეფექტს აძლევს.

ზოგადად ჰიდრომასაჟურ აბაზანების გამოყენება აუმჯობესებს გულის მუშაობასა და სისხლის მიმოქცევას, ამაღლებს ტონუსსა და შესანიშნავი საშუალებაა რელაქსაციისთვის. სხვათა შორის, სურვილის შემთხვევაში, მაშინაც თუ ძალიან დიდი ფართი არ გაქვთ, შეგიძლიათ, კუთხის ან კედლის ჰიდრომასაჟური აბაზანა შეარჩიოთ, სივრცეც დაზოგოთ და არც კომფორტზე თქვათ უარი. 

ჰიპერმარკეტ დომინოში სხვადასხვა საფასო სეგმენტის, მწარმოებლისა და მასალის აბაზანები და აქსესუარები დაგხვდებათ. ჩვენი კონსულტანტები კი დაგეხმარებიან, სასურველი მოდელი და მისი მახასიათებლები კონკრეტულად თქვენი სააბაზანოს მიხედვით შეარჩიოთ.