რემონტის ერთ-ერთი საყურადღებო ეტაპი ჭერის სამუშაოებია. პროფესიულად შესრულებული ჭერი უდიდეს როლს ასრულებს სივრცის საერთო აღქმასა და დიზაინში, უფრო მეტიც, ხშირად მას ინტერიერში დამატებითი, დახვეწილი შტრიხებიც შემოაქვს. როგორ შეარჩიოთ გამძლე, თქვენი ბინისთვის შესაფერისი მასალა, რისი გათვალისწინება გჭირდებათ ამ პროცესში და რომელი დეტალები არ უნდა გამოგრჩეთ ჭერის სამუშაოების დაგეგმვისა თუ შესრულებისას — ჩვენს ახალ ბლოგპოსტში სწორედ ამ თემებზე გიამბობთ.

ყველაფერი იწყება მასალით

ჭერისთვის მასალის შერჩევა რემონტის საწყის ეტაპზევე დაგჭირდებათ, ამიტომ დიზაინზე მუშაობისას უნდა ჩამოყალიბდეთ, რომელ ოთახში რას გამოიყენებთ. გახსოვდეთ, რომ არ არის აუცილებელი, ყველგან ერთნაირი ჭერი გქონდეთ. ყოველთვის შეგიძლიათ, ერთგვარი მიქსი შექმნათ. მაგალითად, მისაღებსა და სამზარეულოში ბეტონი დატოვოთ და ის დაამუშაოთ, სხვა სივრცეებში თაბაშირ-მუყაო გამოიყენოთ, ან სულაც არჩევანი გასაჭიმ ჭერზე შეაჩეროთ. ზოგადად, ახლა სწორედ ამ ტიპის მასალებია პოპულარული. ხშირად გვხვდება შეკიდული ჭერიც, რომელიც, ხელმისაწვდომი ფასისა და მრავალფეროვნების გამო, ბევრ მომხმარებელს იზიდავს.

ბეტონის ჭერი

ბოლო დროის ერთ-ერთი ყველაზე ტრენდული დიზაინერული გადაწყვეტილება ჭერზე ბეტონის დატოვებაა. თუმცა, ეს არ ნიშნავს, რომ ფილა პირვანდელი სახით, ხელუხლებელი რჩება. 

სინამდვილეში, ბეტონი საბოლოო სახის მიღებამდე გარკვეულ ეტაპებს გადის: ჯერ ზუმფარის ქაღალდით საგულდაგულოდ მუშავდება, რაც საკმაოდ რთული და მტვრიანი პროცესია, შემდეგ არაერთგვაროვანი და შელახული ფილები სპეციალური საღებავით იღებება, სულ ბოლოს კი მთლიანი ჭერი გლუვი ან პრიალა ლაქით მუშავდება.

ბეტონის ჭერზე მოთხოვნა გარკვეულწილად ლოფტის სტილის პოპულარობამაც გაზარდა, თუმცა ის ძალიან უხდება სიჭრელესაც, შესანიშნავად აბალანსებს მკვეთრ ფერებს და ფართს სიმაღლესაც უნარჩუნებს. გაითვალისწინეთ, რომ ჭერთან ერთად, იმავე პრინციპით რიგელების დამუშავება და დიზაინში დამატებითი შტრიხების შეტანაც შეგიძლიათ.

თაბაშირ-მუყაო

მარტივად დასამონტაჟებელი თაბაშირ-მუყაო ჭერის ყველა ბუნებრივ ნაკლს ფარავს, მათ შორის ელექტროსადენებსაც, კარგად იღებება, საკმაოდ გამძლეა, მოსავლელად კი — ძალიან მარტივი და წყლითაც შესანიშნავად იწმინდება. 

გაითვალისწინეთ, რომ ფილების დამონტაჟების შემდეგ სასურველია, ბზარებისგან დასაცავად, თაბაშირ-მუყაოზე ქაღალდი გააკრათ, ფითხით დაამუშაოთ და თქვენთვის მისაღებ ფრად მხოლოდ ამის შემდეგ შეღებოთ.

თუმცა, საგულისხმოა, რომ თაბაშირ-მუყაოს გამოყენება ჭერის სიმაღლეს ამცირებს, ამიტომ თუ შედარებით დაბალი სივრცე გაქვთ, უკეთესი იქნება, თუ არჩევანს სხვა მასალაზე შეაჩერებთ.

გასაჭიმი ჭერი

თაბაშირ-მუყაოსგან განსხვავებით, გასაჭიმი ჭერი, რომელსაც ბარისოლსაც უწოდებენ ხოლმე, შედარებით ნაკლებად ამცირებს სიმაღლეს და, ამავდროულად, ძალიან მოსახერხებელი და მარტივი მოსავლელია. იმ შემთხვევაშიც კი, თუ მეზობლის სახლიდან წყალი ჩამოგივათ, ის არ დაზიანდება, გარკვეული პერიოდის შემდეგ გაშრება და პირვანდელ სახეს ბუნებრივად დაუბრუნდება.

გაითვალისწინეთ, რომ არსებობს ორი ტიპის გასაჭიმი ჭერი: გლუვი და პრიალა. ორივეს საკუთარი დანიშნულება და უპირატესობა აქვს. თუ პრიალა ფართს ვიზუალურად ზრდის, გლუვი მას მეტ სიმყუდროვეს ანიჭებს, ამიტომ შერჩევა თქვენს სურვილებსა და საჭიროებებზეა დამოკიდებული.

სხვათა შორის, გასაჭიმი ჭერის არაერთი ფერის ვერსია არსებობს და უფრო მეტიც: შეგიძლიათ, მასზე სასურველი ფოტო ან ნახატიც კი გადაიტანოთ. თუმცა, გახსოვდეთ, რომ მასალას თხელი საფარი აქვს, შესაძლოა, ადვილად დაზიანდეს, ამიტომ გასაჭიმი ჭერის მონტაჟი განსაკუთრებულ პროფესიონალიზმს მოითხოვს, შემდგომი მოვლა კი — სიფრთხილეს.

შეკიდული ჭერი

შეკიდული ჭერი უპირველესად ხელმისაწვდომი ფასით, მდგრადობითა და ფერების მდიდარი პალიტრითაა მიმზიდველი. გაითვალისწინეთ, რომ ამ მასალის მონტაჟის დროს, რომელიც საკმაოდ შრომატევადი პროცესია, ფართის სიმაღლე იკლებს, ამიტომ დაბალჭერიან ბინებში მისი გამოყენება მაინცდამაინც მიზანშეწონილი არ არის. 

როგორი ჭერი სჯობს აბაზანაში

აბაზანაშიც შეგიძლიათ, სწორედ ისეთი ჭერის მასალა შეარჩიოთ, რასაც დანარჩენ ოთახებში გამოიყენებთ. მთავარია, გახსოვდეთ, რომ ამ შემთხვევაში აუცილებლად უნდა გაითვალისწინოთ სივრცის სპეციფიკა - ტემპერატურის ცვალებადობა, ტენიანობა და ა.შ. ძალიან გავრცელებულია აბაზანაში თაბაშირ-მუყაოს გამოყენება, თუმცა მისი შეძენისას აუცილებლად მოითხოვეთ ნესტგამძლე ფილა. სხვათა შორის, მას სხვა სივრცეებისთვის განკუთვნილი მასალისგან მკვეთრი, მწვანე ფერით მარტივად გამოარჩევთ.

არ გამოგრჩეთ განათება

ჭერის სამუშაოების დროს აუცილებლად გაითვალისწინეთ ელექტროგაყვანილობა და განათება. კარგი იქნება, თუ თავად ხელოსანსაც წინასწარ აჩვენებთ ნახაზს, რათა მას გარკვეული წარმოდგენა შეექმნას, როგორი განათება გსურთ და სად.

კიდევ ერთი მნიშვნელოვანი დეტალი: ბოლო პერიოდში ძალიან პოპულარულია ფარდის გაყოლებაზე წერტილოვანი, ლენტური განათების დამონტაჟება. აუცილებლად გააფრთხილეთ ხელოსანი, რომელიც სამუშაოებს ასრულებს, რომ ლენტისთვის „ჯიბე“ პირდაპირ ჭერში გამოიყვანოს და მისთვის დამატებითი კონსტრუქციის შექმნა არ გახდეს საჭირო. დააკავშირეთ ის ელექტრობის ხელოსანთან, რომელმაც განათებების მონტაჟის დაწყებამდე, ზუსტად უნდა იცოდეს, სად და რა პრინციპითაა შესრულებული ჭერის სამუშოები, რათა, მაგალითად, წერტილოვანი ნათურებისთვის ჭრების გაკეთება მარტივად შეძლოს.

ჭერის სამუშაოების დაგეგმვამდე ჰიპერმარკეტ „დომინოში“ შემოგვიარეთ. ჩვენი კონსულტანტები საუკეთესო რეკომენდაციებსაც მოგცემენ და ყველაზე ხარისხიან, თქვენს საჭიროებებზე მორგებულ მასალებსაც შეგარჩევინებენ.