წინსაფარი, ანუ სივრცე, რომელიც სამზარეულოს ზედა და ქვედა კარადებს შორის რჩება, რემონტის ერთ-ერთი განსაკუთრებული და საპასუხისმგებლო ნაწილია. მნიშვნელობა არ აქვს, როგორ განლაგებას ირჩევთ ან ე.წ. სამუშაო სამკუთხედს რა პრინციპით აწყობთ, მისი როლი ყოველთვის აქტუალურია.

ამ აქტუალობას განაპირობებს ის ფაქტიც, რომ ზოგჯერ წინსაფარს პრაქტიკულ დანიშნულებასთან ერთად, მთლიანი სივრცის დიზაინში გამორჩეული შტრიხებიც შემოაქვს. შესაბამისად, სამზარეულოს დაგეგმვისას მას ყოველთვის დიდი ყურადღება ექცევა.

წინსაფარი სხვადასხვა მასალისგან მზადდება, თუმცა ყველაზე პოპულარული მაინც ფილებია, ამიტომ ჩვენს ბლოგპოსტში სწორედ მათზე გიამბობთ. გაგაცნობთ რეკომენდაციებსაც, რომლებიც მისთვის განკუთვნილი ფილების შერჩევაში დაგეხმარებათ.

ხარისხი განსაკუთრებით მნიშვნელოვანია

რა თქმა უნდა, ნებისმიერი მასალის ხარისხი მნიშვნელოვანია, თუმცა წინსაფრის შემთხვევაში ფილა მართლაც განსაკუთრებული გამძლეობით უნდა გამოირჩეოდეს. საქმე იმაშია, რომ ამ ადგილს ცხიმის ლაქები, ორთქლი თუ სადილის მომზადებისას წარმოქმნილი შხეფები ყველაზე ხშირად ხვდება, ამიტომ მაღალ ტემპერატურას, მის ცვალებადობას, ტენიანობასა და ქიმიური საშუალებებით ხშირად წმენდას კარგად უნდა უძლებდეს. 

რომელი მასალა სჯობს

სამზარეულოს წინსაფრისთვის, როგორც წესი, კერამიკული ფილა ან კერამოგრანიტი გამოიყენება. ამჟამად მწარმოებლები მრავალფეროვან კერამიკულ ფილებს გვთავაზობენ, რომელთა განლაგებაც სასურველი წყობითა და ფორმით შეგიძლიათ. ბოლო პერიოდში სამზარეულოში განსაკუთრებით პოპულარულია მცირე ზომის კერამიკული, მათ შორის მეტროს ფილები, თუმცა გაითვალისწინეთ, რომ ასეთ მასალაზე მუშაობა, შედარებით მეტი სირთულის გამო, უფრო ძვირი ღირს. სამაგიეროდ, ისინი გამძლეა და თან ვიზუალურად სივრცის გაზრდაშიც გეხმარებათ: ვერტიკალური წყობა სამზარეულოს სიმაღლეს მატებს, ჰორიზონტალური კი — სიგანეს.

საკმაოდ გავრცელებული და ტრენდულია მდგრადობით გამორჩეული კერამოგრანიტიც. თანაც, მისი დაგება იატაკზეცაა შესაძლებელია. ამ თვისების გამო, დიზაინერები სამზარეულოში ხშირად წინსაფარსა და იატაკს ერთნაირი მასალით აფორმებენ ან მათ ერთმანეთთან ახამებენ. 

გასათვალისწინებელი ფაქტორია სამზარეულოს წინსაფრის სიმაღლეც, რომელიც, როგორც წესი, სტანდარტულად 60 სანტიმეტრია. თუმცა, ზოგჯერ ის 55-65 სანტიმეტრებს შორისაც შეიძლება იყოს. იმ შემთხვევაში კი, როცა ქურის ზემოთ კარადების განლაგებას არ აპირებთ, წინსაფრის სიმაღლის გაზრდა უპრობლემოდ შეგიძლიათ. რაც მთავარია, არ გამოგრჩეთ ერთი დეტალი: მისი ზომა აუცილებლად უნდა შეესაბამებოდეს გამწოვის მახასიათებლებსა და მოთხოვნებს, ამიტომ ტექნიკის მაღაზიაში, სასურველი მოდელის შერჩევისას, წინსაფრის სიმაღლის შეთანხმება არ დაგავიწყდეთ.

მქრქალი თუ პრიალა, მუქი თუ ნათელი

როგორც მომხმარებლების გამოცდილება აჩვენებს, სამზარეულოს წინსაფრისთვის მაინც მქრქალი და გლუვი ფილის გამოყენება სჯობს. მიზეზი მარტივია: ქურის სიახლოვეს განლაგებული საფარი ხშირად ისვრება, მქრქალი ზედაპირი კი გაცილებით ადვილად იწმინდება. ცხადია, პრიალა ძალიან ლამაზი და ეფექტურია, თუმცა მისი მოვლა  მეტ ძალისხმევასაც მოითხოვს. შეეცადეთ, არ გამოიყენოთ რელიეფური ფილებიც, რადგან ასეთ ზედაპირებში ლაქები კიდევ უფრო მყარად „ჯდება“.

რაც შეეხება ფერებს, მუქი ტონების ფილები, რა თქმა უნდა, ძალიან ელეგანტურად გამოიყურება, თუმცა ამ შემთხვევაშიც სირთულე მოვლას უკავშირდება. მაგალითად, შავ ზედაპირებზე, რომლებსაც ბევრი მომხმარებელი ირჩევს, მცირე ზომის ლაქაც კი ძალიან შესამჩნევია. ღია ტონის ფილები კი მოსავლელად ბევრად მარტივია. გაითვალისწინეთ ისიც, რომ თუ სამზარეულო პატარაა ან ბუნებრივი შუქი მას ნაკლებად ხვდება, ნათელი ფერები სივრცისა და განათების გაზრდაშიც დაგეხმარებათ.

წინსაფარი, როგორც დეკორი

სამზარეულოს დიზაინის ერთ-ერთი ტრენდი წინსაფრის ადგილას დეკორატიული ფილის გამოყენებაა. ერთფეროვანი, სადა ინტერიერის შემთხვევაში, ეს გადაწყვეტილება დაგეხმარებათ, თქვენი სახლის ერთ-ერთ ყველაზე პოპულარულ ნაწილს განსაკუთრებული და სახასიათო შტრიხი შემატოთ.

სხვათა შორის, მწარმოებლები სპეციალურად სამზარეულოსთვის განკუთვნილ დეკორებსაც გვთავაზობენ, რომლებსაც შესაბამისი დიზაინიც აქვთ. ამას გარდა, დეკორის ფუნქციას შესანიშნავად ითავსებს ფერადი ტერაცოც. ეს ფილა გამძლეცაა, ლამაზიც და მარტივად მოსავლელიც. 

კიდევ ერთი პოპულარული გადაწყვეტილება, რომელიც ქანთრის სტილის, მყუდრო სამზარეულოებს განსაკუთრებით უხდება, ღია ფერის მეტროს ფილებზე მუქი ან სულაც ფერადი ფუგის გამოყენებაა. ასეთი გაფორმება მარტივად შესასრულებელია და თან ძალიან ეფექტური.

და ბოლოს, სამზარეულოს წინსაფარი ფარული ლედ ნათებით აუცილებლად გააფორმეთ. გარდა იმისა, რომ პრაქტიკაში, კერძების მომზადებისას დამატებითი შუქი ძალიან მოსახერხებელი და კომფორტულია, წინსაფრის ფილებს ის განსაკუთრებით უხდება და, მართლაც, გამორჩეულ სიმყუდროვეს ქმნის.

ჰიპერმარკეტ დომინოში სამზარეულოს წინსაფრისთვის განკუთვნილი, მაღალი ხარისხის ფილების ფართო არჩევანი გვაქვს. სასურველი მასალის შეძენაში, ამ ბლოგპოსტის გარდა, ჩვენი კონსულტანტების კომპეტენტური რეკომენდაციებიც ძალიან დაგეხმარებათ.