განათება რემონტის ის ეტაპია, რომლითაც სახლი საბოლოო იერსახეს იღებს და სივრცის ერთიანი აღქმის საშუალებას გაძლევთ. კარგად ორგანიზებულ და სწორად დაგეგმილ განათებას შეუძლია, დიზაინი არა მარტო საუკეთესოდ წარმოაჩინოს, მას ორიგინალობა და მომხიბვლელობა შემატოს, არამედ ფუნქციურად კიდევ უფრო მოსახერხებელი, კომფორტული და ჯანსაღი გარემო შექმნას. შესაბამისად, ამ პროცესს განსაკუთრებული პასუხისმგებლობით უნდა მოეკიდოთ.

განათების დაგეგმვისას ერთ-ერთი ყველაზე აქტუალური კითხვები მისი ტიპების შერჩევას უკავშირდება ხოლმე. რომელი სჯობს — თბილი, ნეიტრალური თუ ცივი, როგორია ტრენდები და საუკეთესო პრაქტიკა — ჩვენს ახალ ბლოგპოსტში სწორედ ამ მნიშვნელოვან თემაზე გიამბობთ და სასარგებლო რეკომენდაციებსაც შემოგთავაზებთ.

როგორი განათების ტიპები არსებობს

დავიწყოთ განათების ტიპების გაცნობით. პირველი თბილი ანუ ყვითელია, მეორე —ნეიტრალური, დღის შუქის მსგავსი, მესამე კი — ცივი და მკაფიო, ცისფერი ტონით გაჯერებული. ყველა მათგანს საკუთარი დანიშნულება, ხიბლი და გამოყენების სპეციფიკა აქვს. თბილი განათება მეტ სიმყუდროვეს ქმნის, ნეიტრალური და ცივი კი — მაქსიმალურ სინათლეს. განათების ტიპი, ცხადია, თქვენს გემოვნებასა და საჭიროებებზეა დამოკიდებული, თუმცა მისი შერჩევისას მნიშვნელოვანია ჭერის სიმაღლის გათვალისწინებაც. მაგალითად, ნეიტრალური და ცივი ნათება მაღალჭერიან ბინაში უფრო მეტადაა რეკომენდებული: ასეთ დროს ის ეფექტურად იშლება, სათანადო შუქსაც უზრუნველყოფს და კომფორტსაც. 

თუმცა, მთავარი მაინც კონკრეტული სივრცის ფუნქციებია, ამიტომ სპეციალისტები გვირჩევენ, განათების ტიპის შერჩევისას სწორედ ამ კრიტერიუმით ვიხელმძღვანელოთ.

სხვათა შორის, შეგიძლიათ, სხვადასხვა სახის განათების კომბინაციებიც გამოიყენოთ და ისინი ოთახის კონკრეტული ნაწილის დანიშნულებას შეუხამოთ.

შემოსასვლელი

შემოსასვლელი სახლის ის ნაწილია, რომელსაც ბუნებრივი შუქი, როგორც წესი, ყველაზე ნაკლებად ხვდება, ამიტომ ამ სივრცეში ყველაზე ეფექტიანი და მოსახერხებელი ნეიტრალური განათების გამოყენება იქნება. კედლის ან ჭერის სანათების გარდა, გირჩევთ, შემოსასვლელ კარადაში ნეიტრალური LED ლენტებიც დაამონტაჟოთ. ამგვარი განათება არც ისე ძვირი ღირს, ყოველდღიურობაში კი მართლაც ძალიან კომფორტულია. 

სამზარეულო

სამზარეულო, მისი ფუნქციიდან გამომდინარე, აუცილებლად კარგად განათებული უნდა იყოს. მით უმეტეს, თუ ის სტუდიოს ტიპისაა და არც ფანჯარა აქვს. მკაფიო და ნათელი განათება სახლის ამ ნაწილში საკვების მომზადების თუ დალაგება-დასუფთავების პროცესში ძალიან დაგეხმარებათ.

როგორც წესი, სამზარეულოში ნეიტრალური განათებაა რეკომენდებული, თუმცა თუ ავეჯი შედარებით ცივ ტონებშია გადაწყვეტილია, შეგიძლიათ, მას ასევე ცივი განათება ეფექტურად შეუხამოთ.

შესანიშნავია შესაძლებლობა არსებობს სიმყუდროვის მოყვარულებისთვისაც: თუ სასადილო მაგიდის ზემოთ, ჭერში, ყვითელი განათებით სანათს ან ჭაღს დაამონტაჟებთ,  თბილ გარემოს ოთახის ამ კუთხეშიც მარტივად შექმნით. 

სამუშაო სივრცე

სამუშაო სივრცე ის ადგილია, სადაც სიმყუდროვე და განტვირთვა ნაკლებად გჭირდებათ. ამ შემთხვევაში საუკეთესო არჩევანი ნეიტრალური განათება იქნება, რომელიც ნამდვილად საქმიანი განწყობას შეგიქმნით.

აუცილებლად უნდა გაითვალისწინოთ ოფთალმოლოგების რეკომენდაციაც, რომლებიც სამუშაო სივრცეში სწორედ ნეიტრალურ განათებას გვირჩევენ. ის ყველაზე ბუნებრივია, არ ღლის და ძაბავს თვალს, შესაბამისად, თქვენი მხედველობისთვისაც ჯანსაღ გარემოს ქმნის. 

საძინებელი

საძინებელში, რომელიც დასვენების, განტვირთვისა და ჯანმრთელი ძილისთვისაა განკუთვნილი, საუკეთესო გადაწყვეტილება თბილი, მყუდრო განათების გამოყენებაა. თუმცა, ამ ოთახშიც არის კონკრეტული სივრცეები, სადაც ყოველდღიურობაში მეტი სიმძლავრის შუქი გჭირდებათ. მაგალითად, მაკიაჟის მაგიდა, სანათები საწოლთან, რომლებიც კითხვისთვის აუცილებელია და ა.შ. ამ შემთხვევაში შეგიძლიათ, ძირითად განათებად თბილი გამოიყენოთ, დამატებითი სინათლისთვის კი უპირატესობა  ნეიტრალურს მიანიჭოთ. ასეთი კომბინაცია ფუნქციურადაც ეფექტიანი იქნება და მოსახერხებელიც.

შემოსასვლელის მსგავსად, LED ლენტები ძალიან გამოგადგებათ საძინებლის კარადებშიც, რომლებიც მართლაც საუკეთესო კომფორტს შეგიქმნით. 

აბაზანა

აბაზანაში, მით უმეტეს მაშინ, როცა მას ფანჯარა არ აქვს, ყოველთვის კარგი განათებაა საჭირო. მაქსიმალური სინათლისთვის საუკეთესო გამოსავალი ამ შემთხვევაშიც ნეიტრალური ნათებაა, თუმცა თუ მაგალითად ჯაკუზიში დასვენება და რელაქსაცია მოგწონთ და უფრო მყუდრო გარემოს შექმნა გსურთ, სპეციალისტებს ეფექტური და თანაც ძალიან ტრენდული გადაწყვეტილება თქვენთვისაც აქვთ: დაამონტაჟეთ სარკესთან პატარა ჭაღი, რომელსაც თბილი ნათება ექნება და განტვირთვისას მისი შუქი   გამოიყენეთ.

და ბოლოს, აბაზანაში ძალიან ტრენდულია სარკეზე ნეიტრალური განათების დამონტაჟებაც, რომელიც მაკიაჟის გაკეთებისას მართლაც მოსახერხებელია. 

ჰიპერმარკეტ „დომინოში“ ყველა ტიპის განათების ფართო არჩევანი გვაქვს. გვესტუმრეთ და ჩვენი კონსულტანტების რეკომენდაციებით საუკეთესო გადაწყვეტილებას მიიღებთ.