ტემპერატურა მალე კიდევ უფრო დაიკლებს და ზაფხულში მივიწყებული გათბობის სისტემა კვლავაც აქტუალური გახდება. ამ სისტემის მთავარი ნაწილი კი ქვაბია — მოწყობილობა, რომლის შერჩევაც განსაკუთრებულ ყურადღებასა და მნიშვნელოვანი დეტალების ცოდნას მოითხოვს.

თუ სისტემას ახლა ამონტაჟებთ და გათბობის ქვაბის შეძენას გეგმავთ, ან სულაც შეცვლას აპირებთ, მაშინ ეს ბლოგპოსტი თქვენთვისაა. გაეცანით ჩვენს რჩევებს და გაიგეთ იმ ყველა კრიტერიუმის შესახებ, რომლებიც მის ეფექტიანად და მარტივად შერჩევაში დაგეხმარებათ.

ფუნქციონალი

ქვაბის შერჩევა იმ ფუნქციონალის განსაზღვრით იწყება, რომელიც მან უნდა შეასრულოს. როცა ქვაბი მხოლოდ გათბობის ან ცხელი წყლისთვის გსურთ, არჩევანი ერთკონტურიანზე უნდა შეაჩეროთ, ხოლო თუ მისი გამოყენება ორივე დანიშნულებით გინდათ, მაშინ აუცილებლად ორკონტურიანის შეძენა დაგჭირდებათ. გაითვალისწინეთ, რომ ეკონომიისა და ეფექტიანობის თვალსაზრისით, მომგებიანია კონდენსაციური ქვაბის შეძენა, რომელიც პერსპექტივაში კომუნალურ ხარჯებს მნიშვნელოვნად დაგიზოგავთ.

დამონტაჟების ადგილი

უმჯობესია, ქვაბის ადგილი ჯერ კიდევ სარემონტო სამუშაოების დაგეგმვისას შეარჩიოთ, თუმცა, ცხადია, არც შემდგომშია გვიანი. როგორც წესი, ამ დანიშნულებისთვის აივანი, ტერასა ან ეზოა საუკეთესო, მაგრამ გაითვალისწინეთ, რომ ასეთ დროს საჭიროა, ის სპეციალურ კარადაში მოათავსოთ ან შეფუთოთ, რათა ყინვისგან საიმედოდ დაიცვათ.

როცა ქვაბს გარეთ ამონტაჟებთ, შეგიძლიათ, ღია წვის კამერიანი მოწყობილობა შეარჩიოთ, თუმცა თუ მისი განთავსება შიდა სივრცეში გაქვთ გადაწყვეტილი, თქვენივე უსაფრთხოებისთვის აუცილებელია, ქვაბი დახურული წვის კამერით იყოს აღჭურვილი, რათა გამომუშავებული აირები და ნამწვი გარეთ გავიდეს.

თუ დასადგამ და კედლის ქვაბს შორის აკეთებთ არჩევანს, გაითვალისწინეთ, რომ დასადგამი, რომელსაც უმეტესად მაღალი სიმძლავრე აქვს, უმჯობესია, კერძო სახლში ან აგარაკზე, შედარებით დიდი ფართისთვის გამოიყენოთ, ბინებში კი მაინც კედლის ქვაბის დამონტაჟებაა რეკომენდებული. მას ნაკლები წონაც აქვს და მეტად დახვეწილი დიზაინიც.

სიმძლავრე

გათბობის ქვაბის სიმძლავრე იმ სივრცის ფართობზეა დამოკიდებული, სადაც მას ამონტაჟებთ. არსებობს სტანდარტებიც, რომელთა დახმარებითაც სასურველ მოწყობილობას მარტივად და ეფექტიანად შეარჩევთ. მაგალითად, 50-80 კვ/მეტრის ფართზე დაახლოებით 15-დან 18-კილოვატიანი ქვაბი დაგჭირდებათ, 80-100 კვ/მეტრზე — 20-კილოვატიანი, 100-120 კვ/მეტრზე —  24-კილოვატიანი და ა.შ. შესაბამისად, შეძენის დროს თქვენი სივრცის ფართობზე აუცილებლად გაამახვილეთ ყურადღება. თუ ნაკლები სიმძლავრის ქვაბს შეარჩევთ, ის საკმარის გათბობას ვერ უზრუნველყოფს და, საბოლოოდ, არაეფექტიანად იფუნქციონირებს. ზედმეტი სიმძლავრის ქვაბით სარგებლობის შემთხვევაში კი, გაზრდილ კომუნალურ გადასახადს ტყუილად გადაიხდით და ხარჯებს გაიზრდით.

ამას გარდა, მნიშვნელოვანია, წინასწარ განსაზღვროთ ბინაში ამონტაჟებთ ქვაბს თუ კერძო სახლში, როგორია ამ ბინის მდებარეობა და ფართში არსებული კარებისა თუ ფანჯრების რაოდენობა, რამდენად ენერგოეფექტური მასალითაა აშენებული თქვენი კედლები და თბება თუ არა მეზობელი ბინები. ქვაბის სასურველი სიმძლავრე ამ კრიტერიუმებითაც განისაზღვრება, ამიტომ მათი გათვალისწინება ნამდვილად ღირს.

ამავდროულად, გირჩევთ, გათბობის სისტემის დაგეგმვამდე თუ ქვაბის შეძენამდე სივრცე, სადაც მის დამონტაჟებას აპირებთ, აუცილებლად სპეციალისტს აჩვენოთ. ეს უსაფრთხოებისა და კომფორტის გარანტიასაც შეგიქმნით და შემდგომში გართულებებისა თუ დამატებით დანახარჯებისგანაც დაგიცავთ.

ჰიპერმარკეტ „დომინოში“ სხვადასხვა მწარმოებლის მაღალი ხარისხის ქვაბების მრავალფეროვანი არჩევანი გვაქვს. რა თქმა უნდა, ჩვენი კონსულტანტები თქვენთვის ოპტიმალური მოწყობილობის შერჩევაში აუცილებლად დაგეხმარებიან და სათანადო რეკომენდაციებსაც შემოგთავაზებენ.