მცენარეები თანამედროვე ინტერიერის განუყოფელი ნაწილია, ამიტომ რემონტის დასრულების შემდეგ სახლის მოწყობის მნიშვნელოვანი და საპასუხისმგებლო ეტაპი სწორედ მათი შერჩევაა. ლამაზი, მოხდენილი და სასარგებლო მცენარეები არა მარტო ხაზს უსვამენ დიზაინის ეფექტს, არამედ ბინაში ჰარმონიულ, მყუდრო და ჯანსაღ გარემოსაც ქმნიან. თანაც, მათი მოვლა ერთგვარი თერაპიაა და განწყობასაც ძალიან აუმჯობესებს.

თუმცა, თქვენი სახლის მწვანე მეგობრებით გაფორმებას გარკვეული ცოდნა ნამდვილად სჭირდება, განსაკუთრებით მაშინ, თუ დამწყები ხართ. ჩვენი ბლოგპოსტით დაგეხმარებით, თითოეული ოთახისთვის შესაფერისი მცენარე სწორად შეარჩიოთ და ის მის დანიშნულებას მაქსიმალურად მიუსადაგოთ.

სამზარეულო

სამზარეულოს, განსაკუთრებით კი ფანჯრებიანის, საუკეთესო დეკორი მცენარეებია. ალოეს კაქტუსებისა და სუკულენტების სხვადასხვა სახეობა რაფებს იდეალურად ესადაგება. თუმცა, ფანჯრების არქონის შემთხვევაშიც, საყვარელი მცენარეებისთვის დაკვირვებული თვალი ადგილს აუცილებლად იპოვის. განათავსეთ ისინი თაროებზე, სამზარეულოსა თუ ჭურჭლის სარეცხი მანქანის ზედაპირზე და შედეგით ნამდვილად კმაყოფილი დარჩებით.

რაც შეეხება მცენარეებს, სამზარეულოსთვის შესანიშნავი არჩევანი იქნება დიფენბახია, ფიკუსი, ტრადესკანცია, სტეფანოტის ფლორიბუნდა, სენტპაულია და დრაცენა, იგივე ბედნიერების ბამბუკი. ამას გარდა, როგორც ფლორისტები გვირჩევენ, სამზარეულოსთვის საუკეთესოა ის მცენარეებიც, რომლებიც კულინარიაშიც გამოიყენება. სცადეთ ორეგანო, პიტნა, ბაზილიკი და როზმარინი. მათ არა მარტო სივრცის გალამაზებისთვის, არამედ პრაქტიკული დანიშნულებითაც გამოიყენებთ.

მისაღები

გაითვალისწინეთ, რომ მისაღები ოთახი თამამი გადაწყვეტილებების მიღებისა და გიგანტური მცენარეების განთავსების საშუალებას გაძლევთ. ამ სივრცისთვის ფლორისტები რეკომენდაციას ძირითადად ალოკაზიას, ბანანის ხეს, ფიკუს ლირატას, მონსტერასა და სამოთხის ჩიტს ანუ სტრელიციას უწევენ. მისაღებისთვის კარგია კრასულაც, რომელიც ჩვენთან ბარაქის ხის სახელითაა ცნობილი. შეგიძლიათ, კრასულა  გამოსაჩენ ადგილას განათავსოთ, ირგვლივ კი დრაცენა ან ქლოროფიტიუმი შემოუწყოთ.

სამუშაო სივრცე

სამუშაო სივრცის საქმიან გარემოს მცენარეები განსაკუთრებულ სიმყუდროვეს ანიჭებს. ფლორისეტების რეკომენდაციით, ამ ოთახის გაფორმებას განსაკუთრებით მომცრო მცენარეები — კაქტუსები ან სუკულენტები შეესაბამება. მოსახერხებელი ზომის გამო, შეგიძლიათ, ისინი ნებისმიერ სასურველ ადგილას განათავსოთ და საჭიროების შემთხვევაში,  მდებარეობა მარტივად შეუცვალოთ.

სამუშაო სივრცისთვის კარგი არჩევანია სანსევიერაც, იგივე ვეფხვისტყავა, რომელიც ჟანგბადის გამოყოფასთან ერთად, სისხლის მიმოქცევას აუმჯობესებს, კონცენტრაციაში გეხმარებათ და დაღლილობას ხსნის. ამას გარდა, შეგიძლიათ, ფილოდენდრონი ან ეპიპრემნუმიც შეარჩიოთ, რომელიც შედარებით ადვილი მოსავლელია და განსაკუთრებით დამწყებებისთვის იქნება მოსახერხებელი.

საძინებელი

ოთახების მცენარეების შერჩევისას განსაკუთრებით საპასუხისმგებლო საძინებელია. ამ შემთხვევაში, გირჩევთ, არჩევანი ისეთ მცენარეებზე შეაჩეროთ, რომლებიც ღამით დიდი რაოდენობით ჟანგბადს გამოყოფენ, ჰაერში ტოქსინებსა თუ ქიმიურ ნივთიერებებს აქრობენ და ძილის ხარისხსაც აუმჯობესებენ. მათ შორისაა სანსევიერია ტრიფასიატა, სპატიფილიუმი (მშვიდი ლილია), ფალაენოფსისი, ლავანდა, ორქიდეები, ფილოდენდრონი, ბრომელიანდები, ალოე ვერა, ინგლისური სურო, გარდენია, ფიკუსი და უკვე კარგად ნაცნობი სუკულენტები.

სააბაზანოს მცენარეები

არ გაგიკვირდეთ, დიახ, თანამედროვე აბაზანა, დიზაინისა თუ სივრცის მასშტაბის მიუხედავად, შესანიშნავად ფორმდება მცენარეებით.

კუთხის თაროებსა და ხელსაბანის მაგიდას განსაკუთრებით უხდება ტენიანობისა და ტროპიკული გარემოს მოყვარული მცენარეები, მაგალითად, კალათეა, ჩინური მარადმწვანე, ლილია, ფილოდენდრონი, გვიმრა, აგლაონემა და ბამბუკი. კარგი არჩევანია პალმის ხეც, რომელიც გამწმენდი საშუალებებისგან გამოყოფილ ამიაკს შთანთქავს და ევროპული აივი, რომელიც ჰაერს ტოქსინებისა და მძიმე ლითონებისგან ათავისუფლებს.

გაითვალისწინეთ, რომ მცენარეების შერჩევისას შეგიძლიათ, თამამი გადაწყვეტილებები მიიღოთ, მხოლოდ ერთი სახეობით არ შემოიფარგლოთ, უპირატესობა მრავალფეროვნებას მიანიჭოთ და სახლი განსხვავებული ზომის, ფორმისა და ყვავილების ფერის მქონე მცენარეებით გააფორმოთ. თანამედროვე დიზაინის  ქოთნები, სადგამები თუ საკიდები საშუალებას გაძლევთ, ისინი ისე განალაგოთ, რომ სივრცე დამატებითი მომხიბვლელი დეკორაციებით შეივსოთ, მცენარეების სილამაზე კი კიდევ უფრო გამოკვეთოთ.

ამავდროულად, გახსოვდეთ, რომ ნებისმიერი ოთახისთვის მცენარეების შერჩევისას  რამდენიმე მნიშვნელოვანი ფაქტორის, მაგალითად, შინაური ცხოველებისა და ბავშვების, ტენისა და სინათლის ხარისხის გათვალისწინებაა აუცილებელი. მხედველობაში იქონიეთ ის დროც, რომელსაც სახლში ატარებთ. მაგალითად, თუ გამგზავრება ხშირად გიწევთ, სჯობს, არჩევანი მონსტერაზე, კაქტუსსა და სუკულენტებზე შეაჩეროთ — ისინი მოვლასა და ყურადღებას ნაკლებად მოითხოვს, ხოლო თუ ოთხფეხა მეგობრები ან ბავშვები გყავთ, ფოტოსს, ფილოდენდრონსა და სხვა ტოქსიკურ მცენარეებს მოერიდეთ. და, რა თქმა უნდა, გახსოვდეთ, რომ დომინოს ბაღში ყველაზე მრავალფეროვანი არჩევანი გელით. გაისეირნეთ, დაათვალიერეთ და რჩევები ჩვენს გამოცდილ მებაღეებსაც აუცილებლად ჰკითხეთ.