ჩვენს ბოლო ბლოგპოსტში გათბობის ქვაბის შესახებ გიამბეთ, თუმცა, ცხადია, მთლიანი სისტემა რადიატორების ფუნქციონირებასაც ითვალისწინებს. სწორედ ამიტომ, შესაძლოა, ახლა ბევრი თქვენგანი ქვაბთან ერთად, მათ შეძენასაც აპირებს და იმ კრიტერიუმებზე ფიქრობს, რომლებიც რადიატორების შერჩევის დროსაა გასათვალისწინებელი.

სექციური თუ პანელური, ან იქნებ დეკორატიული, რომელიც ოთახების ინტერიერის ეფექტურ ნაწილადაც იქცევა, რომელი მასალის, რამდენი და როგორი განლაგებით? — ეს ის აქტუალური კითხვებია, რომლებიც მომხმარებლებს რადიატორებთან დაკავშირებით აქვთ ხოლმე. გამოგვყევით და ამ თუ სხვა კითხვებზე პასუხს ჩვენს ახალ ბლოგპოსტში იპოვით.

 რადიატორების რაოდენობა და განლაგება

რადიატორების შერჩევა მათი განლაგების დაგეგმვით იწყება. მნიშვნელოვანია, სქემა ეფექტიანად შეადგინოთ, რათა ყველა ოთახში ოპტიმალური ტემპერატურა შეინარჩუნოთ და  სისტემა ეკონომიური დანახარჯებით გამოიყენოთ.  ამ შემთხვევაში სპეციალისტის რჩევა აუცილებლად დაგჭირდებათ, თუმცა გახსოვდეთ, რომ რადიატორების განლაგება და რაოდენობა რამდენიმე კრიტერიუმზეა დამოკიდებული. მათ შორის, სითბოს დანაკარგის რაოდენობაზე, შენობის ტიპზე, ბინისა თუ სახლის მდებარეობაზე, სართულზე, ოთახის ფართობზე, ჭერის სიმაღლეზე, კარისა და ფანჯრების რაოდენობაზე, კედლების სისქესა და იმ მასალაზე, რომლითაც ისინია აგებული.

გაითვალისწინეთ, რომ რადიატორების რაოდენობის დაბალანსება მათი ზომითაცაა შესაძლებელი. მაგალითად, თუ ოთახში, მოცულობიდან გამომდინარე, მხოლოდ ერთი რადიატორი ეტევა, სასურველი ტემპერატურისთვის, შეგიძლიათ, შედარებით მაღალი ზომის შეარჩიოთ და ოპტიმალური სითბო უზრუნველყოთ.

რადიატორების ტიპები

დღესდღეობით მწარმოებლები მომხმარებლებს ძირითადად სთავაზობენ სექციურ და პანელურ რადიატორებს, რომლებიც ვიზუალითა და კონსტრუქციით ერთმანეთისგან განსხვავდება. პანელურის შემთხვევაში ეს კონსტრუქცია მთლიანია, თუმცა ზომების არჩევანი იმდენად მრავალფეროვანია, რომ სასურველის შერჩევა ნამდვილად არ გაგიჭირდებათ. რაც შეეხება სექციურს, როგორც სახელწოდებიდანაც ჩანს, ის რამდენიმე სექციას აერთიანებს. მათ საბოლოო რაოდენობას კი თავად განსაზღვრავთ.

პანელურისა და სექციურის გარდა, ბოლო პერიოდში განსაკუთრებით პოპულარულია დეკორატიული რადიატორები, რომლებიც ბინის ინტერიერთან ფერითა თუ ფორმით ორგანულადაა შეხამებული. ისინი დიზაინს დამატებითი შტრიხებით ამრავალფეროვნებს, მას კიდევ უფრო მეტად დახვეწილსა თუ ორიგინალურს ხდის.

რადიატორების მასალა

რადიატორები ძირითადად ფოლადის, ალუმინის, თუჯისა და ბიმეტალის მასალისგან მზადდება. მათი შერჩევა კი ინდივიდუალური მახასიათებლებისა და თქვენი საჭიროებების მიხედვით შეგიძლიათ. 

მაგალითად, თუჯის რადიატორებს, რომლებსაც ძირითადად ძველ ბინებში შეხვდებით, ზოგი მომხმარებელი ამჟამადაც ირჩევს, თანაც, მას ინტერიერს ჰარმონიულად უხამებს. ზოგადად თუჯის რადიატორები სითბოს კარგად აფრქვევს და მას ხანგრძლივად ინარჩუნებს. ამას გარდა, ისინი მდგრადია კოროზიის მიმართ, გამძლეა და, ამავდროულად, შედარებით ხელმისაწვდომი ფასითაც გამოირჩევა. თუმცა, გაითვალისწინეთ, რომ ისინი დიდხანს ცხელდება, ტემპერატურას თანაბრად ვერ ანაწილებს და საკმაოდ მძიმეა, რაც დამონტაჟების პროცესს შედარებით ართულებს.

ალუმინის რადიატორების შემთხვევაში, წონა გაცილებით ნაკლებია, სითბოს გაცემის კოეფიციენტი  მაღალი, დიზაინი — უფრო თანამედროვე და დახვეწილი, ფასი —ხელმისაწვდომი, დამონტაჟება თუ დემონტაჟი კი — მარტივი. გაითვალისწინეთ, რომ თუ ალუმინის რადიატორებს შეარჩევთ, ისინი შედარებით ნაკლებად მდგრადია კოროზიის მიმართ და ზოგჯერ გამოყენებისას ჰაერის გამოდევნასაც საჭიროებს.

რაც შეეხება ბიმეტალის მასალას, ასეთი რადიატორები უფრო ძვირადღირებულია, მაგრამ გამოირჩევა გამძლეობით, დახვეწილი დიზაინით, ოპტიმალური წონითა და სითბოს გაცემით. თუმცა, ამავდროულად, ამ მასალის რადიატორებს სითბოს გამომუშავებისთვის მეტი ენერგია სჭირდება.

შედარებით ხელმისაწვდომი ფასით, საიმედოობით, მარტივი კონსტრუქციით, სითბოს გაცემის სისწრაფითა და მაღალი კოეფიციენტით ხასიათდება ფოლადის რადიატორები, რომლებიც ბინებისთვის ამჟამად ერთ-ერთი ყველაზე ოპტიმალური და პოპულარული არჩევანია.

რასაკვირველია, რადიატორების შეძენამდე მათი სქემის დაგეგმვა აუცილებლად სპეციალისტთან მოგიწევთ. სასურველი და ოპტიმალური პროდუქციის შერჩევაში კი ადგილზე უკვე  „დომინოს“ კომპეტენტური კონსულტანტები დაგეხმარებიან და თითოეული მათგანის შესახებ დეტალურ ინფორმაციასაც მოგაწვდიან.