იატაკის პლინტუსი ბინის ფუნქციური და, ამავდროულად, არც ისე მარტივად შესარჩევი ნაწილია. მან საფარსა და კედელს შორის არსებული ღარი ნაპრალების გარეშე უნდა დაფაროს და თან ინტერიერის დიზაინი კიდევ უფრო დახვეწილად წარმოაჩინოს. შესაბამისად, პლინტუსის სამუშაოს შესრულებაც ხელოსნისგან განსაკუთრებულ პროფესიონალიზმს მოითხოვს.

ნებისმიერ შემთხვევაში, თუ ახლა პლინტუსებს არჩევთ, გილოცავთ, რადგან ეს უკვე ნიშნავს, რომ რემონტის დიდი თუ არა, გარკვეული ნაწილი მაინც დასრულებული გაქვთ. თუმცა, პროცესი ბოლომდე გართულებების გარეშე რომ მიიყვანოთ, ჩვენს ბლოგპოსტს გაეცანით: რჩევები, რომლებსაც აქ წაიკითხავთ, დაგეხმარებათ, ოპტიმალური ვარიანტიც შეარჩიოთ და ისინი თქვენს დიზაინსაც ეფექტურად მოარგოთ.

რომელი მასალა და რატომ

დღესდღეობით ბაზარზე სხვადასხვა ფასისა და კატეგორიის მასალაა ხელმისაწვდომი, თუმცა, ძირითადად, მომხმარებლების არჩევანი ხეზე, მდფ-ზე, პლასტმასაზე, ალუმინსა და პოლიურეთანზე ჩერდება ხოლმე. 

სპეციალისტების რეკომენდაციით, უმჯობესია პლინტუსის მასალა მდგრადობის მიხედვით შეირჩეს, რადგან პლინტუსმა, განსაკუთრებით აივნის კართან, სისველეს, ნესტს, ტემპერატურის ცვალებადობას, მცირე მექანიკურ დარტყმას და ა.შ. უნდა გაუძლოს. სიმყარე მნიშვნელოვანია მაშინაც, როცა სახლში შინაური ცხოველი გყავთ, ამიტომ უმჯობესია, მთავარ კრიტერიუმად სწორედ გამძლეობა მოიაზროთ.

რაც შეეხება თავად მასალებს, პლასტმასის პლინტუსები ყველაზე ბიუჯეტური და მარტივი არჩევანია. დაახლოებით ამავე კატეგორიაში შეგვიძლია განვიხილოთ წყალგაუმტარი, PVC-სგან დამზადებული პლინტუსები, რომლებიც  ნაკაწრებისა და დაზიანებისგან მეტადაა დაცული. ორივე მათგანი დასამონტაჟებლად მარტივია, თუმცა, რასაკვირველია, გამძლეობით სხვა მასალებს ჩამორჩება.

მეტად მდგრადია წყალგამძლე პოლიურეთანის პლინტუსები და მდფ-ის მასალა, რომელიც მტვრისგან ჰერმეტულად დაცულიცაა, ეკოლოგიურიც და საშუალოდ ბიუჯეტურიც. განსაკუთრებული სიმტკიცით გამოირჩევა ალუმინი: სპეციალური ბარიერის დახმარებით, მისი გამოყენება ხანგრძლივადაა შესაძლებელი, თუმცა ამ მასალისგან დამზადებული პლინტუსი ბევრად ძვირადღირებულია. მაღალ საფასო კატეგორიაშია ხის მასალაც, რომელიც დაბალბიუჯეტიან პლინტუსებთან შედარებით, ეკოლოგიურად სუფთაცაა და გამძლეც. 

როგორ შევარჩიოთ ფერი და სიმაღლე

რა თქმა უნდა, პლინტუსის ვიზუალი სახლის მთლიან ინტერიერს უნდა ეხამებოდეს და მის დიზაინს დასრულებულ იერს აძლევდეს. თუმცა, მაინც არსებობს გარკვეული კრიტერიუმები, რომლებიც ფერისა და სიმაღლის შერჩევაში დაგეხმარებათ.

როგორც წესი, პლინტუსის ფერი იატაკის, კედლისა და შიდა კარის მიხედვით ირჩევა. გაითვალისწინეთ, რომ თუ ვიწრო სივრცე გაქვთ, უმჯობესია პლინტუსი იატაკის ფერში შეარჩიოთ, რადგან ასე ფართს ვიზუალურად მეტად გაზრდით, კედლის ტონის გამოყენება კი სიმაღლეს შეგინარჩუნებთ, ამიტომ დაბალჭერიანი სივრცისთვის სწორედ  ამგვარ გადაწყვეტას გირჩევთ. 

პლინტუსები სხვადასხვა ფერში მზა სახითაც ხელმისაწვდომია, თუმცა სასურველი ტონის მიღება სირთულეს უკვე აღარ წარმოადგენს. მაგალითად, პოლიურეთანის ან მდფ-ის პლინტუსი ნებისმიერ ფერში შეგიძლიათ შეღებოთ. უფრო მეტიც: მდფ-ის შემთხვევაში სასურველია, პლინტუსი სპეციალური გრუნტით დაამუშაოთ და კედლისავე საღებავი გამოიყენოთ, რათა ზუსტად იდენტური ფერები მიიღოთ. რაც შეეხება პლინტუსის ზომას, ამ შემთხვევაშიც უმჯობესია, გადაწყვეტილება ფართის მიხედვით მიიღოთ. დაბალი, 10 სანტიმეტრამდე ზომის პლინტუსი სივრცეს მაქსიმალურად შეგინარჩუნებთ, თუმცა მაღალჭერიან ბინაში შედარებით დიდი პლინტუსების დამონტაჟებაც შეგიძლიათ, მით უფრო თუ მას განსხვავებულ ფერში შეღებავთ და დიზაინის ორიგინალურ ელემენტად აქცევთ. ის, რაც აუცილებლად უნდა გაითვალისწინოთ: პლინტუსი იატაკსა და კედელს ხარვეზების გარეშე რომ მოერგოს, აუცილებელია, ორივე მათგანი მაქსიმალურად სწორი იყოს. ნებისმიერ შემთხვევაში, გირჩევთ, ადგილი, სადაც პლინტუსები უნდა დამონტაჟდეს, ხელოსანს წინასწარ აჩვენოთ. სამწუხაროდ, ზოგჯერ პროფესიონალიზმის ნაკლებობის გამო, შესრულებული სამუშაო ხარისხით არ გამოირჩევა, ხელოსანი კი შედეგს კედლის ან იატაკის დეფექტს აბრალებს. შესაბამისად, სჯობს, ყველაფერი პროცესის დაწყებამდე შეათანხმოთ.

თუ პლინტუსის შეღებვას გადაწყვეტთ, საღებავი აუცილებლად ზედმეტობით შეიძინეთ. პლინტუსი ის ადგილია, რომელიც შეიძლება თუნდაც დალაგებისას, შედარებით მარტივად შეილახოს ან დაზიანდეს. მით უფრო, როცა ის ღია ფერისაა. საღებავით მის გამოსწორებას ყველაზე მარტივად შეძლებთ, თუმცა გარკვეული დროის შემდეგ, შესაძლოა, იდენტური ტონის მოძიება გაგიჭირდეთ, ამიტომ სჯობს, მცირე რაოდენობა მაინც წინასწარ მოიმარაგოთ.

ჰიპერმარკეტ „დომინოს“ ორივე ფილიალში სხვადასხვა კატეგორიის პლინტუსებიაწარმოდგენილი. ჩვენი კონსულტანტები დაგეხმარებიან, ფასის, ხარისხის, ფერისა თუ სხვა მახასიათებლების მიხედვით სასურველი პროდუქცია შეარჩიოთ და ის თქვენი ბინის დიზაინს ორგანულად შეუხამოთ.