როგორ შევარჩიოთ უნიტაზი - რჩევები და ტენდენციები

ბინის რემონტის ერთ-ერთი საპასუხისმგებლო ნაწილი აბაზანა-საპირფარეშოს ოპტიმალური დაგეგმვა და მოწყობაა. სხვადასხვა ნივთის შერჩევასთან ერთად, ამ დროს ადამიანები განსაკუთრებულ ყურადღებას უნიტაზს ვუთმობთ, რადგან ის სასურველ ვიზუალთან ერთად, ბევრ პრაქტიკულ კრიტერიუმსაც უნდა აკმაყოფილებდეს.

უნიტაზის შერჩევის პროცესს ჩვენი ბლოგპოსტი გაგიმარტივებთ — რეკომენდაციები, რომლებსაც თავი ერთად მოვუყარეთ, ოპტიმალური და სწორი გადაწყვეტილების მიღებაში აუცილებლად დაგეხმარებათ.

წინასწარ შეაფასეთ სივრცე, სადაც უნიტაზი უნდა დამონტაჟდეს

უნიტაზის შერჩევის პირველ ეტაპზე აუცილებლად მთლიანი სივრცის ფართობი და სანიტარული კვანძების განლაგება უნდა განსაზღვროთ. მნიშვნელობა არ აქვს, მის დამონტაჟებას შერეულ აბაზანაში აპირებთ, თუ საპირფარეშოში, მცირე ფართის შემთხვევაში, უპირატესობა დასაკიდ უნიტაზს მიანიჭეთ, დიდ სივრცეში კი დასადგამის გამოყენებაც შეგიძლიათ.

უნიტაზის ადგილი სანტექნიკოსთან წინასწარი კონსულტაციით განსაზღვრეთ და აუცილებლად გაითვალისწინეთ, რომ ცენტრალური საკანალიზაციო მილდგარისგან მისი  დიდი დაშორებით დამონტაჟება გამართლებული არ არის.

კიდევ ერთი მნიშვნელოვანი რეკომენდაცია ასეთია: შერეულ აბაზანაში უნიტაზს ნაკლებად თვალშისაცემი ადგილი შეურჩიეთ. მნიშვნელოვანია, კარის შეღებისას ის პირდაპირ არ ჩანდეს.

დასაკიდი უნიტაზი — ტრენდული გადაწყვეტილება

რასაკვირველია, დიზაინის თანამედროვე ტენდენციები ერთმნიშვნელოვნად დასაკიდი უნიტაზისკენ იხრება. ის ფართს მნიშვნელოვნად ზოგავს, ვიზუალურად გაცილებით დახვეწილად გამოიყურება და საერთო დიზაინსაც კიდევ უფრო ელეგანტურად წარმოაჩენს. თუმცა, უნდა გახსოვდეთ, რომ მას ჩაშენებული მექანიზმი ესაჭიროება, ამიტომ დასაკიდი უნიტაზისთვის შესაბამისი ადგილი ჯერ კიდევ სანიტარული კვანძების დამონტაჟებისას უნდა გამოყოთ.

გაითვალისწინეთ კიდევ ერთი დეტალი: თანამედროვე ბინების კედლები არც ისე სქელია, ამიტომ ზოგჯერ, შესაძლოა, ავზისთვის სპეციალური ნიშის ამოშენება დაგჭირდეთ, რამაც ფართი ოდნავ შეგიმციროთ, საერთო ხარჯი კი - გაგიზარდოთ. თუმცა, ისიც უნდა ითქვას, რომ დიზაინერებმა ამ შემთხვევებისთვისაც ძალიან პრაქტიკული და სასარგებლო გადაწყვეტა მოიფიქრეს. მათ კედლის ეს ნაწილი მოსახერხებელ და დახვეწილ თაროდ აქციეს, რომელსაც სურნელოვანი ჩხირებითა და დეკორაციული ნივთებით გაალამაზებთ.

ზოგადად, დასაკიდ უნიტაზს სიმაღლის სტანდარტი აქვს: მისი ზედა ნაწილი იატაკიდან დაახლოებით 40 სანტიმეტრით უნდა იყოს დაშორებული, ამიტომ როდესაც სანტექნიკოსი გაყვანილობის გამართვასა და კვანძების დამონტაჟებას დაიწყებს, აუცილებლად დასჭირდება იმ ფილის სიმაღლის ცოდნა, რომლითაც მოგივიანებით იატაკს მოაპირკეთებთ.

ფართის დაზოგვის გარდა, დასაკიდ უნიტაზს სხვა უპირატესობებიც აქვს: იატაკის დასუფთავება და ჰიგიენის დაცვა მისი დამონტაჟების შემდეგ გაცილებით მარტივია. ამას გარდა, დასადგამთან შედარებით, ინტეგრირებულ ავზში წყლის ავსება თუ დაცლა ნაკლებად ხმაურიანიცაა. თუმცა, ის ბევრად ძვირადღირებულია და მონტაჟის თვალსაზრისითაც განსაკუთრებულ პროფესიონალიზმს მოითხოვს.

რაც შეეხება პროდუქციას, დღესდღეობით მწარმოებლები როგორც ავზისა და უნიტაზის კომპლექტს, ისე ცალკე ჩასაშენებელ ინსტალაციებსაც გვთავაზობენ. განსაკუთრებით მნიშვნელოვანი სწორედ ინტეგრირებული მექნიზმის ხარისხია, ამიტომ თუ თანხის დაზოგვას აპირებთ, შეეცადეთ, შედარებით ბიუჯეტური უნიტაზი შეარჩიოთ და არა — ავზი. თუმცა, ასეთ შემთხვევაში, აუცილებლად შეძენამდე დარწმუნდით, რომ ისინი ერთმანეთთან თავსებადი იქნება.

დასადგამი უნიტაზი — ბიუჯეტური და პრაქტიკული

დასადგამი უნიტაზის მთავარი უპირატესობა ბიუჯეტურობაა, თუმცა კიდევ ერთი პრაქტიკული მახასიათებელი მისი მოსახერხებელი გამოყენებაა: დაზიანების, ან უბრალოდ განახლების სურვილის შემთხვევაში, დასადგამს გაცილებით მარტივად გამოცვლით. 

დასადგამი უნიტაზი ოპტიმალური გადაწყვეტილებაა ძველ ბინებშიც, სადაც კედლის დანგრევა და ჩასაშენებელი ავზის დამონტაჟება გამართლებული არ არის. სხვათა შორის, ბოლო პერიოდში ბაზარზე გამოჩნდა ძალიან დახვეწილი, კომპაქტური მოდელებიც, რომლებიც თანამედროვე ინტერიერს ორგანულად ეხამება.

ჩარეცხვის მექანიზმი და ღილაკი

ბაზარზე არსებულ უნიტაზებს ძირითადად ჩარეცხვის ორგვარი მექანიზმი აქვთ: პირდაპირი და წრიული. როგორც წესი, წრიულის გამოყენება მეტად კომფორტულია. უნიტაზის შერჩევისას ყურადღება მიაქციეთ ღილაკსაც, რომელიც ორნაწილიანი უნდა იყოს: დიდი ავზში დაგროვილ წყალს სრულად იყენებს, მეორე კი მას მხოლოდ ნახევრად ცლის. ასეთი ღილაკი არა მარტო მოსახერხებელი, არამედ ეკომეგობრული და რესურსების დამზოგავიცაა.

დიზაინი და ფერი

უნიტაზი ან ოვალურია ან  — ოთხკუთხედი. არჩევანი თქვენს სურვილზეა დამოკიდებული, თუმცა უმჯობესია, ის ნიჟარის, შემრევებისა და სხვა ნივთების ფორმებს შეუხამოთ. ჩასაშენებელი მექანიზმის შემთხვევაში, სასურველია, იმავე ფორმის შეიძინოთ ჩამრეცხი ღილაკიც. თანაც, აუცილებლად უთხრათ კონსულტანტს ავზის მოდელი, რათა მათ თავსებადობაში წინასწარ დარწმუნდეთ.

ერთი გასათვალისწინებელი დეტალიც: მრგვალი უნიტაზი უფრო ნაკლებ სივრცეს იკავებს, თუმცა ოთხკუთხედი მეტად ელეგანტურად და თანამედროვე გამოიყურება.

რაც შეეხება ფერს, ყველაზე პოპულარული, ცხადია, თეთრის გამოყენებაა, თუმცა ბოლო პერიოდში შავი, ნაცრისფერი ან სულაც მწვანე და ყვითელი უნიტაზებიც გვხვდება. ასეთი მრავალფეროვნება საშუალებას გაძლევთ, უნიტაზი არა მარტო პრაქტიკულ ნივთად, არამედ ინტერიერის გამორჩეულ ნაწილადაც აქციოთ.

და ბოლოს, ერთი მნიშვნელოვანი რეკომენდაციაც: როგორც წესი, უნიტაზი რემონტის დასასრულისკენ მონტაჟდება: ეს მეტად ჰიგიენურიცაა და უსაფრთხოც. რა თქმა უნდა, ეს პროცესი აუცილებლად კვალიფიციურ ხელოსანს უნდა მიანდოთ.

ჰიპერმარკეტ „დომინოში“ დასაკიდი თუ დასადგამი უნიტაზების, მექანიზმებისა და ღილაკების მრავალფეროვანი არჩევანი გელოდებათ. ჩვენი კონსულტანტები კი ოპტიმალური გადაწყვეტილების მიღებაში დაგეხმარებიან.