წლის ყველაზე ჯადოსნური, ფერადი და მხიარული სამზადისი დაიწყო, ირგვლივ კი ათასგვარად გამოპრანჭული ნაძვის ხეები გამოჩნდა. ალბათ, ბევრი თქვენგანიც სახლს სადღესასწაულოდ ამზადებს და დეკორაციებს, სათამაშოებსა და განათებებს არჩევს. თუმცა, ახალი წლის მთავარი ატრიბუტი მაინც ნაძვის ხეა, რომლის მორთვა ორიგინალურობასა და შემოქმედებითობასთან ერთად, გარკვეულ ცოდნასაც მოითხოვს.

ამიტომ ჩვენი ახალი ბლოგპოსტი საახალწლო თემატიკას, უფრო კონკრეტულად კი ნაძვის ხის შერჩევას ეხმიანება და საინტერესო, სასარგებლო რეკომენდაციებსაც გთავაზობთ.

რა ზომის ნაძვის ხე იქნება თქვენთვის ოპტიმალური

რა თქმა უნდა, უმრავლესობას მაღალი, ტოტებგანიერი ნაძვის ხე მოგწონთ, თუმცა ზომის შერჩევისას იმ სივრცის ფართობზე ხართ დამოკიდებულები, სადაც მთავარი საახალწლო ატრიბუტი უნდა განათავსოთ. წინააღმდეგ შემთხვევაში, თქვენც დისკომფორტი შეგექმნებათ და ნაძვის ხესაც ხიბლი დაიკარგება. სანამ კონკრეტულ სტანდარტებზე მოგიყვებით, გაითვალისწინეთ, რომ ზომამდე ნაძვის ხისთვის კონკრეტული ადგილი უნდა შეარჩიოთ: ისეთი, ერთდროულად თვალში მარტივად რომ მოგხვდეთ და თან გავლა-გამოვლაშიც ხელი არ შეგიშალოთ, მით უფრო, თუ სახლში პატარა ბავშვები გყავთ.

რაც შეეხება ზომებს, ინტერიერში ორგანულად რომ ჩაეწეროს, ნაძვის ხის სიმაღლე და დიამეტრი აუცილებლად სწორად უნდა შეირჩეს. მიჩნეულია, რომ 10 კვ/მ-მდე ფართობის შემთხვევაში, უმჯობესია, ის 100 სმ-მდე სიგრძის იყოს, თუ სივრცე 15 კვ/მ-მდეა, მაშინ — 200 სმ-მდე, უფრო დიდი ფართის შემთხვევაში კი, მით უმეტეს, თუ ოთახი ავეჯით ზედმეტად გადატვირთული არ არის, ზომას უფრო თამამად შეარჩევთ.

როგორც დიზაინერები გვირჩევენ, თუ ნაძვის ხეს იატაკზე ვდგამთ, ის სიგრძეში მინიმუმ 150 სმ უნდა იყოს, თუ თქვენი სივრცე უფრო მომცროს მოითხოვს, მაშინ უპირატესობა დასადგამს მიანიჭეთ, რადგან ასეთი სიმაღლის ნაძვის ხე ტუმბოზე ან მაგიდაზე უფრო მომხიბვლელი გამოჩნდება. სხვათა შორის, ახლა ამ ტიპის ნაძვის ხეების უდიდესი არჩევანი არსებობს და სულერთია, სუვენირის მსგავსი მოგწონთ, თუ მოსართავი, სასურველს აუცილებლად მიაგნებთ. რაც მთავარია, მაღალ, ფუმფულა ნაძვის ხეზე გული ნუ დაგწყდებათ: დასადგამი სადღესასწაულო განწყობასაც შეგიქმნით და დასაშლელადაც უფრო მარტივი იქნება.

სიმაღლესთან ერთად, აუცილებელია ნაძვის ხის ოპტიმალური დიამეტრის განსაზღვრაც, რადგან მისი კენწერო — ჭერს, ტოტები კი კედლებს არ უნდა ეხებოდეს. ზედა ნაწილი, აქსესუარის ზომის გათვალისწინებით, ჭერიდან 15 სმ-ით უნდა იყოს დაშორებული, ტოტებსა და კედელს შორის ოპტიმალური მანძილი კი დაახლოებით 20-30 სმ-ია. სხვათა

შორის, ბოლო დროს მწარმოებლები აქცენტს მოქნილ ტოტებზე აკეთებენ, რაც იმას ნიშნავს, რომ მათ სურვილის მიხედვით გადმოშლით და სიგანესაც თავად დაარეგულირებთ.

კიდევ ერთი სიახლე სპეციალურად კუთხისთვის განკუთვნილი, ორიგინალური ნაძვის ხეა, რომელსაც ტოტები მხოლოდ ერთ მხარეზე აქვს. ცარიელი ნაწილით ის კუთხოვან კედელში ჯდება, თუმცა კარგად თუ არ დააკვირდებით, ჩვეულებრივი ნაძვის ხე გეგონებათ და, თანაც, სივრცეს ძალიან დაზოგავს.

რა ფორმისა და ფერის ნაძვის ხე გჭირდებათ

ნაძვის ხის ფორმის რამდენიმე გავრცელებული ვერსია არსებობს და მისი შერჩევა მთლიანად თქვენს გემოვნებაზეა დამოკიდებული. ერთადერთი, რაც ამ დროს უნდა გაითვალისწინოთ მისი მორთვის სტილია: თუ ბევრი სათამაშო მოგწონთ და აქსესუარების გამოყენებაც უხვად გსურთ, მაშინ უმჯობესია მეჩხერტოტებიანი ნაძვის ხე შეარჩიოთ, ხოლო თუ უპირატესობას მინიმალიზმს ანიჭებთ, ბუთქუნა, მჭიდრო წყობის ტოტებიანი დაგჭირდებათ. სხვათა შორის, მინიმალიზმის მოყვარულებს მზა, უკვე განათებიანი და გირჩებიანი ნაძვის ხეების შეძენაც შეგიძლიათ.

ცოტა რამ ფერების შესახებაც: ტრადიციულად ნაძვის ხე მწვანეა, თუმცა ინტერიერისა და გემოვნების შესაბამისად, ბევრი ადამიანი თამამ გადაწყვეტილებას არ ერიდება და საახალწლოდ ლურჯ, ვარდისფერ, ოქროსფერ, ვერცხლისფერ ან სულაც წითელ ნაძვის ხეს რთავს. ამგვარი უჩვეულო ფერები დღესასწაულს მეტად ზღაპრულ ელფერს ანიჭებს, თუმცა გაითვალისწინეთ, რომ მკვეთრი ტონის შერჩევის შემთხვევაში, თქვენს მთავარ სადღესასწაულო აქსესუარს ბევრი მოსართავითა და განათებით ნუ გადატვირთავთ. განსხვავებული ფერი მის მომხიბვლელობას ისედაც გაუსვამს ხაზს.

ნაძვის ხე და ინტერიერი

თუ ინტერიერის დიზაინი თქვენთვის მნიშვნელოვანია, მაშინ ნაძვის ხის მორთვაც საგულდაგულოდ მოგიწევთ.

მიჩნეულია, რომ ნაძვის ხის აქსესუარების ფერები ინტერიერს ან უნდა ავსებდეს ან მისგან ძალიან განსხვავებული და კონტრასტული იყოს. თუმცა, ამავდროულად, არსებობს ზოგადი, სასარგებლო რეკომენდაციებიც:

ტრადიციულ და კლასიკურ ინტერიერს თბილი ფერის განათება და მშვიდი ტონები მოუხდება. მაგალითად, ყვითელი და ოქროსფერი, რომლებსაც წითელს, ალუბლისფერსა და ყავისფერს შეუხამებთ. გირჩევთ, ამ შემთხვევაში ვერცხლისფერი, თეთრი და სხვა ცივი ტონები ნაკლებად გამოიყენოთ, თუმცა, სამაგიეროდ, შეგიძლიათ, არჩევანი ბოლო პერიოდის პოპულარულ ტრენდზე — ვინტაჟურ სათამაშოებზე გააკეთოთ.

თუ თქვენც იმ ადამიანებს შორის ხართ, ვისთვისაც ბავშვობის დროინდელი მოსართავები სასიამოვნო სენტიმენტებთან ასოცირდება და თან ტრადიციული ინტერიერიც გაქვთ, გირჩევთ, მშრალ ხიდსა და საშობაო ბაზრობებზე გაიაროთ და ვინტაჟურ სათამაშოებს ასევე ვინტაჟური ნაძვის ხე შეუხამოთ.

თუ თანამედროვე, მოდერნისტული ან ლოფტის სტილის, შედარებით ცივი ფერის ინტერიერი გაქვთ, მაშინ უპირატესობა ლურჯ, ვერცხლისფერ და თეთრ აქსესუარებს მიანიჭეთ. ისინი თქვენს ნაძვის ხეს ძალიან მოუხდება და ინტერიერსაც ჰარმონიულად შეეხამება.

სათამაშოების ფერებთან დაკავშირებით გავრცელებული ტრენდი ერთი და იგივე ტონალობის აქსესუარებია. მაგალითად, აქცენტს მხოლოდ წითელზე აკეთებთ და სათამაშოებსაც მისი მიხედვით არჩევთ. ერთფეროვნების ნუ შეგეშინდებათ. სინამდვილეში, წითლის ტონალობა ვარდისფერსაც გულისხმობს, ბორდოსაც და ფუქსიასაც.

და ბოლოს, გაითვალისწინეთ ბავშვები და შინაური ცხოველები, განსაკუთრებით კატები. ნუ იყიდით შუშის, მარტივად მსხვრევად აქსესუარებს, მით უმეტეს ძვირადღირებულს, უპირატესობა მიანიჭეთ პლასტმასის ან ნაჭრის მოსართავებს, რომლებიც ლამაზიცაა, პრაქტიკულიც და გამძლეც.

უსაფრთხოება და გამძლეობა

ნაძვის ხის შერჩევისას გახსოვდეთ, რომ სილამაზესა და მოსახერხებელ ადგილას განთავსებასთან ერთად, ის უსაფრთხო და გამძლეც უნდა იყოს.

სიმყარის შეფასებისას უპირველესად ყურადღება კარკასსა და სადგამს მიაქციეთ: თუ ნაძვის ხე დიდია, ორივე მათგანი მეტალისგან დამზადებული დაგჭირდებათ, მაგრამ თუ შედარებით მომცრო და მსუბუქ ხეს აირჩევთ, პლასტმასის მასალაც გამოგადგებათ. მნიშვნელოვანია, რომ ნაძვის ხის ტოტებს წიწვები არ სცვიოდეს, არც მკვეთრად ქიმიური სუნი ჰქონდეს, თან ცეცხლგამძლე და ანტიალერგიულიც იყოს.

რა თქმა უნდა, საახალწლო განწყობა ჰიპერმარკეტ „დომინოშიც“ ნელ-ნელა პიკს აღწევს. ჩვენი ნაძვის ხეები და აქსესუარები მოუთმენლად გელიან. გვესტუმრეთ და შეარჩიეთ მთავარი სადღესასწაულო აქსესუარი, ჩვენი კონსულტანტები ნაძვის ხის ინტერიერთან შეხამებაშიც სიამოვნებით დაგეხმარებიან.