ბოლო პერიოდში გაზონი ბევრი ადამიანისთვის ეზოს გამწვანების ერთ-ერთ აუცილებელ ნაწილად იქცა. მართლაც, ხასხასა და მობიბინე გაზონი ნებისმიერ სივრცეს განსაკუთრებულად ამშვენებს, მით უმეტეს ზაფხულში, როცა გარეთ დიდ დროს ატარებთ.

თუმცა, ამავდროულად, ჯანსაღი ფერი სულ რომ შეინარჩუნოს, ბალახს გულდასმით უნდა მოუაროთ. ერთი შეხედვით, ეს პროცესი შესაძლოა, რთულად მოგეჩვენოთ, ამიტომ ამ ბლოგპოსტში სწორედ მის გამარტივებას გასწავლით, სასარგებლო რეკომენდაციებსაც მოგცემთ და გირჩევთ მოწყობილობებსაც, რომლებიც გაზონის მოვლაში დაგეხმარებათ. 

ბალახის შერჩევა

გაზონის მოვლამდე მისი გაშენება და ბალახის სწორად შერჩევაა საჭირო. მცენარეების მსგავსად, გაზონის შემთხვევაშიც გარკვეული კრიტერიუმები წინასწარ უნდა განსაზღვროთ: მაგალითად, გსურთ თუ არა ინტენსიური ფერი, მაღალი სიმკვრივე და ზრდის ტემპი, მოგწონთ თუ არა ხალიჩის ეფექტი, როგორია თქვენი ეზო — მზიანი თუ უმეტესად ჩრდილიანი, რამდენად ნაყოფიერი ან მშრალია მისი ნიადაგი, უნდა გაუძლოს თუ არა გაზონმა დიდ დატვირთვას, გვალვას ან ყინვას, იქნება თუ არა ის სხვა მცენარეების კომპოზიციის ნაწილი, რამდენად რთული მოვლა დასჭირდება ბალახს და ა.შ. ამ კრიტერიუმების ჩამოყალიბების შემდეგ მრავალფეროვან სახეობებს შორის სასურველის არჩევას უკვე მარტივად შეძლებთ.

გახსოვდეთ, რომ გაზონის დასარგავად საუკეთესო პერიოდი, ძირითადად, აპრილის დასაწყისიდან სექტემბრის ბოლომდეა. 

გათიბვა და გაკრეჭა

გაზონის მოვლის ერთ-ერთი მთავარი წესი რეგულარული გათიბვა და გაკრეჭაა. გაითვალისწინეთ, რომ მისი ოპტიმალური სიმაღლე მის სახეობაზეა დამოკიდებული. გათვალისწინებულზე უფრო დაბალი სიმაღლის ბალახის დატოვების შემთხვევაში, ის შესაძლოა, გაგიხმეთ.

დღესდღეობით მოთიბვისთვის არაერთი ინოვაციური მოსახერხებელი მოწყობილობა გამოიყენება, რაც შრომასაც შეგიმსუბუქებთ და შესრულებულ სამუშაოსაც კიდევ უფრო ხარისხიანს გახდის. განსაკუთრებით პოპულარულია რობოტი გაზონის საკრეჭები, რომლებიც ძალიან კომპაქტური და მსუბუქია. ყველა მათგანი მარტივად მონტაჟდება, ავტომატურად, ადამიანის ჩარევის გარეშე მუშაობს და მობილური ტელეფონით, სპეციალური აპლიკაციით იმართება, მოსახერხებელია ვიწრო გასასვლელებში, თიბავს კიდესთან ახლოს და, მულჩირების სისტემის დახმარებით, წვრილად დაქუცმაცების ფუნქციასაც ასრულებს.

რობოტ საკრეჭებს აქვთ ორმაგი დანა, რაც ზუსტ ჭრას უზრუნველყოფს, დაბალი ხმა, ავტომატური გაჩერებისა და წინააღმდეგობის დადგენა-არიდების ფუნქციები, ძლიერი მოჭიდება, 45-გრადუსიანი დახრა, გაზონსა და მის გარეთ პარკირება, ჩაშენებული წვიმის სენსორი და სენსორული მართვის პანელი. რაც მთავარია, მოწყობილობები უსაფრთხოა ადამიანებისა და ცხოველებისთვის.

გაზონის მოსავლელად ეფექტიანია ხელის სათიბი მანქანაც, რომელიც გაზონის მოვლას ძალიან გაგიმარტივებთ, ხოლო თუ ეზოში ხეხილიც გაქვთ, მაშინ ტოტების მარტივად სამართავი დასაქუცმაცებლებიც დაგჭირდებათ.

გაითვალისწინეთ, რომ გაზონი მშრალ ამინდში უნდა გაკრიჭოთ, მოკრეჭილი ბალახი კი შეგიძლიათ, შემდეგ დამატებით კვებისთვის, მულჩირებისთვის გამოიყენოთ.

მორწყვა

გაკრეჭისა და მოთიბვის შემდეგ ბალახის მორწყვა და კარგად დატენიანებაც საჭიროა. ზოგადად მორწყვა გაზონის მოვლის აუცილებელი ნაწილია. ეს მას გადახურებისგან იცავს და სიჯანსაღესა და სიხასხასეს უნარჩუნებს. ცხადია, აუცილებელია, რომ ზომიერება შეინარჩუნოთ: ბალახი არც გამოაშროთ და არც ზედმეტად დაატენიანოთ. მორწყვის სიხშირე წელიწადის დროსა და ნიადაგზეც არის დამოკიდებული, თუმცა უმჯობესია, თავად ბალახის მდგომარეობას დააკვირდეთ: როცა წყალი დასჭირდება, ის თავად მიგანიშნებთ.

გაითვალისწინეთ, რომ უკეთესია გაზონი დილას ან ადრეულ საღამოს მორწყოთ და არა — მცხუნვარე მზეში, მეტი კომფორტისა და ხარისხისთვის კი სარწყავი მოწყობილობები — პისტოლეტები, სასხურებლები და ა.შ. გამოიყენოთ.

გამარგვლა და გამოკვება

თუ გაზონზე სარეველას შეამჩნევთ, ეს იმას ნიშნავს, რომ დროა თქვენი გაზონი გამარგლოთ. ბალახს სარეველა ფრთხილად მოაშორეთ და გაითვალისწინეთ, რომ თუ მას ფესვიანად ამოღებას მოახერხებთ, ხშირი გამარგვლა აღარ დაგჭირდებათ. არსებობს სპეციალური ინსტრუმენტები, რომლებიც სარეველასთან ბრძოლას გაგიმარტივებთ.

გამწვანების სხვა სახეობების მსგავსად, გაზონსაც სჭირდება სისტემატური გამოკვება. როგორც წესი, მებაღეების რჩევით, საუკეთესო დრო სასუქის დასამატებლად ადრეული გაზაფხული, ზაფხული და შემოდგომაა. გახსოვდეთ, რომ სასუქის შეტანისას ბალახი მშრალი უნდა იყოს, მოერიდეთ ნაწვიმარზე ან წვიმის დროს განაყოფიერებასაც, თუმცა სასუქის შეტანის შემდეგ გაზონი აუცილებლად კარგად მორწყეთ. 

და ბოლოს, ყველაზე მარტივ გამოსავალსაც გასწავლით: თუ გაზონის მოვლა გიჭირთ, არჩევანი ხარისხიან ხელოვნურ ბალახზე გააკეთეთ. ცხადია, ის ბუნებრივს სრულად ვერ ჩაანაცვლებს, მაგრამ გაცილებით ადვილი მოსავლელია და დროს მნიშვნელოვნად დაგიზოგავთ. რა თქმა უნდა, დომინოს ბაღში საუკეთესო, თქვენთვის ოპტიმალურ გაზონს შეგარჩევინებთ და კონკრეტულად მის მარტივ მოვლაზეც დეტალურად დაგაკვალიანებთ.