უკვე შესამჩნევად დაცხა და გაგრილების სისტემის დამონტაჟებაც კიდევ უფრო აქტუალური გახდა. თუმცა, დამონტაჟებას წინ ძალიან მნიშვნელოვანი ეტაპი — მისი სწორად შერჩევა უძღვის. ამ პროცესში კი არაერთი საყურადღებო კრიტერიუმისა და დეტალის გათვალისწინებაა საჭირო. თუ ახლა სწორედ გადაწყვეტილების მიღების ეტაპზე ხართ, მაშინ აუცილებლად გაეცანით ჩვენს ბლოგპოსტს, რომელიც საინტერესო რეკომენდაციებს მოგაწვდით და გაგრილების სისტემის შერჩევაშიც ძალიან დაგეხმარებათ.

კონდიციონერის შერჩევის წესი

კონდიციონერი თანამედროვე სახლის ყველაზე პოპულარული გაგრილების სისტემაა, თუმცა, ამავდროულად, მისი შერჩევა ძალიან საპასუხისმგებლოცაა. სამაგიეროდ, ოპტიმალური სისტემა არა მარტო სასურველ ტემპერატურას უზრუნველყოფს, არამედ ბევრი წლის განმავლობაში საიმედოდაც მოგემსახურებათ და დამატებითი დანახარჯებისგანაც დაგიცავთ. 

მაშ ასე, კონდიციონერის არჩევისას მნიშვნელოვანია იცოდეთ:

• დეტალები იმ სივრცის შესახებ, სადაც მას ამონტაჟებთ. უფრო კონკრეტულად კი, ფართის მახასიათებლები: სად მდებარეობს ის — მზის მხარეს თუ ჩრდილის, როგორია ჭერის სიმაღლე, ფანჯრების, კარების, ბინაში მცხოვრები ადამიანებისა და ტექნიკის რაოდენობა, არის თუ არა ენერგოეფექტური მასალით ნაშენები კედლები და რითაა შესრულებული სახურავის გადახურვა — ეს მახასიათებლები გავლენას ახდენს სივრცის ტემპერატურასა და მის შენარჩუნებაზე, ამიტომ კონდიციონერის შეძენისას მათი წინასწარი ცოდნა და გათვალისწინება აუცილებელია.

• კონდიციონერის ძირითადი ტექნიკური მახასიათებლები, უპირველესად კი სიმძლავრე, რომელიც სწორედ ფართის მახასიათებლების მიხედვით უნდა შეირჩეს. გაითვალისწინეთ, რომ სტანდარტულად 1 კვ/მ ფართობისთვის 100 ვატის სიმძლავრეა საჭირო. ამასთან, სპეციალისტების რეკომენდაციით, უმჯობესია, მოწყობილობებზე მითითებულ პარამეტრებთან შედარებით, ოდნავ მძლავრი კონდიციონერი შეარჩიოთ, რათა სასურველი ტემპერატურა უფრო სწრაფად მიიღოთ და თავად მოწყობილობის ექსპლუატაციაც გაახანგრძლივოთ.

• აქვს თუ არა კონდიციონერს ინვენტორული სისტემა, რომელიც მოწყობილობის ხმაურსაც ამცირებს და ელექტროენერგიის მოხმარებასაც. ამგვარი მოდელების ფასი შედარებით მეტია, თუმცა გრძელვადიან პერსპექტივაში ისინი ფინანსურ დანახარჯს მნიშვნელოვნად ამცირებს.

• ენერგოეფექტურობის მაჩვენებელი — რაც უფრო ენერგოეფექტურ მოწყობილობას იყენებთ, მით ნაკლებ ზიანს აყენებთ გარემოსაც და თქვენს ფინანსებსაც. ენერგოეფექტური კონდიციონერი ნაკლებ ელექტროენერგიას მოიხმარს, რაც, ცხადია, შემდგომში თქვენ მიერ გადახდილ გადასახადებზეც პოზიტიურად აისახება.

• ხმაურის დონე — ეს კრიტერიუმი აუცილებლად გასათვალისწინებელია, მით უმეტეს, მაშინ, როცა კონდიციონერს საძინებლისთვის ყიდულობთ. გახსოვდეთ, რომ ხმაურის საშუალო ოპტიმალური მაჩვენებელი 20 დეციბელია. 

• დამატებითი ფუნქციონალი —  თანამედროვე კონდიციონერები არა მარტო აგრილებს, არამედ ათბობს კიდეც, წმენდს ჰაერს, არეგულირებს ტენს და ა.შ. უმეტესობას აქვს ღამის რეჟიმი, იონიზაციის, ჰაერის ნაკადის მიმართულების რეგულირების, ავტომატური  ჩართვისა და გამორთვის ფუნქციებიც, რაც მუდმივად სასურველი ტემპერატურის შენარჩუნებას უზრუნველყოფს. მთავარია, წინასწარ ზუსტად იცოდეთ, რა გსურთ.

• კონდიციონერის ვიზუალი, რომელიც მხოლოდ კორპუსის ზომასა და დიზაინს არ გულისხმობს. მნიშვნელოვანია, დაინტერესდეთ მისი აგრეგატითაც და დარწმუნდეთ, რომ ის ფასადთან თავსებადია როგორც ზომით, ისე დიზაინით.

• რამდენად მარტივია მოვლა — კონდიციონერის სწორად გამოყენება დიდწილად მის მოვლასა და ფილტრების რეგულარულ გაწმენდა-გამოცვლას გულისხმობს. ეს არა მარტო კონკრეტული მოწყობილობის გამოყენების დროს გაახანგრძლივებს, არამედ თქვენს სახლში ჰაერის სიჯანსაღესაც შეინარჩუნებს. ცხადია, ყოველთვის შეგიძლიათ, შესაბამისი მომსახურებით ისარგებლოთ, თუმცა თუ კონდიციონერს ფილტრები მოსახერხებელ ადგილას ექნება განთავსებული, მათ რეგულარულ მოვლას თავადაც მარტივად შეძლებთ. სწორედ ამიტომ, გამოცდილი მომხმარებლები ხშირად ამ კრიტერიუმსაც დიდ მნიშვნელობას ანიჭებენ. 

ყველაზე გავრცელებული კედლის კონდიციონერების გარდა, შეგიძლიათ, ისარგებლოთ პორტატიული კონდიციონერებით, რომლებიც იატაკზე იდგმება, მარტივად გადაადგილდება და შეგიძლიათ, თან ატაროთ კიდეც, თუმცა გაითვალისწინეთ, რომ ისინი შედარებით ხმაურიანია. ფართოდაა გავრცელებული დასადგამი არაპორტატიული კონდიციონერებიც, რომლებიც უფრო მეტად საჯარო სივრცეებისთვის გამოიყენება.

ვენტილატორის შერჩევის წესი

კონდიციონერის მარტივი და ბიუჯეტური ალტერნატივა, თუმცა გაგრილების ეფექტიანი საშუალება ვენტილატორია, მით უმეტეს, თუ პატარა ბინაში ცხოვრობთ. ერთი შეხედვით მისი არჩევა თითქოს უფრო ნაკლებ სირთულეს უკავშირდება, მაგრამ ამ შემთხვევაშიც არსებობს რეკომენდაციები, რომლებიც ნამდვილად გამოგადგებათ.

ვენტილატორის შეძენისას გაითვალისწინეთ:

• სად უნდა გამოიყენოთ ვენტილატორი — არსებობს ჭერის, დასადგამი, წყლის, მაგიდის, ხელის, მინი და ჭაღი ვენტილატორები. შესაბამისად, სასურველი ვენტილატორის ტიპი მისი დანიშნულებით უნდა შეარჩიოთ. მაგალითად, ჭაღი და ჭერის ვენტილატორები კარგი გამოსავალია მაშინ, როცა კონდიციონერის აგრეგატს შენობის ფასადზე, მისი კულტურული მემკვიდრეობის გამო, ვერ ამაგრებთ, მინი ვენტილატორი საძინებელში გამოგადგებათ, დასადგამი კი, ცხადია, პორტატიულობის დახმარებით, თან წასაღებად ძალიან მოსახერხებელია.

• ვენტილატორის ფუნქციონალი — თანამედროვე ვენტილატორებსაც აქვს ავტომატური ჩართვა-გამორთვისა და ბრუნვის, სიმაღლის, ჰაერის ნაკადისა და მიმართულების მართვის ფუნქციები. ისინი დამატებით კომფორტს ქმნის და თქვენ ირგვლივ გარემოს სიჯანსაღესაც იცავს, განსაკუთრებით მაშინ, როცა სამზარეულოს გამწოვის სიმძლავრე არ გყოფნით. შეძენისას ამ შესაძლებლობებით აუცილებლად დაინტერესდით. ამ კრიტერიუმების გარდა, გასათვალისწინებელია სამაგრის სიმყარე, ხმაურის დონე და, ცხადია, დიზაინიც, რომელიც თქვენი სივრცისა და გემოვნების შესაბამისი უნდა იყოს. 

ჩვენი რეკომენდაციების გაცნობასთან ერთად, რასაკვირველია, თქვენს კონკრეტულ საჭიროებებზე პროფესიონალების აზრიც ძალიან მნიშვნელოვანია. გვესტუმრეთ „დომინოში“, გაესაუბრეთ ჩვენს კონსულტანტებს, რომლებიც გაგრილების ყველაზე ოპტიმალური სისტემის შერჩევაში დაგეხმარებიან.