ზოგჯერ რემონტის დაწყებამდე შიდა კარს არც ისე დიდ ყურადღებას ვუთმობთ და მთავარ აქცენტს სხვა ფაქტორებზე ვაკეთებთ. სინამდვილეში კი, გამოცდილება გვიჩვენებს და სპეციალისტებიც გვირჩევენ, რომ კარის შერჩევას განსაკუთრებული პასუხისმგებლობით მოვეკიდოთ, რადგან ის ჩვენი სახლის დიზაინზე, სივრცის აღქმაზე, განწყობასა თუ ცხოვრების ხარისხს გამორჩეულ გავლენას ახდენს.

ამ ბლოგპოსტში სწორედ კარის შესახებ მოგიყვებით და, რა თქმა უნდა, გაგაცნობთ იმ რეკომენდაციებსა და რჩევებსაც, რომლებიც მის ოპტიმალურ შერჩევაში დაგეხმარებათ.

როდის შევარჩიო კარი

კარის შერჩევა რემონტის დაგეგმვისთანავე იწყება. უკიდურეს შემთხვევაში, სასურველ ზომებსა და სახეზე მაინც უნდა გქონდეთ წარმოდგენა, რათა სარემონტო სამუშაოების პროცესში ღიობის ზომა ზუსტად გათვალოთ და გაუთვალისწინებელი შემთხვევები თავიდან აიცილოთ. გახსოვდეთ, რომ კარისთვის განკუთვნილი სივრცის გაზომვისას მხედველობაში აუცილებლად უნდა იქონიოთ კედლების ნალესის სისქე, იატაკისა და თავად ღიობის სიმაღლე.

ამას გარდა, გაითვალისწინეთ გაღების მიმართულებაც. როგორც წესი, ბინის შიდა კარი შიგნით იღება. რასაკვირველია, გარე გაღებაც შესაძლებელია, თუმცა ამგვარი კარი ფართს აპატარავებს და არც უსაფრთხოების თვალსაზრისითაა გამართლებული. შეძენის დროს, ზომებთან ერთად, ეს ფაქტორიც აუცილებლად გადაამოწმეთ. 

კარის სახეები — როდის რომელი

კარის შერჩევა, თქვენს გემოვნებასთან ერთად, თავად ფართის ზომასა და ოთახის დანიშნულებაზეა დამოკიდებული.

ზოგადად, არსებობს პანელური, ანუ კლასიკური სტილის კარი, ფრანგული, რომელიც მინისგანაა დამზადებული, გასასრიალებელი, დასაკეცი და ფარული. ცხადია, ყველა მათგანის გამოყენება ოპტიმალურად შეგიძლიათ. მაგალითად, შუშებიანი კარის დამონტაჟება კარგია, როცა ოთახს ფანჯარა არ აქვს. ასეთ შემთხვევაში თქვენს სივრცეში ბუნებრივი სინათლე მარტივად შევა, თუმცა, არ დაგავიწყდეთ, რომ თუ ამ კარს აირჩევთ, უსაფრთხოებისთვის შუშა აუცილებლად ნაწრთობი უნდა იყოს.

გასასრიალებელი ან დასაკეცი კარი კარგი არჩევანია ორი სივრცის, მაგალითად, საძინებლისა და საგარდერობე ოთახის გასაყოფად, თანაც, ის ფართსაც საუკეთესოდ ზოგავს. ბოლო პერიოდში შედარებით პატარა სივრცეებისთვის ხშირად გამოიყენება ფარული კარიც, რომლის ჩარჩოც კედელშია ჩაშენებული, თავად კი კედლის ფერზე ისე იღებება, რომ მის ორგანულ ნაწილად იქცევა. ასეთი კარი ვიზუალურად სივრცესაც ზრდის და საკმაოდ ელეგანტურიცაა.

როგორი ფერისა და მასალის

ოპტიმალურად შერჩეული კარი ინტერიერს ხვეწს და სახლშიც გამორჩეულ ატმოსფეროს ქმნის. ეს კი არა მარტო მის დანიშნულებაზე, არამედ ფერსა და მასალაზეცაა დამოკიდებული.

რა თქმა უნდა, ფერზე მსჯელობისას ბინის მთლიანი ტონების გათვალისწინებაა აუცილებელი, თუმცა დიზაინერების ზოგადი რჩევა ასეთია: როცა სახლს ბუნებრივი შუქი აკლია, მაშინ არჩევანი ღია ფერის კარზე უნდა შეაჩეროთ. ის სივრცეს დამატებით სინათლესა და სიმსუბუქეს შემატებს. იგივე რეკომენდაცია ვრცელდება ჭრელ ან შედარებით გადატვირთულ იატაკზე და მკვეთრი დეკორებითა და ფერებით გაფორმებულ ინტერიერზე.

ცხადია, გავრცელებულია შავი, ნაცრისფერი და სრულიად კონტრასტული ფერის კარებიც, რომლებიც პრაქტიკულად ბინის დიზაინის გამორჩეულ ელემენტებად იქცევა. თუმცა,   გაითვალისწინეთ, რომ შიდა კარი აუცილებლად უნდა განსხვავდებოდეს იატაკის ფერისგან, მაგრამ, ამავდროულად, ორგანულად ეხამებოდეს მას, პლინტუსის ფერსა და საერთო სტილს.

რაც შეეხება მასალებს, ამჟამად ყველაზე მეტად ხის მასიური, შპონის, ეკო შპონის, MDF-ისა და PVC-ს კარებია გავრცელებული. ხის მასალა სანდო და მყარია, თუმცა შედარებით ძვირადღირებული, ამიტომ ეკოლოგიური MDF მის გამძლე და თან ბიუჯეტურ ალტერნატივად მიიჩნევა. ეკოლოგიურად სუფთაა შპონიც და მისი კიდევ უფრო ხელმისაწვდომი ვერსია ეკო შპონი. მასალის შერჩევისას, გახსოვდეთ, რომ აბაზანისა და სამზარეულოს კარები აუცილებლად ნესტგამძლე მასალისგან უნდა იყოს დამზადებული, რისთვისაც MDF-თან ერთად, PVC-ც გამოგადგებათ, საძინებლისას კი სასურველია ხმის იზოლაცია ჰქონდეს.

ზოგადად კარი არც ძალიან მსუბუქი უნდა იყოს და არც ძალიან მძიმე. ძალიან მსუბუქი მარტივად მიჯახუნდება და დაზიანდება, მძიმე კი გამოსაყენებლადაა რთული, ამიტომ მისი ოპტიმალური წონა 20 კილოგრამამდეა.

და ბოლოს, არ დაგავიწყდეთ, რომ კარის ოპტიმალურ შერჩევასთან ერთად, განსაკუთრებით მნიშვნელოვანი მისი სწორად მონტაჟია, ამიტომ ეს საქმე აუცილებლად პროფესიონალს ანდეთ. კარის სასურველი მოდელის შესარჩევად კი „დომინოში“ გვეწვიეთ. ჩვენი კონსულტანტები რეკომენდაციებითა და რჩევებიც სიამოვნებით დაგეხმარებიან.