სანიტარული კვანძებისა და ელექტრო გაყვანილობების დასრულების შემდეგ რემონტის პროცესში შედარებით სახალისო, მაგრამ არანაკლებ საპასუხისმგებლო ეტაპი — კედლის საფარის სამუშაოები იწყება. ამ დროს თქვენი ბინის კონტურები ნელ-ნელა უკვე იკვეთება, რაც, რა თქმა უნდა, დამატებით მოტივაციასაც გაძლევთ. თუმცა, სწორედ ამ სამუშაოების დროს იქმნება ვიზუალურად თვალსაჩინო გარემო, ამიტომ ისინი ზედმიწევნით ზუსტად და პროფესიულად უნდა შესრულდეს.

კედლის საფარის დაგეგმვისას პირველი გადაწყვეტილება მასალის შერჩევაა: რომელი გამოვიყენოთ — საღებავი თუ შპალერი და როგორ შევარჩიოთ ისინი? ჩვენს ახალ ბლოგპოსტში მოგიყვებით რეკომენდაციებზე, რომლებიც ამ გადაწყვეტილების მიღებაში დაგეხმარებით.

 როგორია კედლის მდგომარეობა

რა თქმა უნდა, ყველაფერი თქვენს გემოვნებასა და არჩევანზეა დამოკიდებული, თუმცა  დიზაინისა და რემონტის ტრენდი ბოლო წლების განმავლობაში მაინც საღებავით  დაფარული კედლებისკენ იხრება. საქმე იმაშია, რომ ის სივრცეს უფრო ჰაეროვნად წარმოაჩენს და ფართს ვიზუალურადაც ადიდებს, მაგრამ, ცხადია, შპალერს თავისი უპირატესობები აქვს.

მასალის შერჩევისას მთავარი და მნიშვნელოვანი ფაქტორი კედლის მდგომარეობაა. საღებავის შემთხვევაში ის მაქსიმალურად სწორი უნდა იყოს, რაც ლესვის შემდეგ ფითხითა და ზუმფარით ზედმიწევნით დამუშავებას მოითხოვს. შპალერი კი პირიქით: კედლის ნაკლოვანებებს კარგად უმკლავდება და ბევრ დეფექტსაც მალავს.

სხვათა შორის, კედლების მდგომარეობისა და სივრცის ფუნქციონალის მიხედვით, შეგიძლიათ, ორივე მასალის კომბინაციაც სცადოთ. მაგალითად, მხიარული და ფერადი შპალერით საბავშვო ოთახი გააფორმოთ ან სულაც განსაკუთრებული შპალერის დეკორით მისაღების ან საძინებლის კედელი გაალამაზოთ, დანარჩენი კი შეღებოთ. ზოგადად, დეკორი და პანო ბოლო წლების ერთ-ერთი ტრენდია და მას სახლის დიზაინში მართლაც გამორჩეული შტრიხები შეაქვს. ძალიან პოპულარულია შესაღები შპალერის  გამოყენებაც, რომელსაც გაკვრის შემდეგ სასურველი ფერით შეღებავთ და სურვილის შემთხვევაში სამომავლოდ მარტივადაც შეცვლით.

დროის ფაქტორი

მაღალი ხარისხის საღებავები საკმაოდ სწრაფად შრება, თუმცა უნდა გაითვალისწინოთ, რომ სრულყოფილი საფარის მისაღებად მინიმუმ ორი პირის გადასმაა საჭირო. თანაც, ღებვის  პროცესებს შორის ინტერვალების დაცვაც აუცილებელია.

შპალერის შემთხვევაში ყველაფერი სხვაგვარადაა: ერთი დღის განმავლობაში მისი გაკვრა საკმაოდ დიდ ფართობზეა შესაძლებელი. შპალერი კარგი გადაწყვეტილებაა მაშინაც, როცა არა მთლიანი სახლის რემონტი, არამედ ერთი ოთახის ინტერიერისა და დიზაინის შეცვლა, მაგალითად, საბავშვო სივრცის მოწყობა გსურთ.

გამძლეობა და მდგრადობა

თანამედროვე საღებავები საკმაოდ მდგრადია. ისინი არც მარტივად ზიანდება და ნაგებობის ვიბრაციასაც კარგად უძლებს. თუმცა, თუ ბინას ახალაშენებულ კორპუსში შეიძენთ, გაითვალისწინეთ, რომ დროთა განმავლობაში, დიდი ალბათობით, კედლებზე წვრილი ბზარები ჩნდება, ამიტომ უმჯობესია, თუ შეღებვამდე სპეციალურ ქაღალდს გააკრავთ. ის საფარის მდგრადობასაც გაზრდის და ბზარებსაც ნაკლებად შესამჩნევს გახდის. მართალია, ქაღალდის გაკვრა ხელობას ცოტათი გაგიძვირებთ, თუმცა გამძლეობაზე თანხის დაზოგვა ნამდვილად არ ღირს.  

საღებავის შერჩევისას აუცილებელია მოვლის სპეციფიკაც გაითვალისწინოთ. როცა ის მაღალი ხარისხისაა, მარტივად, მხოლოდ წყლითაც კარგად იწმინდება. ეს ფაქტორი განსაკუთრებით მნიშვნელოვანია, თუ სახლში პატარა ბავშვები ან ცხოველები გყავთ, ამიტომ შეძენისას შესაბამისი საკითხით აუცილებლად დაინტერესდით.

რაც შეეხება შპალერს, კარგი ხარისხის ნაწარმი ასევე ხასიათდება გამძლეობით და შეიძლება ითქვას, რომ ის საღებავზე მეტად მდგრადიცაა. თუმცა, თუ მის გაკვრას გადაწყვეტთ, გახსოვდეთ, რომ უმჯობესია, ფლიზელინის ბაზაზე დამზადებული მასალა შეიძინოთ. ასეთი შპლაერი, სამღებრო ქაღალდის მსგავსად, დრეკადია, არ სკდება და კედლის ცვლილებებსა თუ ბზარებსაც კარგად უძლებს. საყურადღებოა მისი მოვლის სპეციფიკაც: აუცილებელია, შპლაერი მარტივად იწმინდებოდეს და ფერსა თუ მდგრადობას დიდხანს ინარჩუნებდეს.

აბაზანაში რომელი სჯობს

ბოლო წლებია, თანამედროვე დიზაინერები აბაზანის კედლების შეღებვასაც უწევენ რეკომენდაციას. მთავარია, გახსოვდეთ, რომ ასეთ შემთხვევაში ნესტგამძლე მასალა დაგჭირდებათ.

სხვათა შორის, აბაზანაში პოპულარულია შპალერის დეკორის გამოყენებაც, თუმცა ის აუცილებლად კონკრეტულად ამ სივრცისთვის უნდა იყოს დამზადებული, კარგად იტანდეს ტემპერატურის ცვლილებასა და ნესტს. გაითვალისწინეთ, რომ აბაზანაში შპალერის დეკორის გაკვრისთვის შედარებით დიდი დრო და აუცილებლად პროფესიონალი ხელოსანი დაგჭირდებათ.

ჯანმრთელობა უმთავრესია

მაღალი ხარისხის საღებავიცა და შპალერიც ეკოლოგიურად სუფთა მასალისგან მზადდება. მიუხედავად ამისა, თუ ალერგიული ხართ ან მათ გამოყენებას ბავშვების ოთახში გეგმავთ, აუცილებლად დაინტერესდით შემადგენლობით და შეძენისას არჩევანი განსაკუთრებით ანტიალერგიულ მასალაზე გააკეთეთ.

სივრცე უფრო დიდი რომ გამოჩნდეს

ამ შემთხვევაში რეკომენდაციები მსგავსია: უპირატესობა ღია, ნათელ და პასტელურ ტონებს მიანიჭეთ, რადგან ასეთი ფერები სივრცეს ვიზუალურად მართლაც ადიდებს. შპალერის შემთხვევაში სპეციალისტები კიდევ ერთ რჩევას გვაძლევენ: თუ ნახატიან მასალას აირჩევთ, შპალერი ისე გააკარით, რომ ისინი კედელზე ვერტიკალურად მოექცეს. ასეთ დროს ფართი გაცილებით დიდი და მოცულობითი ჩანს.

მარაგები აუცილებელია

კედლის საფარი ავეჯისა და ტექნიკის მონტაჟისასაც შეიძლება დაზიანდეს, ამიტომ საკმაოდ ხშირია შემთხვევები, როდესაც ხარვეზების გამოსწორება ხდება საჭირო. ასეთ დროს,  მნიშვნელოვანია საღებავი თუ შპალერი ყოველთვის ზედმეტობით გქონდეთ შეძენილი და  აუცილებლობის შემთხვევაში, მარტივად გამოიყენოთ.

ზოგადადაც, მარაგის ქონა ყოველთვის სწორი გადაწყვეტილებაა. დროთა განმავლობაში მწარმოებლები ერთსა და იმავე მასალების გამოშვებას წყვეტენ. თქვენ კი შესაძლოა, გამოყენებული შპალერი ან საღებავი წლების შემდეგ დაგჭირდეთ, იდენტურის მოძიება კი გაგიჭირდეთ.  

და ბოლოს, ერთ-ერთი უკანასკნელი ტრენდი კედლების საკუთარი ხელით დამუშავებაა. ეს ტენდენცია თანაბრად ეხება ღებვასაც და შპალერის გაკვრასაც. ჰიპერმარკეტ „დომინოში“ იმ მასალებისა და ხელსაწყოების მრავალფეროვან არჩევანს აღმოაჩენთ, რომლებიც ამ სამუშაოების შესრულებაში დაგეხმარებათ ან ხელოსნისთვის დაგჭირდებათ. გვაქვს კედლის საფარის სხვა მასალებიც, მაგალითად, დეკორატიული პანელები, რომლებიც ასევე ძალიან პოპულარულია. თანაც, ახლა ზაფხულის სარემონტო შემოთავაზებები და 40%-მდე ფასდაკლება მოქმედებს. ასე რომ, აუცილებლად გვესტუმრეთ.