თანამედროვე სამზარეულო დიდი ხანია, მხოლოდ სასადილო ოთახის დანიშნულებას აღარ ითავსებს. მისი დამატებითი ფუნქციები კი, სტუდიოს ტიპის ბინებისა და დისტანციურად მუშაობის პოპულარობასთან ერთად, კიდევ უფრო გაიზარდა. საბოლოოდ, სამზარეულო იქცა სივრცედ, სადაც უკვე სტუმრებსაც ვიღებთ და ლეპტოპმომარჯვებულები დროდადრო სამსახურის საქმეებსაც ვასრულებთ.

რადგან სამზარეულოში ძალიან დიდ დროს ვატარებთ, მის დაგეგმარებასა და მოწყობასაც განსაკუთრებულ ყურადღებას ვუთმობთ. ყველას გვინდა, რომ ის ერთდროულად ფუნქციური, მოხერხებული, კომფორტული, მყუდრო, გემოვნებიანი და სახლის საერთო დიზაინთან ორგანულად თავსებადიც უნდა იყოს. და თუ ახლა სწორედ სამზარეულოს დაგეგმვას იწყებთ ან მის განახლებაზე ფიქრობთ, ჯერ ჩვენს ბლოგპოსტს გაეცანით. სასარგებლო რჩევები, რომლებსაც გიზიარებთ, არაჩვეულებრივ მეგზურობას გაგიწევთ და ამ საპასუხისმგებლო პროცესის წარმატებით დასრულებაშიც დაგეხმარებათ. 

ყველაფერი იწყება სახლის დაგეგმვით

უპირველესად, გადაწყვიტეთ, სად გექნებათ სამზარეულო და როგორი, მით უმეტეს, თუ არც ისე დიდი ფართი გაქვთ. უმეტესად მისი ადგილი — ბუნებრივი აირის და წყლის გაყვანილობის მიხედვით, წინასწარ არის ხოლმე განსაზღვრული, თუმცა ცვლილებების შეტანა ოპტიმალური სივრცის მისაღებად თქვენი სურვილით ყოველთვის შეგიძლიათ. ამ შემთხვევაში უბრალოდ გაითვალისწინეთ, რომ გაყვანილობების პირვანდელი სახის შეცვლისთვის დამატებითი დროისა და ფინანსების დახარჯვა მოგიწევთ. მაგალითად, აუცილებლად დაგჭირდებათ ნებართვა ბუნებრივი აირის მილის გადასატანად, სანიტარული კვანძების გადაწყობა და ა.შ. გახსოვდეთ ისიც, რომ სამზარეულოში, ცალკე იქნება ის თუ სტუდიოს სახით მისაღებთან გაერთიანდება, ფანჯარა აუცილებლად უნდა იყოს. 

სამზარეულოს მოწყობისას ბევრი უპირატესობას იზოლირებულ სივრცეს ანიჭებს, თუმცა თუ ფართი შესაბამის საშუალებას არ გაძლევთ, გული ნუ დაგწყდებათ. შეგიძლიათ, ის მისაღებისგან მცირე ვიტრაჟული ტიხრით ან უბრალოდ მაღალი მცენარეებით გამოყოთ. 
მომდევნო ეტაპი უკვე განლაგების დაგეგმვაა. ზოგადად, სამზარეულოს რამდენიმე ფორმა არსებობს: I ფორმა, Г ფორმა, G ფორმა, П ფორმა და კუნძული. პირველი ორი შედარებით მცირე ფართებისთვისაა განკუთვნილი, მომდევნო ორი ბარის განთავსებასაც გულისხმობს, მესამე კი, როგორც სახელიც მიგვანიშნებს, დამატებითი სასადილო ან სამუშაო სივრცის ორგანიზების საშუალებას იძლევა.

ფორმის მიუხედავად, განლაგების დაგეგმვისას მთავარი ე.წ. სამუშაო სამკუთხედია, რომელიც გაზქურისგან, მაცივრისა და ნიჟარისგან შედგება. სამზარეულოს ფორმების შესაბამისად, სამკუთხედი შეიძლება სხვადასხვაგვარად გამოიყურებოდეს, თუმცა, აუცილებელია, ეს სამი მნიშვნელოვანი ელემენტი ერთმანეთს არც ძალიან იყოს დაშორებული და არც უსაფრთხოების სტანდარტებს არღვევდეს. სწორად მათ დაგეგმვაზეა დამოკიდებული, რამდენად კომფორტული იქნება მოძრაობა საკვების მომზადების თუ დასუფთავების დროს.სამზარეულოს „სამუშაო სამკუთხედის“ პრინციპით მოწყობა პრაქტიკულ და ფუნქციურ სივრცეს გიქმნით: შეგიძლიათ, სწრაფად მისწვდეთ მის თითოეულ ელემენტს — ქურას, მაცივარსა და თუ ნიჟარას, დაიცვათ უსაფრთხოება და ნიჟარა თუ ჭურჭლის სარეცხი მანქანა მაცივარსა და ქურას დააშოროთ. ასევე, გარკვეული დისტანცია შექმნათ მაცივარსა და ქურას შორის, რაც მას გადახურებისა და ზედმეტი მუშაობისგან დაიცავს, თქვენ კი ენერგიას დაგიზოგავთ. 

მიუხედავად იმისა, რომ ბაზარზე მზა ავეჯის საკმაოდ დიდი არჩევანი არსებობს, დღესდღეობით მომხმარებლების დიდი ნაწილი მას შეკვეთით ამზადებინებს, რაც საშუალებას იძლევა, კარადები და ტექნიკა მათ სურვილებსა თუ სივრცის მახასიათებლებს მაქსიმალურად მოერგოს. კარადების განლაგების დაგეგმვისას მიჩნეულია, რომ ნივთები, რომლებიც ფუნქციურად დაკავშირებულია, ერთმანეთთან ახლოს, მარტივად მისაწვდომ ადგილას უნდა განათავსოთ.

თუმცა, არ დაგავიწყდეთ იმ ადამიანების ინდივიდუალურ მახასიათებლებიც, ვინც სამზარეულო უნდა გამოიყენოს. მისი დამზადებისას თქვენი სიმაღლე გაითვალისწინეთ და თუ ცაცია ხართ, კარადების განლაგებაც შესაბამისად დაგეგმეთ. სილამაზესა და ელეგანტურობასთან ერთად, აუცილებელია, ეს სივრცე თქვენთვის მაქსიმალურად მოსახერხებელი იყოს. 
ბოლო დროს ძალიან პოპულარულია სამზარეულოში კუნძულისა და ბარის გამოყენება, თუმცა დაფიქრდით, თუ არც ისე დიდი სივრცე გაქვთ, იქნებ ბარზე ან კუნძულზე უარი თქვათ და არჩევანი მხოლოდ გასაშლელ მაგიდაზე გააკეთოთ? ის ძალიან მოსახერხებელია და არც განსაკუთრებულ ფართს დაიკავებს.   

განათება — ის, რაც არ უნდა გამოგრჩეთ

სამზარეულოს განათება და, ზოგადად, ელექტროგაყვანილობა საგულდაგულოდ უნდა დაგეგმოთ. გახსოვდეთ, რომ ამ სივრცეში ნათურების გათვალისწინება განსაკუთრებით მნიშვნელოვანია, რადგან ოპტიმალური შუქი საკვების მომზადებისას აუცილებლად დაგჭირდებათ.

როგორც წესი, სამზარეულოში რამდენიმე ტიპის განათებას კომპლექსურად იყენებენ ხოლმე: ძირითადს, მაღალი ნათებით, შედარებით თბილს, მაგალითად, სასადილო მაგიდასთან და ფარულ ლედ ნათებას ე.წ. სამზარეულოს წინსაფართან, რომელიც საკვების მომზადებისასაც დაგეხმარებათ და თან მთლიან სივრცესაც დამატებით სიმყუდროვეს შემატებს. ძალიან კარგი გადაწყვეტილებაა რელსების განათების გამოყენებაც, რადგან ასეთ შემთხვევაში მოძრავ ნათურებს სასურველ წერტილზე თავად მიმართავთ. 

აუცილებლად დაგეგმვის პროცესშივე გააკონტროლეთ შტეფსელების მდებარეობა და განლაგებაც. შეუსაბამეთ ისინი როგორც მსხვილ, ისე წვრილ ტექნიკას, რომლის გამოყენებასაც აპირებთ. დარწმუნდით, რომ ყველა მათგანი საჭირო რაოდენობით გაქვთ და თითოეული მოწყობილობა დენის წყაროს დამოუკიდებლად უერთდება, რადგან გამანაწილებლების გამოყენება ამ შემთხვევაში რეკომენდებული არ არის.

მასალები და ფერები

დავიწყოთ იატაკით: სამზარეულო ის ადგილია, სადაც იატაკი ხშირად დაისვრება, დასველდება და ა.შ. შესაბამისად, მნიშვნელოვანია მასალა, რომელსაც აქ გამოიყენებთ, მარტივად იწმინდებოდეს და არ სრიალებდეს. ამიტომ უმჯობესია, არჩევანი ხარისხიან, გლუვ ფილებზე გააკეთოთ. ყურადღება გაამახვილეთ წინსაფრის მასალაზეც, რომელიც საკვების მომზადების დროს ასევე ისვრება. იატაკის მსგავსად, ამ შემთხვევაშიც აუცილებლად გამძლე ფილები დაგჭირდებათ, რომელსაც არც ტემპერატურის ცვალებადობა დააზიანებს და თან მარტივადაც გასუფთავდება. 

რაც შეეხება თავად კარადებს, ყველაზე პოპულარული ამჟამად მდფ-ით დამზადებული სამზარეულოებია. ეს მასალა საკმაოდ ხარისხიანია და დიზაინის თვალსაზრისითაც სხვადასხვა გადაწყვეტილების გამოყენების საშუალებას იძლევა.

საკმაოდ მნიშვნელოვანია სამზარეულოს ზედაპირის მასალის შერჩევაც: ამ შემთხვევაში მთავარი რეკომენდაცია გამძლეობაა. ეს ის ადგილია, სადაც საქმიანობა ყველაზე ხშირად მოგიწევთ, ამიტომ აუცილებელია მყარი მასალა, მაგალითად, ხელოვნური ქვა შეარჩიოთ.

აქვე ერთ რეკომენდაციას ნიჟარასა და შემრევებზეც მოგცემთ: მთავარია, მას სათანადო სიღრმე ჰქონდეს, რომ წყალი იატაკზე დიდი რაოდენობით არ გადმოგესხათ, მასალამ კი მაღალ ტემპერატურას მაქსიმალურად გაუძლოს. რაც შეეხება შემრევებს, ამ შემთხვევაშიც მნიშვნელოვანია, მათი ხარისხი და ვიზუალი, რომელიც საერთო სტილს უნდა შეესაბამებოდეს.

კიდევ ერთი მნიშვნელოვანი ფაქტორი ფერის შერჩევაა. ცხადია, ეს საკითხი თქვენს გემოვნებაზეა დამოკიდებული, თუმცა დიზაინერები მაინც გვირჩევენ, რომ მცირე ფართის სამზარეულოში არჩევანი ღია ფერებზე გავაკეთოთ, ვერტიკალური ფრეზირებითა და უსახელურო, ჭერამდე მიყვანილი კარადებით კი სივრცის ვიზუალური აღქმაც გავზარდოთ და — სათავსოების რაოდენობაც.

ტექნიკა

სამზარეულოს დაგეგმვის აუცილებელი ნაწილი სასურველი ტექნიკის შერჩევაა. ცნობილია, რომ პატარა ფართის შემთხვევაში, უმჯობესია, უპირატესობა ჩაშენებულ ტექნიკას მიანიჭოთ. მართალია, ეს არჩევანი ბიუჯეტს შედარებით გაგიზრდით, თუმცა სამაგიეროდ, სივრცეს შეგინარჩუნებთ და ნაკლებადაც იხმაურებს. 

ტექნიკის დაგეგმვისას არ გამოგრჩეთ გამწოვის ტიპის შერჩევაც. თავიდანვე გადაწყვიტეთ, ცალკე მდგომი გინდათ, თუ ჩაშენებული, რათა გაყვანილობა, თუ სამზარეულოს მთლიანი დიზაინიც მისი შესაბამისი იყოს.

საბოლოოდ, სამზარეულოს ოპტიმალურ ვარიანტს ყველა ზომის ფართში დაგეგმავთ. მთავარია, სივრცე მოხერხებული, ფუნქციური და ელეგანტური გამოვიდეს.