ულამაზესი ყვავილებითა და მცენარეებით მორთული ეზო ბევრი ადამიანის ოცნებაა, მით უმეტეს გაზაფხულსა და ზაფხულში, როცა სიმწვანესა და სიფერადეში დასვენებას მართლაც არაფერი სჯობს. რადგან ამ ყველაფრის დაგეგმვის საუკეთესო დრო სწორედ ახლაა, გვინდა, ჩვენი ბლოგპოსტით სეზონის კიდევ ერთ აქტუალურ თემას გამოვეხმაუროთ და სასარგებლო რჩევებითა თუ რეკომენდაციებით ეზოს მცენარეებით გამწვანება გაგიმარტივოთ.

სანამ ბაღის გაშენებას დაიწყებთ

ზოგადად, ეზოს მცენარეების შერჩევა მთლიანად თქვენს სურვილზეა დამოკიდებული, თუმცა აუცილებლად უნდა გაითვალისწინოთ მისი ფართობი, მდებარეობა და კლიმატური პირობები, რადგან შესაძლოა, სუბტროპიკულ მცენარეებს, რომლებიც დასავლეთ საქართველოში თავს საუკეთესო გრძნობენ და კარგად ხარობენ, აღმოსავლეთის ჰავა საერთოდ არ მოეწონოთ. მათი შერჩევისას საჭიროა, მხედველობაში იქონიოთ გამძლეობა, ტენიანობის ამტანობა, მზისა და სინათლის განაწილება, მოვლის სირთულე, რამდენად დიდი დროის დათმობა შეგიძლიათ გამწვანებისთვის და ა.შ. ამ ფაქტორებზე ყურადღების გამახვილება ოპტიმალური და მართლაც საუკეთესო ბაღის გაშენებაში დაგეხმარებათ. დანარჩენი კი მართლაც თქვენს გემოვნებაზეა დამოკიდებული.

ბუნებრივი ღობე

ბუნებრივი, ცოცხალი და ულამაზესი ღობის შესაქმნელად მცენარეები საუკეთესო გადაწყვეტილებაა. მოვლის სირთულემ არ შეგაშინოთ, რადგან ზოგიერთი მათგანი სრულიად უპრეტენზიოა. შეგიძლიათ, ღობისთვის მარადმწვანე და ფოთოლმცვენი მცენარეების ნაზავი შეარჩიოთ, მაგალითისთვის ძახველს, მრავალფოთოლა ბზას, ფშატს, რცხილას, ვაშლანას, ასკილს, ვერხვსა და ფოტინიას გირჩევდით. მათი კომბინაციები თქვენი ეზოს ფასადს მართლაც საოცარ სანახაობად აქცევს.

ტალავერი და ხვიარა მცენარეები

ლამაზი ტალავერი ნებისმიერ ეზოს დაამშვენებს. როგორც წესი, ფლორისტები ამ მიზნით გლიცინიას გვირჩევენ ხოლმე, მით უმეტეს, რომ ის წელიწადში ორჯერ - გაზაფხულსა და შემოდგომაზე ყვავის. თუმცა, გლიცინია ალერგიული ყვავილია და მის დარგვამდე ეს ფაქტორი აუცილებლად გაითვალისწინეთ. თუ სახლის კედლების გაფორმებაც გსურთ, მაშინ შეგიძლიათ, არჩევანი უსურვაზზე, ცხრატყავაზე, ჟასმინსა და სუროზე შეაჩეროთ. იმ შემთხვევაში კი, როცა დიდი სივრცე არ გაქვთ, უმჯობესია, უპირატესობა ვერტიკალურ გამწვანებას მიანიჭოთ და  ეზოში ხვიარა მცენარეები — კატაბარდა, დედოფლის ყვავილი, ხვიარა ვარდები, ცხრატყავა, ჩინური ლიმონური, ჟასმინი და სურო გაახაროთ.

მარტივად მოსავლელი მცენარეები

თუ ბაღის აგარაკზე გაშენებას აპირებთ და წინასწარ იცით, რომ მისთვის განსაკუთრებული ყურადღების დათმობას ვერ მოახერხებთ, უმჯობესია, ისეთი მცენარეები შეარჩიოთ, რომლებიც მარტივად მოსავლელია, ხშირ მორწყვას არ საჭიროებს და ამინდის ცვალებადობასაც კარგად უძლებს. ასე დროს უპირველესად მრავალფეროვან რუდბეკიას გირჩევდით, რომელიც მთელი ზაფხული ყვავილობს. კარგი გადაწყვეტილება იქნება კალიფორნიული ყაყაჩო, გვირილა, ვარდისფერი გველის სურო, ექინაცეა, სალბი, კვირისტავა, არმერია, გულყვითელა, ციმბირული ზანზალაკი, ციმბირული ზამბახი და უპრეტენზიო გეიჰერა, რომელიც ულამაზესი ფერის ფოთლებით წელიწადის ნებისმიერ სეზონზე გაგანებივრებთ.

მარადმწვანე მცენარეები

რა თქმა უნდა, ბაღში დასვენება ზამთარსა და გვიან შემოდგომაზეც არაჩვეულებრივია. თუ გსურთ, თქვენი ეზო წელიწადის ნებისმიერ დროს სიმწვანეში იყოს ჩაფლული, მაშინ უმჯობესია, არჩევანი მარადმწვანე მცენარეების დარგვაზე შეაჩეროთ. მაგალითისთვის, სალბი, ლავანდას, აიუგას, კოწახურს, ვერცხლისფერ ნაძვს, ჟასმინს, ხასხასა ფოტინიებს, მაგნოლიას, ღვიას, ტუიასა და ზეთისხილის ხეს გირჩევდით.

ვარდები

ყვავილების დედოფალი ცალკე გამოყოფას უსათუოდ იმსახურებს. თანაც, საქართველოში ის ეზოს გალამაზების ერთ-ერთი ყველაზე გავრცელებული გადაწყვეტილებაა. სხვადასხვა ჯიშის, ფორმისა და ფერის ვარდებით შეგიძლიათ, ღობეც მორთოთ, ხეივანიც გააშენოთ, სახლის შესასვლელი ან მოსასვენებელი ადგილები გააფერადოთ. გაითვალისწინეთ, რომ მათ მართლაც განსაკუთრებული ყურადღება სჭირდებათ, თუმცა ეს შრომა აყვავებული ვარდებით ტკბობად ნამდვილად ღირს.

ხეხილის მინი ბაღი

შესაძლოა, არც ისე დიდი ეზო გქონდეთ, თუმცა ეს არ ნიშნავს, რომ კენკრის ან ხეხილის გაშენებაზე უარი თქვათ. მით უმეტეს, რომ მებაღეობის ერთ-ერთი თანამედროვე ტრენდი ჯუჯა ჯიშების გაშენებაა. თანაც, გახსოვდეთ, რომ ზომის მიუხედავად, ყველა მათგანს უგემრიელესი ნაყოფი აქვს. ასე რომ, ლიმონთან ერთად, შეგიძლიათ, ვაშლი, მსხალი ან ქლიავიც გააშენოთ. ხეხილის ბაღს განსაკუთრებით გაგილამაზებთ წითელი ნეკერჩხალი, რომელიც მართალია, ნაყოფს არ მოგცემთ, მაგრამ, როგორც ფლორისტები ირწმუნებიან, საოცარ სიმშვიდეს მოგგვრით.

ბოსტანი

სალათის სხვადასხვაგვარი ფოთოლი, ორეგანო, როზმარინი, რეჰანი, პიტნა, მწვანილის სახეობები, კიტრი, პამიდორი, ბულგარული წიწაკა და კომბოსტო — მოკლედ, ყველაფერი, რაც სამზარეულოში გამოგადგებათ, შეგიძლიათ, საკუთარი ხელით მოიყვანოთ და ნაყიდზე კიდევ უფრო გემრიელად მიირთვათ. გაითვალისწინეთ, რომ ბოსტნის მოვლა არა მარტო პრაქტიკული, არამედ ძალიან სასარგებლო ჰობიცაა: ბევრი ადამიანისთვის ის განწყობისა და რელაქსაციის ერთ-ერთი საუკეთესო ხერხია.

ეზოს გამწვანების შემდეგ განსაკუთრებით საპასუხისმგებლო ეტაპი დგება -  სათანადო მოვლა, რათა თქვენი შრომა წყალში არ ჩაიყაროს და გაწეულმა ძალისხმევამ შედეგი მართლაც გამოიღოს. თუ დომინოს ბაღში გვესტუმრებით, შესაბამის მცენარეებსაც შეგარჩევინებთ, მოვლის რჩევებსაც გაგიზიარებთ და დაგეხმარებით, რომ წელიწადის ნებისმიერ დროს თქვენი ეზო ნამდვილი წალკოტი იყოს. თანაც, გაითვალისწინეთ, რომ დომინოს დაბადების დღესთან დაკავშირებით, 3-4 ივნისს ყველა სექციაში, მათ შორის ბაღშიც, განსაკუთრებული ფასდაკლებები დაგხვდებათ: ქოთნებზე — 40%-მდე, ყვავილებზე — 50%-მდე, ბაღის ავეჯზე  — 20%-მდე, ყოველი მეასე ჩეკი კი უფასო იქნება.