შროშანი (გალური „ლი-ლი“, ანუ თეთრი) არის ლამაზი და ნაზი ყვავილი, რომელიც დაამშვენებს ნებისმიერ ბაღს და აავსებს მას ზაფხულის შეუდარებელი სურნელით.

შროშანი მრავალწლიანი ბოლქვიანი მცენარეა,  ქმნის მსხვილ ყვავილედებს, რომელზეც შეიძლება 8-16, ხანდახან 30-მდე ყვავილიც იყოს. ყველა ყვავილი იშლება რიგრიგობით ქვევიდან ზევით, მათი ყვავილობის პერიოდი დაახლოებით ერთი კვირაა.

თანამედროვე ჰიბრიდული ჯიშები განსხვავდება კლასიკური შროშნისგან სხვადასხვა თვისებით, ფორმით, ფაქტურით, ფერითა და შეფერილობით.

რა უნდა იცოდეთ?

დარგვა. შროშნის დარგვისთვის გაზაფხული და შემოდგომა საუკეთესო პერიოდებია. შროშნის დარგვა საჭიროა ისეთ ადგილებში, სადაც მას არ დააზიანებს ქარი, გრუნტს უნდა ჰქონდეს კარგი დრენაჟი, ჰაერგამტარიანობა და სიმსუბუქე, ორგანული დანამატების, ტორფის და ნეშომპლის მცირე რაოდენობა. შეიძლება გრუნტის გამდიდრება მერქნის ნაცრით და სუფერფოსფატით, რაც მიანიჭებს ბოლქვს მინერალურ ნივთიერებებს. ფქვიერების უზრუნველყოფისთვის შეგიძლიათ გრუნტის და ქვიშის შერევა. ნაკელის დამატება სასურველია შემოდგომის პერიოდში.

ფოსოებს შორის დაშორება უნდა იყოს არანაკლებ 20 სმ, ხოლო სიღრმე - 5-10 სმ. სამხრეთსა და აღმოსავლეთში ბოლქვების მიწიდან ამოღება არ არის საჭირო, ხოლო დასავლეთში ბოლქვების ჩარგვა შეგიძლიათ სპეციალურ კალათებში და საჭიროების შემთხვევაში მარტივად ამოღებას შეძლებთ.

მოვლა. შროშნის მოვლა ითვალისწინებს მორწყვას, დამატებით კვებას, ნიადაგის გაფხვიერებას ყოველი მორყწვის შემდეგ და სარევლების მოშორებას. შროშნის ბოლქვები საჭიროებენ დაცვას გადახურვასა და გახმობისგან. ამიტომ ღია გრუნტში, სადაც შროშანი იზრდება, რეკომენდებულია სხვა დეკორატიული ყვავილების ჩარგვა იმისთვის, რომ შროშნის ქვედა ნაწილი დაცული იყოს, ხოლო ზედა მზეზე დარჩეს.

გამრავლება. შროშნებს ძირითადად ბოლქვის განცალკევებით ამრავლებენ. მისი გამოყენების ერთადერთი პირობა მდგომარეობს საწყისი მასალის შეზღუდული რაოდენობისა და ყველაზე ფასეული და იშვიათი ჯიშების მახასიათებლების შენარჩუნების სურვილში. რა თქმა უნდა, ამ პროცედურების ჩატარება არ არის რეკომენდებული ყვავილობის დროს, ვინაიდან ეს ნეგატიურ ზეგავლენას მოახდენს სარგავი მასალის მწიფობაზე.

მორწყა. ბაღში შროშანი საჭიროებს რეგულარულ და საგულდაგულო მორწყვას, მაგრამ არ უნდა დაუშვათ ტენის გაჩერება ფესვთა სისტემის ზონაში. თუ კლუმბზე არიან მცენარეები, რომლებიც ჩრდილავენ შროშნებს, რეკომენდებულია მორწყვის შემცირება. ყვავილობის დაწყებამდე შროშანს რწყავენ ხშირად - კვირაში 1-2-ჯერ, ყვავილობის შემდეგ ერთხელ. ცხელი ზაფხულის დროს იგი მოითხოვს ტენის მეტ რაოდენობას. ამიტომ, თუ შეამჩნიეთ, რომ ყვავილის ფოთლები დაშვებულია, მორწყეთ მცენარე და სხვა დროს აღარ დაუშვათ გრუნტის გამოშრობა. თუმცა ეს არ ნიშნავს იმას, რომ ჭარბი მორწყვა კარგი გამოსავალია. ბოლქვიან მცენარეებს ძირითადად აწუხებთ უხვად დატენიანებული ნიადაგი, ამიტომ იწყებენ ლპობას, ეფარებათ ნაცარი ან ზრდა მცირდება.

სასუქები. შროშნის სწორი მოვლა ითვალისწინებს დამატებით კვებას (3-4-ჯერ ზრდის მთელი პერიოდის განმავლობაში). ზრდის დასაწყისში მიწის ზედა ნაწილში მცენარე საჭიროებს აზოტის დიდ რაოდენობას. ამისთვის გამოსადეგია ისეთი ორგანული დანამატები, როგორიცაა ქათმის სკინტლი, ჰუმუსის მდგომარეობამდე აშმორებული ნაკელი. კოკორის ფორმირების დროს დაგჭირდებათ კალიუმი და ფოსფორი. ორივე შეგიძლიათ შეიყვანოთ ცალ-ცალკე 15 გრამი ყოველ 1 მ² ან გამოიყენოთ მზა კომპლექსური პრეპარატები. თუ თქვენ არ აპირებთ ბოლქვების მიწიდან ამოღებას, შემოდგომის პერიოდში ასევე უნდა უზრუნველყოთ მცენარეების მოვლა ორგანული და მინერალური სასუექბის დამატებით. გახსოვდეთ, რომ პროპორციების დაცვა მნიშვნელოვანია, ვინაიდან მისი სიჭარბე იწვევს მცენარეების დაავადებებს.

დაავადებები. როგორც ავღნიშნეთ, ბოლქვიანი მცენარეების დაავადების მიზეზებად შეიძლება იყოს გამოშრობა, ჭარბი მორწყვა, სასუქების ჭარბი რაოდენობა. არსებობს ისეთი დაავადებები, რომლების პროფილაქტიკა შესაძლებელია ფუნგიციდების სუსტი ხსნარების ან მერქნის ნაცრის გამოყენებით. კარგი ანტისეპტიკი ნაცარია და აფრთხობს მავნე მწერებს. აღსანიშნავია ისიც, რომ გამოშრობის პრევენციის მიზნით შეგიძლიათ მოახდინოთ კვლების მულჩირება მოთიბული ბალახით ან ტორფით.

ბოლქვების შენახვა. შემოდგომაზე, ყინვების დაწყებამდე, შეგიძლიათ მიუდგეთ მიწიდან ბოლქვების ამოღებას. ამ მომენტამდე არ უნდა მორწყათ 1-2 კვირის განმავლობაში და თუ დაემთხვა წვიმიანი პერიოდი, დაელოდეთ ნიადაგში ბოლქვების გაშრობას. ამოღებულ ბოლქვებს მოაცილეთ მიწა. შეეცადეთ არ დააზიანოთ ფესვები. რამოდენიმე დღის განმავლობაში დატოვეთ შროშანის ბოლქვები სუფთა ჰაერზე, შემდგომ კი ჩაალაგეთ სპეციალურ კალათებში ან ყუთებში მშრალი ქვიშით, თივით ან ნახერხით. ყუთები უნდა შეინახოთ მშრალ და გრილ ადგილას.

გაითვალისწინეთ: სახლის პირობებში შროშანმა შეიძლება გამოიწვიოს თავის ტკივილი.

იმედი გვაქვს, რომ ჩვენი რჩევების დახმარებით თქვენ გაალამაზებთ თქვენს ბაღს და დატკბებით მისი სურნელებით.

„დომინო“ წარმატებებს გისურვებთ!