ცხოვრების თანამედროვე რიტმში, როდესაც ყველაფერი მოსწრებაზეა, ხშირად გვიჩნდება ბუნებაში ყოფნის სურვილი, მაგრამ დროის უქონლობა არ გვიწყობს ხელს. გვსურს შევიძინოთ ოთახის მცენარე, მაგრამ გვაჩერებს ის, რომ მას სჭირდება მუდმივი მოვლა და ყურადღება.

ჩვენი პლანეტის ფლორა საკმაოდ მდიდარია და მისი მრავალფეროვნება მოგცემთ საშუალებას, რომ შეარჩიოთ ისეთი მცენარე, რომელიც დაამშვენებს ძალიან დაკავებული ადამიანის საცხოვრებელსაც.

• სანსევიერია მიეკუთვნება სუკულენტური მცენარეების რიგს და დაუჯერებლად კარგად იტანს ჩრდილს, რაც სუკულენტებს არ ახასიათებს. სანსევიერიას აქვს ლამაზი ფოთლები, მოუხდება ნებისმიერ ინტერიერს, ხშირ მორწყვა არ საჭიროებს - ზაფხულში კვირაში ერთხელ, ხოლო ზამთარში 2-3-ჯერ თვეში.

• ალოე ყველას უყვარს. რომც მეყვავილე არ იყოთ, ალოე მაინც გეცოდინებათ. ალოეს ბევრი სახეობა არსებობს და ყველა განსხვავებულად გამოიყურება. უყვარს მზე და იშვიათი მორწყვა - კვირაში 1-2-ჯერ, ხოლო ზამთარში უფრო იშვიათად - თვეში 2-ჯერ.

• კრასულას (ფულის ხე), როგორც ყველა სუკულენტს, უყვარს თავისუფლება, მზე და სულ ცოტა ყურადღება, მორწყვა 1-2-ჯერ კვირაში. შეიძლება მოგეჩვენოთ, რომ ძალიან უბრალოა, მაგრამ კარგად ერგება ნებისმიერ ინტერიერს და ამშვენებს მას თავისი უბრალოებით.

• კალანხოეც სუკულენტური მცენარეა. მომეტებულ ყურადღებას არ ითხოვს. საკმარისი იქნება, თუ კვირაში ერთხელ მორწყავთ და დატოვებთ კარგად განათებულ ადგილას. გაზაფხულზე კი კალანხოე გაიხარებს და გაგახარებთ დახვეწილი ფერადი ყვავილებით.

• ქლოროფიტუმი ლამაზი მცენარეა, რომელიც ამასთან ერთად არის ჰაერის საუკეთესო ფილტრატორი. იგი აქტიურად გამოყოფს ჟანგბადს, რაც აუმჯობესებს და აჯანსაღებს სივრცის ატმოსფეროს. ქლოროფიტუმს საერთოდ არ სჭირდება განსაკუთრებული საცხოვრებელი პირობები და უყვარს ზომიერი მორწყვა - არც იშვიათი და არც ზედმეტად ხშირი.

• ტრადესკანცია არის ამპელური მცენარე განუმეორებლად ლამაზი ფოთლებით. მისთვის იდეალური ადგილია კარგად განათებული კუთხე, მაგრამ მზის პირდარიპი გამოსხივების გარეშე. ზაფხულის დროს მორწყვა სჭირდება 2-3-ჯერ კვირაში. ზამთარში კი უფრო იშვიათად.

• სპატიფილუმი, იგივე „ქალთა ბედნიერება“. მას აქვს ნაზი ფოთლები და თეთრი ყვავილები. საკმარისია კვირაში 2-ჯერ მორწყვა და პერიოდული დანამვა. ზამთარში მორწყვა უნდა შეამციროთ - მაქსიმუმ ერთხელ კვირაში და დანამვა შეწყვიტეთ. სპატიფილუმის ნაზი ფოთლები კარგად ფილტრავენ ჰაერს და გამოყოფენ ჟანგბადს.

• ბენჯამენას ფიკუსი. ფიკუსის სახელგანთქმულობა იმდენად ფართოა, რომ ეს მცენარე საყოველთაოდ ცნობილია. ბენჯამენას ფიკუსი ამ მშვენიერი მცენარის გავრცელებული სახეობაა. კარგი განვითარებისთვის  სჭირდება ნათელი ადგილი და მორწყვა 2-ჯერ კვირაში. ფიკუსი ტენის მოყვარულია, ამიტომ მისი დანამვა არ იქნება უადგილო. ჭარბად არ მორწყათ - ფესვებთან გაჩერებული ტენი გამანადგურებელია ოთახის ყველა მცენარისთვის.

• დრაცენა ასევე ცნობილია, როგორც სიყვარულის ხე. დრაცენა არსებობს სხვადასხვა სახეობის, გამოირჩევა ულამაზესი ფოთლებით. მისი მოვლა ძალზედ მარტივია. მას უყვარს მორწყვა და დილის მზე. უიშვიათეს შემთხვევაში დრაცენა სახლის პირობებში ყვავილობს.

• ზამიოკულკასი (დოლარის ხე). ეს დახვეწილი მცენარე ყურადღებას იზიდავს ფოთლების სილამაზით. ზამიოკულკასი საკმაოდ ამტანია და არ ეწყინება, თუ პირდაპირ მზეზე არ მოათავსებთ. მორწყვა უნდა ზომიერი - თვეში ორჯერ ზაფხულში, ხოლო ზამთარში თვეში ერთხელ.

როგორც უკვე მოგახსენეთ, ამ მცენარეებს არ სჭირდებათ მომეტებული ყურადღება, ამიტომ ფოთლები მტვრისგან უნდა მოასუფთაოთ კვირაში ერთხელ და ისიც მხოლოდ მსხვილფოთლოვან მცენარეებს.
ოთახის არც ერთ მცენარეს არ უყვარს ორპირი ქარი, ამიტომ ზამთარში ოთახის განიავების დროს მოარიდეთ თქვენი მცანარეები ჰაერის ძლიერ ნაკადებს, ხოლო ზაფხულში დაიცავით კონდიციონერისგან (განსაკუთრებით ფიკუსი).

მცენარისთვის ადგილის შერჩევისას გაითვალისწინეთ, რომ ბევრი ყვავილოვანი მცენარე ჩრდილში ვერ/არ ყვავილობს. სანსევერია კი ყვავილობს, თუ ჩარგულია პატარა ქოთანში. ცხოვრების გამალებით, ერთფეროვან ნაკადში ოთახის მცენარე ზრდა-განვითარებით დაგეხმარებათ ყოველდღიური რუტინის გადატანაში. ეს არის ხელმისაწვდომი საშუალება იმისთვის, რომ ბუნების სიახლოვე იგრძნოთ.

„დომინო“ წარმატებებს გისურვებთ!