ბოლო წლებში თანამედროვე ადამიანების ცხოვრებისა და მუშაობის სტილი მნიშვნელოვნად შეიცვალა. პანდემიის დასრულების შემდეგ არაერთმა დამსაქმებელმა ჰიბრიდული გრაფიკი შემოიღო და თანამშრომლებს ნაწილობრივ სახლიდან მუშაობის საშუალება მისცა. ამას გარდა, ბევრი პროფესიის წარმომადგენლისთვის სულ უფრო პოპულარული ხდება ფრილანსერობა და დამკვეთებისთვის დავალებების დისტანციურად, სასურველ სივრცეში შესრულება.

რასაკვირველია, ეს ბოლოდროინდელი ცვლილებები ადამიანების გემოვნებასა და საჭიროებებზეც აისახება, ამიტომ მათ დიდ ნაწილს სურს, სამუშაოდ, თუნდაც მცირე კუთხე, სახლშიც ჰქონდეს. ბუნებრივია, ეს სურვილი ბინის დაგეგმვისა და მოწყობის პროცესზეც ახდენს გავლენას. ჩვენი ბლოგპოსტიც სწორედ სამუშაო სივრცეზეა და თუ რემონტს ახლა გეგმავთ, ან ბინის ამ ნაწილს უკვე აწყობთ, გამოგვყევით: მასში ბევრ საინტერესო რეკომენდაციას აღმოაჩენთ.

სად მოვაწყო სამუშაო სივრცე

რა თქმა უნდა, უმჯობესია, სამუშაო სივრცისთვის ადგილი რემონტის დაწყებამდე, დაგეგმარების პროცესშივე შეარჩიოთ. გამოყოთ ბინის ისეთი ნაწილი, რომელიც შედარებით მშვიდი იქნება და საქმიანთან ერთად, სასიამოვნო გარემოსაც შეგიქმნით.

გაითვალისწინეთ, რომ წლების წინანდელი ტენდენცია, რომელიც სამუშაოდ აუცილებლად  მთლიანი ოთახის გამოყოფას ითვალისწინებდა, უკვე შეცვლილია. რასაკვირველია, თუ შესაბამისი ფართი გაქვთ, ცალკე კაბინეტის მოწყობა მთლიანად თქვენს სურვილზეა დამოკიდებული, თუმცა თანამედროვე მიდგომებით, სამუშაო სივრცის შექმნა ძალიან მცირე ზომის ფართშიც კი შეგიძლიათ. მაგალითად, სტუდიოს ტიპის ბინებში საკმაოდ გავრცელებულია მისაღები ოთახის ფუნქციური ზონირება და ერთ-ერთი მათგანის სამუშაო დანიშნულებით გამოყენება. ამ მიზნით, ინტერიერის დიზაინერები არა მარტო კედლის ნიშებსა და კუთხეებს, არამედ ფანჯრის რაფებსაც კი იყენებენ. ამიტომ, თუ რემონტის დროს საქმიანი ნაწილი არ გაგითვალისწინებიათ, გახსოვდეთ, რომ მისი მოწყობა შემდეგაც შეგიძლიათ.

ამუშაო სივრცის დაგეგმვისას განსაკუთრებით აქტუალურია მისი შემოსაზღვრა ელეგანტური ელემენტებით, რომლებიც დამატებით შტრიხებს მთლიანად ბინის ინტერიერს შემატებენ. მაგალითად, კაბინეტი შეგიძლიათ, გასასრიალებელი ან დასაკეცი კარით გამოყოთ, მისაღებ ოთახში სამუშაო კუთხის ზონირებისთვის კი დეკორატიული ტიხარიგამოიყენოთ. სხვათა შორის, პატარა ფართის შემთხვევაში, ამ ფუნქციას მაღალი მცენარეც შესანიშნავად შეასრულებს.

რა ტიპის ავეჯი დამჭირდება 

ადგილის შერჩევის შემდეგ ავეჯის ჯერი დგება. თქვენი საჭიროებისა და გამოყოფილი ფართის მიხედვით შეგიძლიათ, სივრცე მინიმალისტურად გადაწყვიტოთ და იქ მხოლოდ შესაბამისი ზომის მაგიდა და სკამი განათავსოთ. მთავარია, ორივე მათგანი თქვენთვის განსაკუთრებულად კომფორტული იყოს და პროდუქტიულობაში დაგეხმაროთ. თუ სივრცე საშუალებას გაძლევთ, გირჩევთ, კედელზე თაროებიც მიამაგროთ. თაროები და უჯრები წიგნებისთვის ან თუნდაც ამ სივრცის მცენარეებით გაფორმებისთვის აუცილებლად გამოგადგებათ.

განათება

განათება სამუშაო სივრცის მოწყობისას განსაკუთრებულ როლს თამაშობს. ზოგადად, საუკეთესო გადაწყვეტილებად ამ დანიშნულებით ისეთი ფართის შერჩევაა რეკომენდებული, რომელსაც ბუნებრივი შუქი უხვად ხვდება, თუმცა თუ ასეთ კუთხეს ვერ გამოყოფთ, სურვილზე უარს ნუ იტყვით: არასაკმარისი ბუნებრივი განათება შეგიძლიათ, ხელოვნურით შეავსოთ. რელსის ტიპის, იატაკის ან მაგიდის სანათები ამ შემთხვევაში საუკეთესო გადაწყვეტილება იქნება. რაც შეეხება ნათების ტიპს, სპეციალისტები სამუშაოდ მაინც ნეიტრალური ფერის ნათებას უწევენ რეკომენდაციას.

ფერები და დეკორი

სამუშაო სივრცე ბინის ნაწილია და, ცხადია, ფერებიც საერთო ტონალობასა და სტილს ორგანულად უნდა ეხამებოდეს, თუმცა შეგიძლიათ, ფუნქციის შესაბამისად, ის დეკორატიული შპალერის, პანოს ან ფოტოების დახმარებით გააფორმოთ,
საუკეთესო დეკორი სამუშაო სივრცისთვის გამწვანება იქნება. მცენარეები, განსაკუთრებით კი კაქტუსები და სუკულენტები, არა მარტო გააჯანსაღებენ თქვენს საქმიან გარემოს, არამედ მასში მეტ სიმშვიდესა და სასიამოვნო განწყობასაც შემოიტანენ.

სამუშაო სივრცის მოწყობამდე აუცილებლად გამოგვიარეთ „დომინოში“. ჩვენს ჰიპერმარკეტებში თქვენი საქმიანი კუთხისთვის ბევრ საინტერესო გადაწყვეტას - განათებას, ავეჯს, დეკორს თუ სხვა ნივთებს აღმოაჩენთ.