მართალია, უკვე აცივდა და ადამიანებიც ეზოებშიც იმდენად დიდ დროს აღარ ატარებენ, თუმცა მოვლა ამ სივრცეებს მაინც სჭირდება, თანაც, განსაკუთრებული. შემოდგომის ფოთოლცვენა, გახშირებული ქარი და, ზოგადად, სეზონის ცვლილება ეზოს მოვლაზეც აისახება. საბედნიეროდ, უკვე არსებობს ისეთი ხელსაწყოები, რომლებიც ამ პროცესს არა მარტო ამარტივებს, არამედ სახალისოსაც ხდის. ჩვენი ახალი, საშემოდგომო ბლოგპოსტიც სწორედ ამ მოწყობილობებზეა: გამოგვყევით და აღმოაჩინეთ ხელსაწყოები, რომლებიც ეზოს მოვლას ბევრად კომფორტულ და სასიამოვნო საქმიანობად აქცევს.

ბაღის მტვერსასრუტი

ერთ-ერთი ყველაზე სასარგებლო და მოსახერხებელი მოწყობილობა, რომელსაც განსაკუთრებით ამ სეზონზე გამოიყენებთ, ბაღის მტვერსასრუტია. ის მართლაც იდეალურია სხვადასხვა ფართობის, მათ შორის, საკმაოდ დიდი სივრცის დასასუფთავებლად.

როგორც წესი, თანამედროვე მწარმოებლების მიერ შექმნილი მტვერსასრუტები მარტივად გადასაადგილებელია. ამასთან, ხელსაწყოები აღჭურვილია ჰაერის მძლავრი ნაკადით, რაც საშუალებას გაძლევთ, ეზო სველი ფოთლებისგანაც კი სწრაფად გაწმინდოთ. მოწყობილობები სიმაღლეშიც ადვილად რეგულირდება, მათი ტომრები კი კომფორტულად იცლება.

აღსანიშნავია, რომ დღესდღეობით ბაზარზე ხელმისაწვდომია ბაღის მტვერსასრუტების ისეთი მოდელებიც, რომლებიც იდეალურია არა მარტო ფოთლის, არამედ ხის, ნახერხისა და ლითონის ნარჩენების შესაგროვებლად, მულჩირებისა და დაქუცმაცების ფუნქციების შესასრულებლად. გაითვალისწინეთ ისიც, რომ შეგიძლიათ, როგორც ბენზინზე, ისე აკუმულატორებსა და ელექტროენერგიაზე მომუშავე ხელსაწყოების შერჩევა. 

დასაქუცმაცებელი მოწყობილობა

კიდევ ერთი მოსახერხებელი მოწყობილობები ეზოსა თუ ბაღის მოვლისთვის დასაქუცმაცებლებია. ხელსაწყოები, როგორც წესი, აღჭურვილია დიდი მოცულობის კონტეინერებით და საშუალებას გაძლევთ, მარტივად და უსაფრთხოდ დააქუცმაცოთ ტოტები, გაასუფთაოთ ვრცელი ფართობი და, რაც მთავარია, მისი გადაადგილებაც  კომფორტულია.

დასაქუცმაცებლებით სარგებლობა, როგორც წესი, სპეციფიკურ ცოდნას არ მოითხოვს, თუმცა, გაითვალისწინეთ, რომ როგორ მათი, ისე მტვერსასრუტების გამოყენების შემთხვევაში, სპეციალური სათვალე და ხელთათმანი აუცილებლად უნდა მოირგოთ. 

გაზონისა და ბალახის საკრეჭები

ავტომატურ მოწყობილობებზე საუბრისას აუცილებლად უნდა გირჩიოთ გაზონის საკრეჭებიც. დღესდღეობით ამ ხელსაწყოების მართლაც ძალიან დიდ არჩევანს შეხვდებით, თანაც, ბევრი მათგანი რამდენიმე დანიშნულებას აერთიანებს და მოცელვის, შეგროვებისა და მულჩირების ფუნქციებს ასრულებს.

ეზოს მოვლას შეგიმსუბუქებთ ბუჩქის საკრეჭებიც, რომლებიც მოსახერხებელი გამოსაყენებელია და არა მარტო ბუჩქების, არამედ გაზონებისა და ღობეების სწრაფად გაკრეჭვაშიც დაგეხმარებათ.

სხვათა შორის, შეხვდებით კომპაქტურ და მსუბუქ რობოტ საკრეჭებსა და პორტატიულ მულტიხელსაწყოებსაც, რომლებიც ერთდროულად სეკატორის, ბალახის ტრიმერისა და ბუჩქების მჭრელის დანიშნულებებს ითავსებს. 

სეკატორი

თუ ეზოში ყვავილები და ბუჩქები გაქვთ, მაშინ სეკატორი აუცილებლად დაგჭირდებათ. ის მცენარეების მოვლისთვის შეუცვლელი ხელსაწყოა და თქვენს შრომასაც ძალიან შეამსუბუქებს. ბაზარზე სხვადასხვა ზომის დიამეტრის მქონე სეკატორებს შეხვდებით, თუმცა შერჩევისას აუცილებელია, ზუსტად იცოდეთ, კონკრეტულად რისთვის გჭირდებათ ის, რადგან შესრულებული სამუშაოს ხარისხი სწორად შერჩეულ სეკატორზე მნიშვნელოვნადაა დამოკიდებული.

ფოცხი

ფოთლებისა და ბალახის შესაგროვებლად, ყველაზე ტრადიციული, იდეალური და ხელმისაწვდომი ხელსაწყო  ფოცხია. სხვათა შორის, სხვადასხვა ფორმის, მასალისა და კბილანების ფოცხებთან ერთად, საბავშვო დანიშნულების ხელსაწყოებსაც შეხვდებით, ამიტომ  თუ პატარები გყავთ, შეგიძლიათ, ფოცხები მათთვისაც შეიძინოთ და ეზოს დალაგების პროცესი ბავშვებთან ერთად გაიხალისოთ.

შეშის ელექტროსაჩეხი და ხერხი

უკვე საკმაოდ აცივდა და ბევრმა თქვენგანმა, ალბათ, ბუხარიც ააგიზგიზა. შეშის მომხმარებლებს განსაკუთრებით ელექტროსაჩეხები დაგაინტერესებთ — კომპაქტური ხელსაწყოები, რომლებიც შეშის გასაპობად იდეალური გადაწყვეტილებაა. მოწყობილობები აღჭურვილია ხელის მართვის სისტემებით, რომლებიც თქვენს უსაფრთხოებას მაქსიმალურად იცავს, დამატებითი სადგამები კი ამ პროცესს კიდევ უფრო მოსახერხებელს ხდის. 

რასაკვირველია, არ უნდა დაგვავიწყდეს ტრადიციული ხერხიც. მრავალმხრივი კბილანების, მოსახერხებელი სახელურებისა და დაკეცვის ფუნქციების დახმარებით, თანამედროვე ხერხები მრავალფეროვანი დანიშნულებით შეგიძლიათ გამოიყენოთ.

თოვლის საწმენდი მანქანები

ზამთარი სულ მალე მოვა და, იმედია, თოვლიც. თუმცა, მას ჟრიამულსა და მხიარულებასთან ერთად, დამატებითი მოვლის საჭიროებაც მოაქვს. თუ თქვენი ეზო ან მიმდებრე სივრცე თოვლით ხშირად იფარება, მაშინ სპეციალური საწმენდი მანქანის გამოყენებას გირჩევთ: ნაკლებად ხმაურიანი მოწყობილობა შესანიშნავად უმკლავდება ნალექს და თან ძალიან კომპაქტურია: იკეცება, მცირე ადგილს იკავებს და შესანახადაც მარტივი და კომფორტულია. 

რა თქმა უნდა, დომინოს ორივე ფილიალში ეზოს მოწყობილობების ფართო არჩევანი გელოდებათ. გვესტუმრეთ და, ჩვენს კონსულტანტებთან ერთად, შეარჩიეთ სასურველი ხელსაწყოები, რომლებიც დიდი ხნის განმავლობაში ერთგულად მოგემსახურებათ.