მალე კიდევ უფრო დათბება და ზამთრის შემდეგ აივანი კვლავაც განსაკუთრებით საყვარელ ადგილად იქცევა — მყუდრო, დასასვენებელ სივრცედ, სადაც მზესაც მიეფიცხებით, ყავასაც მიირთმევთ და იმუშავებთ კიდეც. ახლა სწორედ ის დროა, როცა ბევრი ადამიანი სახლის ამ ნაწილის მოსაწყობად ან გასაახლებლად ემზადება და ცდილობს, საკუთარი სურვილები და გემოვნება თანამედროვე ტრენდებს შეუსაბამოს. თუ თქვენც მათ შორის ხართ, ჩვენი ახალი ბლოგპოსტი არ გამოგრჩეთ, რადგან ამჯერად სწორედ აივნის მოწყობაზე გიამბობთ, განსაკუთრებულ აქცენტს კი ავეჯის შერჩევასა და გამწვანებაზე გავაკეთებთ.
მაშ ასე, გამოგვყევით: მოგიყვებით ყველაფერს, რაც ტრენდული, თქვენი ოცნების აივნისთვის დაგჭირდებათ.

როგორ განვსაზღვროთ ავეჯი აივნისთვის
უპირველესად შეაფასეთ აივნის ფართობი და ავეჯის განლაგება, მასალა თუ მრავალფეროვნება მას შეუსაბამეთ. მთავარია, გახსოვდეთ, რომ სწორი დაგეგმარებითა და ოპტიმალური შერჩევით, სასიამოვნო და კომფორტული სივრცის მოწყობა ნებისმიერ შემთხვევაში შეგიძლიათ.
ზოგადად, აივნისთვის ერთგვარ მინიმალურ აუცილებლობას წარმოადგენს ყავის მაგიდა მინიმუმ ორი სავარძლით, რომელთა სტილიც სივრცის ზომაზეა დამოკიდებული. ძალიან პატარა აივნისთვის ოპტიმალური გადაწყვეტილება დასაკეცი სკამები და დასაკიდი, მცირე მაგიდაა.
ასეთი ავეჯი არც გადაადგილებაში შეგიშლით ხელს, ფართსაც დაგიზოგავთ და თქვენს ყოველდღიურობასაც დამატებით კომფორტს შესძენს.

რაც უფრო დიდია აივანი, მით მეტად შეგიძლიათ მისი გამრავალფეროვნება, მაგალითად, შედარებით მაღალი მაგიდის დადგმა, რომელზეც ლეპტოპის დადებასაც მოახერხებთ და სივრცეს სამუშაო პროცესისთვისაც გამოიყენებთ. თუ აივანი საშუალებას გაძლევთ, აუცილებლად იფიქრეთ დივნის ან ინტეგრირებული ბენჩის განთავსებაზეც: თუნდაც მცირე ზომის რბილი ავეჯი ფართსაც გაალამაზებს და მეგობრებთან ან ოჯახის წევრებთან დროის სასიამოვნოდ გატარებაშიც დაგეხმარებათ.

რაც შეეხება ტერასული ტიპის მოცულობით ფართს, ბუნებრივია, მას კიდევ უფრო მდიდარი ფუნქციონალი აქვს, ამიტომ ამ შემთხვევაში უკვე ავეჯის კომპლექტის, საქანელების, სარწეველა სკამების, პუფების, გასაშლელი სავარძლების, შეზლონგებისა და ქოლგების დადგმაც შეგიძლიათ. თუმცა, გაითვალისწინეთ, რომ აივნის ზედმეტად გადატვირთვა საჭირო არ არის: ავეჯი ისე უნდა განალაგოთ, რომ მან გადაადგილებაში ხელი არ შეგეშალოთ. 

რა მასალის ავეჯია ოპტიმალური აივნისთვის

აივნის ავეჯი მასალითა თუ მთლიანი დიზაინით ბინის საერთო ინტერიერს, სტილსა და ფერებს უნდა ესადაგებოდეს. დღესდღეობით მწარმოებლები მომხმარებლებს, ძირითადად, მოწნულ, ხის, ლითონისა და პლასტმასისგან დამზადებულ ავეჯს სთავაზობენ. თითოეულს საკუთარი ფუნქცია და უპირატესობა აქვს. მაგალითად, პლასტმასა მარტივად მოსავლელი და შედარებით ხელმისაწვდომია, თუმცა ტემპერატურის ცვალებადობის მიმართ დაბალი გამძლეობა აქვს. გაცილებით მაღალი ხარისხისაა ხე, თუმცა მისგან დამზადებული ავეჯიც გარემო პირობების მიმართ ნაკლებად მდგრადია.

ბოლო პერიოდში აივნებზე, განსაკუთრებით ლოფტის ტიპის ინტერიერის ბინებში, ძალიან პოპულარულია ლითონის ავეჯის გამოყენება, რომელიც გამძლეცაა, ელეგანტურიც და მოდურიც. განსაკუთრებით ტრენდულია მოწნული და რატანისგან დამზადებული ავეჯიც, თუმცა, თუ არჩევანს ამ ტიპის მასალაზე შეაჩერებთ, გახსოვდეთ, რომ აუცილებელია, ის წვიმის, ქარისა თუ სხვა გარემო პირობებისგან კარგად იყოს დაცული.

მცენარეები აივნისთვის

მცენარეები ნებისმიერი აივნის განსაკუთრებული, განუყრელი ატრიბუტია. მით უფრო, რომ მცირე ფართის შემთხვევაშიც კი, მოაჯირებსა და კედლებზე დასამაგრებელი საკიდები თუ ქოთნები საშუალებას გაძლევთ, თქვენს აივანს სიჯანსაღე და სილამაზე შემატოთ.

მცენარეებისა და ყვავილების არჩევანი კი მართლაც ბევრია. თუ ფერადი ყვავილები მოგწონთ, შეგიძლიათ, ვიოლები, პეტუნიები, ჰიბისკუსი ან მარადმწვანე ჰებე შეარჩიოთ. აივანზე კარგად ხარობს კესანე, ვერბენა, გოდეცია, პელარგონია, კალანჰოე, სენპოლია, ორქიდეა, აფრიკული გვირილა, კლემატისი, გულყვითელა, გეორგინა, აზალია და, რა თქმა უნდა, ვარდი, რომელიც სამართლიანად ითვლება ყვავილების დედოფლად. 

აივნის მორთვისთვის მრავალფეროვანი არჩევანი გაქვთ მაშინაც, თუ მხოლოდ გამწვანება მოგწონთ. ამ შემთხვევაში ხვიარა მცენარეები, მაგალითად სურო, გამოგადგებათ. კარგი გადაწყვეტილება იქნება მარადმწვანე აკუბა, ტუია, კვიპაროსი, ბზა და დეკორატიული ნაძვიც.

აუცილებლად უნდა შეგახსენოთ ბოლო დროის გავრცელებული ტრენდის, ქალაქური ბოსტნის შესახებაც, რომელსაც აივანზე არაერთი ადამიანი აწყობს. დარგეთ რეჰანი, ბაზილიკი, როზმარინი, ქინძი ან პესტო, თავად მოიყვანოთ თუნდაც მცირე ზომის ჯანსაღი ბოსტნეული, რომელსაც შემდეგ კერძების მომზადებისასაც გამოიყენებთ.

რა თქმა უნდა, არ დაგავიწყდეთ, რომ დომინოში ბაღის დღეები გვაქვს და 21 აპრილის ჩათვლით ჩვენს ფილიალებში ბაღის ავეჯს, ყვავილებს, ნერგებს, მცენარეებს, ქოთნებსა და თქვენი აივნებისთვის კიდევ ბევრ საინტერესო ნივთს სპეციალური, 40%-მდე ფასდაკლებით შეიძენთ.