ჰაერში გაზაფხულის სურნელი დატრიალება სარემონტო სამუშაოებისთვის საუკეთესო სეზონის დადგომასაც ნიშნავს. ახლა, ალბათ, ბევრი ადამიანი სწორედ კარგ ამინდსა და ძალიან მნიშვნელოვან პროცესის, რემონტის დაწყებას ელოდება.

და თუ თქვენც ერთ-ერთი მათგანი ხართ, გამოგვყევით, რადგან ამ ბლოგპოსტში რემონტის ყველა ეტაპს ოპტიმალური თანმიმდევრობით გავივლით.

პირველი ნათელი წერტილი თუ რემონტს ახალაშენებულ კორპუსში იწყებთ, მაშინ გაითვალისწინეთ, რომ უპირველესად სახლში ელექტროენერგიის მოქმედი წყარო და, შესაბამისად, ამომრთველის, ე.წ. „რუბილნიკის“ დამონტაჟება დაგჭირდებათ. მაინცდამაინც მაღალხარისხიანსა და ძვირადღირებულს ნუ შეიძენთ, რადგან შეიძლება, სამუშაოების დროს დაგიზიანდეთ. იყიდეთ რამე შუალედური, რომელსაც რემონტის პროცესში გამოიყენებთ, ბოლოს კი, როცა ელექტრობას დაასრულებთ, გამოცვლით.

ტიხრების აშენება ან გადაწყობა თუ შავი კარკასი შეიძინეთ, მაშინ რემონტიც ტიხრების აშენებით უნდა დაიწყოთ, მაგრამ თუ არსებული განლაგების შეცვლა გინდათ, ჯერ დანგრევა მოგიწევთ. გაითვალისწინეთ, რომ მთავარი უსაფრთხოებაა, ამიტომ საყრდენ კედლებს ძალიან უნდა გაუფრთხილდეთ: მათი დანგრევა ან დაზიანება არ შეიძლება.ოთახების არსებული სქემის გადაწყობისას, არ არის გამორცხული, კედლების გასუფთავებაც მოგიწიოთ: მაგალითად, დამატებითი სივრცის გალესვა ან ნალესის აღება იქ, სადაც თქვენ ფილის გაკვრა გსურთ, ამიტომ მხედველობაში ეს ფაქტორიც იქონიეთ.

ელექტრო გაყვანილობა იხრების შემდეგ ელექტრო გაყვანილობის ჯერია. პირველ ეტაპზე ელექტრიკოსი დაქსელვის სამუშაოებს თქვენთან შეთანხმებული სქემის მიხედვით შეასრულებს. გახსოვდეთ, რომ ყველა წერტილის არსებობა მაქსიმალურად გადააკონტროლეთ, რადგან მოგვიანებით შესაძლოა, გამოსწორება გაგიჭირდეთ. დაკაბელების პროცესში, რომელიც ინტერნეტის კაბელის მონტაჟსაც ითვალისწინებს, კარგ დახმარებას თქვენც და სპეციალისტსაც არქიტექტორ-დიზაინერის მიერ შესრულებული ნახაზი გაგიწევთ, თუმცა თუ ეს ნახაზი არ გაქვთ, სთხოვეთ, ელექტრიკოსს, მარტივი სქემა მაინც მოგიმზადოთ: შეიძლება, სამომვალოდ დაგჭირდეთ. რა თქმა უნდა, ელექტროობა ამით არ მთავრდება: სამღებრო სამუშაოების დასრულების მერე ელექტრიკოსი შტეფსელებს და ჩამრთველებს ამონტაჟებს, სულ ბოლოს კი — ნათურებს, ჭაღებს, ავტომატებსა და ელექტროენერგიის გამანაწილებელ ფარს.

სანიტარული კვანძების გაყვანილობა თანამედროვე მასალების დახმარებით, სანიტარული კვანძების გაყვანილობის მონტაჟი ადრინდელივით რთული აღარ არის. გაითვალისწინეთ, რომ დღეს უკვე სანტექნიკოსებს გათბობის სისტემებიც გაჰყავთ და შესაძლოა, დამატებითი ხელოსნის მოძიება არც დაგჭირდეთ. ამ შემთხვევაშიც საქმის განაწილება მოგიწევთ: ჯერ მილები უნდა გაიყვანოთ, ფილების დაგების შემდეგ საშხაპე, აბაზანა, უნიტაზი და ონკანები დაამონტაჟოთ, სამღებრო სამუშაოების დასრულების მერე კი — რადიატორები და გათბობის ქვაბი. კარგი ისაა, რომ სანიტარული კვანძების გაყვანილობის დაწყება სხვა სამუშაოების, მაგალითად, ელექტრო გაყვანილობის დაქსელვის პარალელურადაცაა შესაძლებელი.

იატაკის მოჭიმვა-მოსწორება ტერმინმა რომ არ დაგაბნიოთ, ეს იგივე „სტიაშკაა“. იატაკის თანაბრად მოსწორება ნებისმიერი მასალისთვის - ფილისთვის, ლამინატისა თუ პარკეტისთვის ერთგვარ ბაზას ქმნის. გახსოვდეთ, რომ ამ დროს იატაკის საფარი უკვე შერჩეული უნდა გქონდეთ, რათა ხელოსანმა მისი სიმაღლე გაითვალისწინოს და დასაგები მასალისთვის მთელ სახლში თანაბარი დონე შექმნას. არ გამოგრჩეთ გაყვანილობისთვის ფოტოს გადაღებაც: იატაკქვეშა მილების მდებარეობა ძალიან მნიშვნელოვანი ინფორმაციაა, რომლის ზუსტი ცოდნაც იატაკის დაგების, ან მაგალითად, შუშის ტიხრების მონტაჟის დროს მათი დაზიანებისგან დაგაზღვევთ.

ფილების დაგება გაყვანილობის გამართვის შემდეგ ფილების დაგების ეტაპი დგება. უსაფრთხოების ზომების დასაცავად, თანამედროვე რემონტის პროცესი აბაზანაში კედლებისა და იატაკის ჰიდროიზოლაციით დამუშავებასაც ითვალისწინებს. ზოგჯერ ჰიდროიზოლაცია ზედმეტ ხარჯადაა მიჩნეული, თუმცა გახსოვდეთ, რომ ის წყლის გაჟონვისგან არა მარტო თქვენ, არამედ მეზობლებსაც იცავს და გირჩევთ, ის მინიმუმ სანტექნიკის წერტილებთან მაინც გამოიყენოთ. ამ ეტაპის კიდევ ერთი რჩევა ასეთია: აივანზე აუცილებლად ყინვაგამძლე ფილებითა და წებოცემენტი ისარგებლეთ.  

ლესვა და სამღებრო სამუშაოები სამღებრო სამუშოები რემონტის ის ერთ-ერთი მნიშვნელოვანი ეტაპია, რომელიც დიდ დროით რესურსსაც მოითხოვს, ამიტომ კედლების გალესვა შეგიძლიათ, ფილების დაგების პარალელურად დაიწყოთ. გაითვალისწინეთ, რომ ნებისმიერი მასალის შემთხვევაში, გაჯი იქნება ეს, ბათქაში, თუ ფითხით დამუშავება, კედლების გაშრობას დრო სჭირდება, ამიტომ ერთდროული სამუშაოები დროის მოგებაში დაგეხმარებათ. ნებისმიერ შემთხვევაში, კარგია, თუ წინა ეტაპებს ადრეულ გაზაფხულზე მოილევთ და სამღებრო საქმეს მზიან ამინდებსა და სითბოს დაამთხვევთ.

ჭერი დღესდღეობით ბაზარზე ჭერისთვის რამდენიმე პოპულარული არჩევანი არსებობს: ბეტონის დატოვება და  დამუშავება, თაბაშირ-მუყაო, იგივე „გიფსოკარდონი“, შეკიდული ჭერი და გასაჭიმი ჭერი. გემოვნებისა და კონკრეტული საჭიროების მიხედვით, ყველა მასალას თავისი მომხმარებელი ჰყავს. თუმცა, გაითვალისწინეთ, რომ მაგალითად, თაბაშირ-მუყაოს მასალა ჭერის სიმაღლეს ადაბლებს, გასაჭიმის — ნაკლებად, ბეტონის კი — პირიქით, სრულად ინარჩუნებს მას. კიდევ ერთი მნიშვნელოვანი მინიშნება: თუ თაბაშირ-მუყაოს ჭერს აირჩევთ, აბაზანაში აუცილებლად ნესტგამძლე მასალა გამოიყენეთ. იატაკი და პლინტუსები როცა იატაკის დაგებასა და პლინტუსების მონატაჟამდე მიხვალთ, შეგიძლიათ, შვებით ამოისუნთქოთ და თქვათ, რომ პრაქტიკულად ფინალში ხართ. ეს სამუშაო შედარებით ნაკლებ დროს ითხოვს და შესასრულებლადაც მარტივია, მით უმეტეს, თუ საფარად ლამინატის მასალას ირჩევთ.

იატაკის დასრულების შემდეგ მხოლოდ პლინტუსების მონტაჟი გრჩებათ, რომელიც შეგიძლიათ, ელექტრობის ბოლო ეტაპის დასრულებასაც დაამთხვიოთ.

როგორც ხედავთ, წინ ბევრი სამუშაო გელოდებათ, მაგრამ ჩვენი იმედი გქონდეთ, რადგან „დომინოში“ სახლს თავიდან ბოლომდე გაარემონტებთ. ჰიპერმარკეტში არა მარტო ყველა სასურველ მასალას შეიძენთ, არამედ ლოიალობის ბარათზე დაგროვილი ქულებითა და  მიტანის სერვისითაც ისარგებლებთ.