აბაზანა სახლში ერთ-ერთი ყველაზე მნიშვნელოვანი სივრცეა. მით უმეტეს, რომ თანამედროვე ადამიანებისთვის მას არა მარტო ფუნქციური, არამედ განწყობის შექმნისა და რელაქსაციის დანიშნულებაც აქვს. სწორედ ამიტომ, აბაზანის გარემონტება განსაკუთრებულ ყურადღებას, დაკვირვებასა და, რა თქმა უნდა, ძალისხმევას მოითხოვს.   

ჩვენი ბლოგპოსტი და რჩევები დაგეხმარებათ, ამ საპასუხისმგებლო პროცესს მომზადებული დახვდეთ და თქვენი საოცნებო აბაზანა მარტივად დაგეგმოთ.

სივრცის გადანაწილება

აბაზანის დაგეგმვა ფართის შესაბამისი სანიტარული კვანძების შერჩევითა და განლაგებით იწყება. ამ პროცესს განსაკუთრებული ყურადღებით მოეკიდეთ, რადგან მათი გონივრული განსაზღვრა არა მარტო გაყვანილობის გამართულობას, არამედ სივრცის ოპტიმალურ გადანაწილებასაც უზრუნველყოფს.

მაგალითად, თუ დიდ ფართში ყველაფერი გაცილებით მარტივია, მცირე ფართის შემთხვევაში, სურვილების რეალიზება შედარებით რთულდება, ამიტომ შესაძლოა, აბაზანის ან საშხაპე კაბინის დამონტაჟებას მხოლოდ საშხაპე სჯობდეს. აი, საშუალო სივრცის შემთხვევაში კი, უმჯობესია, არჩევანი ჩაშენებულ აბაზანაზე შეაჩეროთ და არა — ცალკე მდგომზე. ასეთ დროს იგი ინტერიერის ნაწილად იქცევა და ფართობსაც ნაკლებად ამცირებს.

გაითვალისწინეთ ისიც, რომ თუ კომბინირებული აბაზანა გაქვთ და სივრცის დაზოგვას ცდილობთ, უკეთესია, უპირატესობა შეკიდულ უნიტაზს მიანიჭოთ. ნებისმიერ შემთხვევაში, გახსოვდეთ, რომ ის კარიდან რაც შეიძლება შორს უნდა განთავსდეს და არც სარკეში გამოჩანდეს. უფრო მეტიც: უმჯობესია, განლგაება ისე გადაანაწილოთ, რომ კარის შეღებისას უნიტაზს, აბაზანასა და საშხაპეს პირდაპირ არ ხედავდეთ.

წყლის შხეფებით ავეჯი რომ არ დააზიანოთ, საშხაპე თუ აბაზანა საერთო სივრცისგან შუშის ტიხრით გამოყავით. ზოგადად, დაბურული მინა ფართს ამცირებს, ამიტომ პატარა სივრცეში გამჭვირვალე მასალის გამოყენებას გირჩევთ. არ დაგავიწყდეთ, რომ უსაფრთხოების მიზნით, ტიხარი ნაწრთობი მინისგან უნდა იყოს დამზადებული.

ფართის ოპტიმალურ გადანაწილებაში სარეცხი მანქანის აბაზანიდან გატანაც დაგეხმარებათ. შეეცადეთ, მას ადგილი სამზარეულოში, შემოსასვლელში ან თუნდაც აივანზე, ყინვაგამძლე კარადაში მოუძებნოთ და სივრცე ასე გამოითავისუფლოთ. ამას გარდა, პატარა აბაზანისთვის უპირატესობა იმ ავეჯს მიანიჭეთ, რომელსაც სახელურები არ აქვს. ის უფრო მარტივად გამოსაყენებელიც იქნება და ფართსაც დაგიზოგავთ.

სივრცის მოცულობის მიუხედავად, არ გამოგრჩეთ სათავსოები პირსახოცებისთვის, ჰიგიენური საშუალებებისა თუ კოსმეტიკისთვის, რომლებიც აუცილებლად დაგჭირდებათ. თუ ონკანის დასადგამი კარადა არ გყოფნით, გირჩევთ, კარს უკან არსებული სივრცე, რომელიც ხშირად უფუნქციოდაა ხოლმე დარჩენილი, მაქსიმალურად აითვისოთ და დამატებითი თაროები იქ განალაგოთ.

ნესტგამძლე მასალები 

აბაზანაში ნესტისა და ტემპერატურის ცვალებადობა ყველაზე ხშირია, ამიტომ თითოეული მასალა, რომელსაც რემონტისას გამოიყენებთ, მის სპეციფიკას უნდა ითვალისწინებდეს. 

მაგალითად, თუ ჭერზე თაბაშირ-მუყაოს ფილის გაკვრა მოგინდებათ, უსათუოდ ნესტგამძლე შეიძინეთ. იგივე კრიტერიუმი ეხება საღებავსა და ავეჯსაც, ამიტომ შეძენისა თუ დამზადებისას აუცილებლად დაინტერესდით, არის თუ არა ისინი აბაზანაში გამოყენებისთვის განკუთვნილი.

ფილები

აბაზანის მოწყობის ერთ-ერთი მთავარი ეტაპი ფილის დაგებაა, ამიტომ მისი დიზაინის, ფერების, განლაგებისა თუ ფაქტურის შერჩევისას დიდი ყურადღებაა საჭირო.

ყველა რეკომენდაციით, უპირველესად აქცენტი ხარისხზე უნდა გააკეთოთ და ფინანსები მის ხარჯზე არ დაზოგოთ. წინააღმდეგ შემთხვევაში, შედეგების გამოსწორებისთვის დამატებითი დრო და თანხები აუცილებლად დაგჭირდებათ.

გაითვალისწინეთ, რომ აბაზანის ფილა ტემპერატურის ცვლილებას, ნესტს, საწმენდ საშუალებებს უნდა უძლებდეს და მარტივად არ ზიანდებოდეს, იატაკის ფილას კი უსაფრთხოებისთვის დამატებით მოცურების საწინააღმდეგო საფარიც ჰქონდეს.

რაც შეეხება ფერებს, ზოგადი ტენდენციებით, თეთრი კვლავაც ერთ-ერთ ყველაზე პოპულარულ გადაწყვეტილებად მიიჩნევა. თანაც, ის ვიზუალურად ფართობსაც ზრდის, მეტ სინათლესაც უზრუნველყოფს და არც მოსავლელადაა რთული. მაღალი მოთხოვნით სარგებლობს პასტელის ფერების — ნაცრისფრის, კლასიკური კრემისფრის, ღია ცისფრისა თუ ვარდისფრის ტონები და ხის ფაქტურის ფილები, რომლებიც დამატებით სიმყუდროვეს ქმნის. ბევრისთვის კვლავაც სასურველად რჩება მუქი ფერები, მათ შორის შავიც, თუმცა გაითვალისწინეთ, რომ მუქი ფერის ფილები ვიზუალურად სივრცეს აპატარავებს და მოსავლელადაც რთულია.

ზოგადად, თანამედროვე აბაზანაში გამორჩეული დეტალის არსებობა ერთ-ერთი პოპულარული ტრენდია. ამ ტრენდის მიყოლა კი კედლის კერამიკული დეკორით ან სულაც თამამი ფერის ფუგითა და განსხვავებული წყობის გამოყენებით შეგიძლიათ.

გაითვალისწინეთ, რომ არსებობს მარტივი გადაწყვეტები, რომლებიც დაგეხმარებათ, სივრცე ვიზუალურად უფრო გაზარდოთ. მაგალითად, დიდი ზომის ფილების ნაცვლად, უპირატესობა პატარა ზომის, მართკუთხედ ფორმას მიანიჭოთ და წყობაც შესაბამისი შეარჩიოთ: ვერტიკალური წყობა ფართის სიმაღლეს გაგიზრდით, ჰორიზონტალური კი — სიგანეს.

მასალა წინასწარ აუცილებლად აჩვენეთ ხელოსანსაც და შეათანხმეთ, შესაძლებელი იქნება, თუ არა ამ ფილით სასურველი მოპირკეთების მიღწევა. ცხადია, ფილები ზედმეტობით იყიდეთ და მათ დაგებამდე ჰიდროიზოლაციის გამოყენებაც არ დაგავიწყდეთ.

განათება

აბაზანა, მით უმეტეს უფანჯრო, კარგ განათებას ითხოვს. ბოლო წლების ტენდენციები წერტილოვანი განათების გამოყენების რეკომენდაციას იძლევა. შეგიძლიათ, მეტი სინათლისთვის, სარკესთან სანათი, ბრა ან თავად სარკის განათება დაამატოთ. ეს დეტალი ხშირად ერთდროულად თავის ფუნქციასაც ასრულებს და დიზაინის გამორჩეულ ნაწილადაც იქცევა ხოლმე.

აქსესუარები

აბაზანის აქსესუარები — საკიდები, ჯაგრისის ჩასადები, სასაპნე და ა.შ. საერთო დიზაინის მნიშვნელოვანი ელემენტებია, თუმცა განსაკუთრებული ყურადღების მიქცევას იმ აქსესუარებზე გირჩევდით, რომლებიც ფილაზე მაგრდება. კარგად განსაზღვრეთ თითოეულის სიმაღლე და შეეცადეთ, მაქსიმალურად მოირგოთ ისინი, ზომები და განლაგება კი ხელოსანს დეტალურად აუხსნათ, რადგან ფილების შეცდომით გახვრეტის შემდეგ მათი გამოსწორება გაგიჭირდებათ.

რა თქმა უნდა, ესზოგადი რეკომენდაციებია და ბევრი რამ თქვენი ინდივიდუალური სურვილების მიხედვით უნდა გადაწყვიტოთ. ჩვენი კონსულტანტები სწორედ ამ საჭიროებების გათვალისწინებაში დაგეხმარებიან და დეტალურად გირჩევენ, როგორ დაგეგმოთ თქვენი საოცნებო აბაზანა თავიდან ბოლომდე „დომინოში“.