ტერასა სახლის გამორჩეული და მიმზიდველი სივრცეა — ადგილი, სადაც ყოველთვის შეგიძლიათ განიტვირთოთ, იმხიარულოთ, სტუმრებს უმასპინძლოთ ან თუნდაც სასიამოვნო გარემოში იმუშაოთ. სწორედ ამიტომ, მისი მოწყობა განსაკუთრებულ ყურადღებასა და დაკვირვებას მოითხოვს. შესაბამისად, მნიშვნელოვანია, ის ისეთ სივრცედ აქციოთ, სადაც წელიწადის ნებისმიერი სეზონი სასიამოვნო, მყუდრო, კომფორტული და საუკეთესო ემოციების მომტანი იქნება. სწორედ ამიტომ, ჩვენ ყველა საინტერესო რეკომენდაცია, რჩევა თუ ტრენდი მოვიძიეთ და ამ ბლოგპოსტში გავაერთიანეთ. 

ტერასის ტიპი

უპირველესად უნდა ჩამოყალიბდეთ, როგორი ტერასა გსურთ: დახურული თუ ღია, შემოფარგლული, თუ საზღვრების გარეშე, აივნის ან აუზის გაგრძელება, თუ დამოუკიდებელი სივრცე. ცხადია, დახურული ნებისმიერ ამინდში გაცილებით საიმედოა, თუმცა, სამაგიეროდ, ღია უფრო ნაკლებ დროსა და ფინანსურ რესურსს მოითხოვს. ასე რომ, გადაწყვეტილება თქვენს საჭიროებებსა და შესაძლებლობებზეა დამოკიდებული. თუმცა, აუცილებლად გაითვალისწინეთ ერთი ფაქტორი: თუ კარგი ხედი გაქვთ, გირჩევთ, მის შესანარჩუნებლად მინის კედლები გამოიყენოთ და ერთგვარი ზამთრის ბაღი მოიწყოთ. გახსოვდეთ, რომ ასეთი კონსტრუქციის შემთხვევაში, საჭიროა, ტერასაზე კარგად განიავების შესაძლებლობაც დატოვოთ.
ბუნებრივია, უნდა გაითვალისწინოთ თავად ფართის მოცულობაც, რადგან თუ სივრცე მცირეა, მისი მაქსიმალურად ოპტიმალური გადანაწილება მოგიწევთ, ხოლო თუ პირიქით, მაშინ შეგიძლიათ, არა მარტო კომფორტული ავეჯისა და ლამაზი დეკორაციების განთავსებაზე, არამედ გარე სამზარეულოს მოწყობაზეც კი იფიქროთ, მით უმეტეს, რომ ეს ერთ-ერთი ბოლოდროინდელი და გავრცელებული ტრენდია. 

გამოსაყენებელი მასალების შერჩევა

უპირველესად აქცენტი მასალების გამძლეობაზე გააკეთეთ: ისინი საიმედო უნდა იყოს წვიმაშიც, ზამთრის ყინვასა თუ ზაფხულის თაკარა მზეშიც, ამიტომ მთავარი კრიტერიუმიც სწორედ მათი მდგრადობა უნდა იყოს. 
ტერასის მოსაწყობად აუცილებლად დაგჭირდებათ პანელები, რომლებიც ზოგადად სახლის ფასადის მოსაპირკეთებლადაც გამოიყენება. ისინი არ საჭიროებს განსაკუთრებულ მოვლას, კარგად უძლებს ნესტს, ხელს უწყობს ჰაერის ცირკულაციას და მარტივად მონტაჟდება. თანაც, მდგრადი, ეკოლოგიური და ენერგოეფექტურია. 
ბოლო დროს განსაკუთრებით ტრენდულია ტერასის დაფებიც — ორმხრივი, გამძლე და მდგრადი მასალა, რომელიც ინოვაციური ტექნოლოგიით, ბუნებრივ ინგრედიენტებზე მზადდება. დაფები მდგრადია ამინდის ცვალებადობის მიმართ, მარტივად იწმინდება და განსაკუთრებული მოვლა ან სეზონური შეღებვა არ სჭირდება. 

ავეჯი და დიზაინი

ავეჯი ტერასის აუცილებელი ატრიბუტია. დღესდღეობით მწარმოებლები ამ მხრივ საკმაოდ მრავალფეროვანი მასალის, სტილის, დიზაინის, ფუნქციონალისა და ფასის არჩევანს გვთავაზობენ. მთავარია, გაითვალისწინოთ, რომ ისინიც გამძლე და, ამავდროულად, მარტივად მოსავლელი იყოს. რასაკვირველია, ავეჯი თქვენი ფართის ზომას უნდა შეესაბამებოდეს: პატარა ტერასას ძალიან ნუ გადატვირთავთ, თუმცა თუ სუფთა ჰაერზე მუშაობასაც გეგმავთ, აუცილებლად გამოყავით კუთხე მაღალი, მაგრამ თხელი მაგიდისთვის, სადაც თქვენი ლეპტოპით კომფორტულად მოკალათდებით. 
ყურადღება მიაქციეთ გარემოსაც: თუ ირგვლივ მშენებლობა ან სარემონტო სამუშაოები მიმდინარეობს, დროებით რბილი ავეჯის შეძენისგან თავი შეიკავეთ. ის მარტივად ისვრება და შედარებით მეტ მოვლასაც მოითხოვს, ამიტომ უკეთესია, თუ დროებით მაინც მოწნულ, მეტალის ან სულაც პლასტმასის ავეჯზე შეაჩერებთ არჩევანს. არ დაივიწყოთ სტუმრებიც: თუ თქვენს ტერასაზე თავყრილობები არც ისე იშვიათი იქნება, მაშინ დასაკეცი სკამები აუცილებლად დაგჭირდებათ: ისინი მოსახერხებელიცაა, პრაქტიკულიც და მარტივად შესანახიც. 
ტერასის სივრცეს ნამდვილად დაამშვენებს ტრენდული ბუდე სარწეველები, საქანელები, გასაშლელი სავარძლები, პუფები და შეზლონგის ფუნქციის სკამები.

განათება, დეკორი და ტექსტილი

განათება ტერასის მოწყობის უმნიშვნელოვანესი ნაწილია. გემოვნებით შერჩეული ბრები და სხვადასხვა ტიპი სანათები სივრცეს კიდევ უფრო გაალამაზებს, დიზაინში დამატებით დახვეწილ შტრიხებს, ფუნქციონალსა და სიმყუდროვესაც შემოიტანს. თანაც, თქვენს განწყობაზეც შესანიშნავად აისახება. მთავარია, გახსოვდეთ, რომ განათება აუცილებლად გარე გამოყენებისთვის იყოს განკუთვნილი.
ტერასას ორიგინალური დეკორი, ლარნაკები და სხვა აქსესუარები განსაკუთრებით ალამაზებს. მისი მოწყობისას არც ფუმფულა ბალიშები და პლედები დაივიწყოთ. ისინი თქვენს დასასვენებელ სივრცეს კომფორტსა და სასიამოვნო განწყობას შემატებენ. 

გამწვანება

მცენარეებთან ერთად, ტერასა ყოველთვის უფრო ჯანსაღი და ლამაზია. მით უმეტეს, თუ საერთო დიზაინს ეფექტურად შეუხამებთ მოხდენილ ქოთნებსაც, რომლებიც დღეს მართლაც დიდი მრავალფეროვნებითაა წარმოდგენილი და დეკორის ფუნქციასაც ითავსებს.
ზოგადად, ტერასის გამწვანების ქოთნებისა და მცენარეების საკმაოდ დიდი არჩევანი გაქვთ, თუმცა სასარგებლო რეკომენდაციებისთვის ჩვენი ბლოგპოსტების გადათვალიერებასაც გირჩევთ. მათი დახმარებით, ტერასის მწერებისგან  დაცვასაც ისწავლით, მცენარეებისგან ცოცხალი ღობეების შექმნასაც და სხვა საინტერესო ტრენდებსაც შეიტყობთ. 

და ბოლოს, რადგან ტერასის მოწყობა მრავალფეროვანი მასალისა და ნივთის შერჩევას მოითხოვს, გირჩევთ „დომინოს“ ფილიალებში, ზაფხულის ფესტივალზე გვეწვიოთ და თქვენთვის საინტერესო პროდუქცია განსაკუთრებული ფასდაკლებით შეიძინოთ. ცხადია, ჩვენ კონსულტანტები და მებაღეები შერჩევის პროცესში ამჯერადაც სასარგებლო რეკომენდაციებით დაგეხმარებიან და დეტალურად დაგაკვალიანებენ.