რემონტის დასრულების შემდეგ ადამიანებისგან ხშირად მოისმენთ, რომ მათ ცხოვრების ერთ-ერთი რთული ეტაპი გადალახეს. რეალურად ამ პროცესს უსიამოვნებები მართლაც ხშირად ახლავს, ამიტომაცაა ის სტრესული და დამღლელი, მაგრამ, ამავდროულად, ძალიან სასიამოვნო საბოლოო შედეგისა და შეგრძნებების მომტანი.

რეკომენდაციები, რომლებზეც ამ ბლოგპოსტში გიამბობთ, თავიდან ბოლომდე პრაქტიკულ რჩევებზეა ორიენტირებული, ამიტომ მათი გაცნობის შემდეგ რემონტს შედარებით მომზადებულები დაიწყებთ და მისგან გამოწვეულ სტრესსაც შეამცირებთ.

არქიტექტორ-დიზაინერის მომსახურება ყოველთვის კარგი გადაწყვეტილებაა

ხანდახან ადამიანები არქიტექტორ-დიზაინერის მომსახურებისგან თავს იკავებენ და ამბობენ, რომ სახლის მოწყობას დამოუკიდებლადაც შეძლებენ. გაითვალისწინეთ, რომ არქიტექტორ-დიზაინერი სივრცეს ოპტიმალურად ანაწილებს, მას თქვენი ცხოვრების სტილს არგებს, რაც განსაკუთრებით პატარა ფართის შემთხვევაშია მნიშვნელოვანი. ამას გარდა, ის ელექტრო გაყვანილობისა და სხვა ისეთ მნიშვნელოვან ნახაზებსაც გიმზადებთ, რომლებიც რემონტის პროცესში თქვენთვის გზამკვლევი ხდება, სასარგებლო რეკომენდაციებს გაძლევთ და სწორი გადაწყვეტილებების მიღებაშიც გეხმარებათ.

თუმცა, თუ მაინც დიზაინისა და განლაგების მომზადება დამოუკიდებლად გსურთ, ბევრ სასარგებლო ინფორმაციას ინტერნეტსივრცეშიც ნახავთ. პოპულარული სოციალური ქსელი Pinterest და სხვა მოსახერხებელი მობილური აპლიკაციები არაერთი გამოუცდელი ადამიანის მეგზურად იქცა. ამ რესურსებით შეგიძლიათ, კონკრეტულად თქვენს ოთახს მოარგოთ განლაგება, დიზაინი, ფერი და ა.შ. საინტერესო რჩევებისა და აპლიკაციებსთვის შეგიძლიათ, ეს ვიდეოც ნახოთ. 

სამუშაოების ზედამხედველი - კიდევ ერთი მხარდამჭერი

რა თქმა უნდა, ყველა ზედამხედველი იდეალური არ არის. პირიქით: ზოგჯერ ისეც ხდება, რომ რემონტის პროცესი სწორედ ზედამხედველის გამო ჭიანურდება, ან ხარჯები იზრდება ან შესრულებული სამუშაოების ხარისხი იკლებს. თუმცა, ფაქტია, რომ საქართველოში ხელოსნებს ყოველდღიურად თუ არ გააკონტროლებთ, რემონტი შეიძლება, უსასრულოდ გაგიგრძელდეთ.

ამიტომ, თუ საკმარისი დრო არ გაქვთ, მაშინ კარგი ზედამხედველის შერჩევა ის კიდევ ერთი გადაწყვეტილება იქნება, რომელიც რემონტის პროცესს ძალიან შეგიმსუბუქებთ, მით უმეტეს მაშინ, როცა ის ამ სამუშოებს საკუთარი, კარგად გამოცდილი გუნდის დახმარებით შეასრულებს. 

მასალების შერჩევა ერთი სივრცეში უკეთესია

თუ არქიტექტორ-დიზაინერის მომსახურებით ისარგებლებთ, სარემონტო მასალების შესახებ რეკომენდაციებს მისგან წინასწარ მიიღებთ და ეს შერჩევის პროცესსაც გაგიმარტივებთ. თუმცა, შემდეგ ამ მასალების მოძიებაც საპასუხისმგებლო, ზოგჯერ კი დამღლელი პროცესია. ამ შემთხვევაში საუკეთესო გამოსავალი ყველაფრის ერთ სივრცეში შეძენაა. ამგვარად არა მარტო დროსა და ენერგიას ზოგავთ, არამედ ფინანსებსაც, რადგან მსხვილ შენაძენებზე მომხმარებლებისთვის ხშირად ლოიალობის პროგრამები ვრცელდება. მაგალითად, „დომინო“ გთავაზობთ ლოიალობის ბარათს, რომელზეც ქულებს აგროვებთ და შემდეგ მათ პროდუქციის შეძენისას იყენებთ.

არსებობს მოვლენები, რომლებიც რემონტის დროს გარდაუვალი ან ძალიან ხშირია. მაგალითად:
რომელიმე ხელოსანი დათქმულ ვადას აუცილებლად გადააცილებს, „ავად გახდება“, ან სხვა „ობიექტური მიზეზი“ შეაფერხებს. მთავარია, ეს ყველაფერი ძალიან დიდხანს არ გაგრძელდეს.

შესაძლოა, თავი მოტყუებულად იგრძნოთ. თუ გარკვეული გამოცდილება უკვე გაქვთ, ცხადია, მოტყუების შანსი მცირდება, თუმცა როცა რემონტს პირველად აკეთებთ, რთულია, ყველაფერი ძალიან კარგად იცოდეთ.

ყველაზე მარტივი სამუშაოს ან მასალის შერჩევისასაც უამრავ, ხშირად ურთიერთგამომრიცხავ აზრს მოისმენთ. თანაც, ყველა მხარეს საკუთარი, მყარი არგუმენტები ექნება. ასეთ დროს არქიტექტორ-დიზაინერს დაუჯერეთ.

რომელიმე ხელოსანი აუცილებლად გეტყვით, რომ გამორიცხულია, რაღაც არ გამოვა და სხვაგვარად გაკეთებას „გირჩევთ“. ხშირად ამ „რჩევის“ მიღმა უბრალოდ შედარებით რთული სამუშაო დგას, მას კი სურს, ფონს მარტივად, ზედმეტი ძალისხმევის გარეშე გავიდეს. თუ თქვენ არგუმენტებისთვის საჭირო კომპეტენცია არ გაქვთ და ეს სრულიად ბუნებრივია, გირჩევთ, ხელოსანი არქიტექტორ-დიზაინერს გაასაუბროთ.

აუცილებლად გამოჩნდება მეზობელი, ნათესავი, ან თუნდაც ხელოსანი, რომელიც შესრულებულ სამუშაოს ან თქვენ მიერ შერჩეულ მასალას, ფერსა თუ დიზაინს დაიწუნებს და იტყვის, რომ  „სხვანაირად ჯობდა“. გახსოვდეთ, რომ ხშირად ამ ნათქვამის უკან არა რეალობა, არამედ უბრალოდ კონკურენცია ან ადამიანური ფაქტორი დგას.

რემონტის დასრულების შემდეგაც ნახავთ მასალებს, მაგალითად, კაფელს ან შპალერს, რომელიც უფრო მოგეწონებათ და ინანებთ, რომ ის არ იყიდეთ. ასეთ დროს გაიხსენეთ, რომ საუკეთესო ისაა, რომელიც უკვე გამოიყენეთ და რომელზე მუშაობაც უკვე დასრულდა.

ყველაფერს წინასწარ ვერ დააზღვევთ: შესაძლოა, ზოგიერთი სამუშაოს ხელახლა შესრულება და დაგეგმილზე მეტი დროისა და ფინანსების დახარჯვა მოგიწიოთ, მაგრამ ეს თქვენი ბრალი არ არის, რეალობაა ასეთი.

ასე რომ, რემონტისას ზოგჯერ გადაიღლებით, ზოგჯერ ნერვებიც გიმტყუნებთ, მაგრამ მთავარია, არ დაივიწყოთ: ამ მდინარეში რადგან ხართ, აუცილებლად დასველდებით. თუმცა, სამაგიეროდ, წყლიდან ისეთი მდიდარი გამოცდილებით გამოხვალთ, რომელსაც სხვაგან ვერსად მიიღებთ.