პირველი შთაბეჭდილება სახლის შესახებ ფასადით იქმნება, ამიტომ მისი მოპირკეთება ის ერთ-ერთი მნიშვნელოვანი თემაა, რომელსაც  მშენებლობის თუ რემონტის დროს განსაკუთრებული ყურადღება ექცევა. ისიც აღსანიშნავია, რომ მწარმოებლები  მასალების, ფერების, დიზაინერული გადაწყვეტილებების, ფუნქციონალისა თუ ფასის მიხედვით მართლაც დიდ მრავალფეროვნებას გვთავაზობენ, თუმცა ამგვარი ფართო არჩევანი ზოგჯერ გადაწყვეტილების მიღებასაც ართულებს. 

სწორედ ამიტომ, ამჯერად მთავარ თემად ფასადის მოპირკეთება შევარჩიეთ. გაეცანით ახალ ბლოგპოსტს — საინტერესო ტრენდებს, სასარგებლო რეკომენდაციებსა და რჩევებს, რომლებიც აუცილებლად გამოგადგებათ. 

პანელები
რა თქმა უნდა, ფასადის მასალა დასაწყისშივე, თქვენი სურვილისა და ფუნქციონალის მიხედვით უნდა შეარჩიოთ, რადგან, როგორც წესი, სახლის გარე ვიზუალი მთლიანად მასზეა დამოკიდებული. 

ფასადის მოსაპირკეთებლად კარგი გადაწყვეტილებაა სპეციალური პანელები, რომლებიც   ბოლო პერიოდში აქტიურად გამოიყენება და ძალიან პოპულარულიცაა. ამ მასალას სპეციალისტები მომხმარებლებს რამდენიმე ფაქტორის გამო ურჩევენ ხოლმე: პანელები ნესტგამძლე, მდგრადი, ენერგოეფექტური, ეკოლოგიური და მარტივად მოსავლელია. თანაც, ისინი რთულ სამონტაჟო სამუშაოებსაც არ საჭიროებს.

კრამიტი
სახურავი ფასადის მნიშვნელოვანი ნაწილია და მისი კრამიტით მოპირკეთება ერთ-ერთი გავრცელებული გადაწყვეტილებაა. თუ თქვენც მის გამოყენებას დააპირებთ, სასურველ ფერის შერჩევა ნამდვილად არ გაგიჭირდებათ. თუმცა, არც მახასიათებლები დაივიწყოთ: აუცილებელია, კრამიტი არაკოროზიული იყოს, გარემო პირობებსა თუ ტემპერატურის ცვალებადობას კარგად უძლებდეს და, რა თქმა უნდა, მარტივად მონტაჟდებოდეს. 

სხვათა შორის, კრამიტით მოპირკეთებას განსაკუთრებით უხდება მანსარდული ფანჯრები, რომლებიც ახლა ძალიან პოპულარულია. კონსტრუქცია სრულიად უსაფრთხო და საერთაშორისო სტანდარტებთან თავსებადია. ამასთან, ის ოთახებსაც კარგად ანათებს და ვენტილაციასაც კარგად უზრუნველყოფს. 

დეკორატიული ბათქაში და ფითხი
დეკორატიული ბათქაშით მოპირკეთება  საკმაოდ შრომატევადი პროცესია, თუმცა ის საშუალებას გაძლევთ, ფერი თუ სამუშაოების სტილი ისე შეარჩიოთ, რომ საბოლოოდ ფასადის ინდივიდუალური და მართლაც გამორჩეული დიზაინი შექმნათ, მიიღოთ ბუნებრივი ქვის ეფექტი ა.შ. მასალა მდგრადია, კარგად უძლებს ამინდის ცვალებადობასა თუ სველ წმენდას და, თანაც, სპეციალურ მარცვლოვან შემავსებელსაც შეიცავს, რომლის დახმარებითაც მცირე ზედაპირული ხარვეზების დაფარვა მარტივადაა შესაძლებელი. 

რა თქმა უნდა, არ უნდა გამოგვრჩეს სპეციალური ფუნქციონალის, მაგალითად, ჰიდროსაიზოლაციო ბათქაშიც, რომელიც ფასადს წრიულ ან ხაზოვან ეფექტს ანიჭებს, აქვს კარგი გამძლეობა და ხანგრძლივი პერიოდის განმავლობაში ინარჩუნებს მდგრადობას როგორც გარემო პირობების, ისე წყლისა და ყინვის მიმართ. 

ფასადის მოპირკეთებისა და ბუნებრივი ქვის ეფექტის შესაქმნელად გამოიყენება დეკორატიული ფითხიც, რომელიც საკმაოდ მოსახერხებელი, პრაქტიკული, ეკონომიური და ეკოლოგიურად სუფთაა. თანაც, არც იდეალურად სწორ კედელს საჭიროებს და მცირე დეფექტებსაც საუკეთესოდ მალავს. 

ცხადია, ბათქაშით ან ფითხით მოპირკეთების შემთხვევაში, შეგიძლიათ, სასურველი ფერის დეკორატიული საფასადო საღებავებიც გამოიყენოთ და ფასადს სასურველი იერი შესძინოთ. გაითვალისწინეთ, რომ თანამედროვე მწარმოებლების მიერ შემოთავაზებული საღებავები საკმაოდ მდგრადია და კედელს სხვადასხვა ზემოქმედებისგანაც კარგად იცავს.

აგური და ქვა
ფასადის მოსაპირკეთებლად ერთ-ერთი საუკეთესო, ლამაზი, ტრადიციული, გამძლე, ეკოლოგიურად სუფთა და ყოველთვის პოპულარული მასალა, რა თქმა უნდა, აგურია. გაითვალისწინეთ, რომ მოპირკეთებისთვის განსხვავებული აგურია საჭირო და თუ მის გამოყენებას გადაწყვეტთ, ჰიდროიზოლაციის გაკეთებაც სპეციფიკურად მოგიწევთ. ამას გარდა, ეს მასალა შედარებით ძვირადღირებულია და თავად სამუშაოების შესრულებაც ხელოსნების მაღალკვალიფიციურობას მოითხოვს. აგურის მსგავსად, ფასადის მოსაპირკეთებლად მაღალბიუჯეტური, მაგრამ ძალიან გამძლე მასალა ბუნებრივი ან ხელოვნური ქვაა. თუმცა, შეგიძლიათ, ის მხოლოდ დიზაინის ელემენტებად გამოიყენოთ და ხარჯების დასაზოგად, ფასადი ქვით ნაწილობრივ გააფორმოთ. 

ფასადის კერამიკული ფილები
კერამიკული ფილები, რომლებიც მოსაპირკეთებლად გამოიყენება, დახვეწილი დიზაინით, მრავალფეროვნებითა და გამძლეობით ხასიათდება. თანაც, შედარებით ბიუჯეტურია და, ამავდროულად, დასამონტაჟებლადაც მარტივი, თუმცა, გახსოვდეთ, რომ მათი გამოყენება მხოლოდ ვენტილირებადი ფასადების შემთხვევაშია შესაძლებელი. 
ჰიპერმარკეტ „დომინოში“ ფასადების მოსაპირკეთებელი მასალების მრავალფეროვანი არჩევანი გვაქვს. მნიშვნელობა არ აქვს — უკვე იცით, რისი შეძენა გსურთ, თუ გადაწყვეტილებაზე ჯერ კიდევ ფიქრობთ, აუცილებლად გვეწვიეთ. შერჩევის პროცესს ჩვენი კონსულტანტები კომპეტენტური რეკომენდაციებით გაგიმარტივებენ.