რემონტის დროს გაუთვალისწინებელ სირთულეებს ხშირად გადააწყდებით, მით უმეტეს მაშინ, როცა ამ სამუშაოებთან შეხება პირველად გაქვთ. თუმცა, ამავდროულად, ყოველთვის შეგიძლიათ, იხელმძღვანელოთ სხვა ადამიანების გამოცდილებით, უფრო კონკრეტულად კი მათ მიერ დაშვებული შეცდომებით, რომელთა ცოდნაც დაგეხმარებათ, თითოეულ ეტაპს უკეთ მომზადებული შეხვდეთ.

ჩვენი ბლოგპოსტი სწორედ იმ ყველაზე გავრცელებულ შეცდომებზე მოგიყვებათ, რომლებიც თქვენ აღარ უნდა დაუშვათ და გასწავლით კიდეც, როგორ აიცილოთ ისინი თავიდან.

სანიტარული კვანძების არასწორად დაგეგმვა  - სანიტარული კვანძების ოპტიმალური გადანაწილება უმნიშვნელოვანესი პროცესია. გაყვანილობისა და დახრების არასწორმა დაგეგმვამ შეიძლება, სახლის იატაკის დონე ზედმეტად გაგიზარდოთ, ამიტომ სანიტარული კვანძების დაგეგმვისას ეს ფაქტორი აუცილებლად გაითვალისწინეთ და დაინტერესდით,  შერჩეული განლაგება იატაკს ძალიან ხომ არ აგიმაღლებთ.

თუ კვანძების მდებარეობას ცვლით, მაგალითად, სამზარეულო აბაზანის ადგილას გადაგაქვთ, აუცილებლად შეამოწმეთ, რამდენად გაძლევთ ამ შესაძლებლობას ცენტრალური გაყვანილობის დიამეტრები, რადგან უნიტაზის სადგამს სხვა დიამეტრი აქვს, ხელსაბანისას კი — სხვა და ა.შ.

ინდივიდუალური ჩამკეტები სველი წერტილებისთვის — ზოგჯერ რემონტისას სველი წერტილებისთვის ინდივიდუალურ ჩამკეტებს არ ითვალისწინებენ, რაც სამომავლოდ გარკვეულ დისკომფორტს ქმნის. ამ ფაქტორის გათვალისწინება იმიტომაა მნიშვნელოვანი, რომ თუ, მაგალითად, ონკანი სამზარეულოში გაგიფუჭდებათ, ინდივიდუალური ჩამკეტით წყალი კონკრეტულად იმ წერტილისთვის გადაკეტოთ და საპირფარეშოთი თუ სააბაზანოთი სარგებლობა შეუფერხებლად შეძლოთ.

გაყვანილობის მდებარეობის არცოდნა - არცთუ ისე იშვიათია შემთხვევები, როდესაც ადამიანებმა არ იციან, კონკრეტულად სად გადის მათ სახლში წყლისა თუ ბუნებრივი აირის მილები, რაც შემდგომში იატაკის სამუშაოების სწორად წარმართვას ართულებს, უარეს შემთხვევაში კი მილების დაზიანებასაც იწვევს. კარგი იქნება, თუ მოხვეწამდე გაყვანილობას ფოტოს გადაუღებთ და შემდეგ ხელოსანს წინასწარ აჩვენებთ. 

ბუნებრივი აირის გაყვანილობის არშემოწმება - წარმოიდგინეთ, რომ იატაკის დაგებას მორჩით, გაზქურაც დაამონტაჟეთ და აღმოაჩინეთ, რომ ბუნებრივი აირი საიდანღაც ჟონავს. სამწუხაროდ, სარემონტო სამუშაოებისას ხელოსნები ზოგჯერ მილებს  შემთხვევით აზიანებენ, დაშვებულ შეცდომას კი მალავენ. თავი რომ დაიზღვიოთ და მშვიდად იყოთ, სჯობს, ბუნებრივი აირის გაყვანილობა იატაკის დაგებამდე საფუძვლიანად შეამოწმოთ.

კარების არასწორი მიმართულებები - ხანდახან ადამიანებმა არ იციან, რომ რემონტის პროცესში კარის გაღების მიმართულებაც გასათვალისწინებელი ფაქტორია. ყველა კარის, განსაკუთრებით კი ძირითადის მიმართულებები წინასწარ დაგეგმეთ. შეძენისასაც ამ მახასიათებლით ყოველთვის დაინტერესდით, რათა შემდეგ ნივთის დაბრუნებასა თუ შეცვლაში დამატებითი რესურსის დახარჯვა არ დაგჭირდეთ. საერთოდ, როგორც წესი, უფრო პოპულარული შიდა გაღებაა ხოლმე, თუმცა ზოგჯერ შემოსასვლელის სივიწროვის გამო, სივრცის ეკონომიისთვის, ძირითად კარს გარე გაღებითაც ირჩევენ.

განათების წერტილების, ჩამრთველებისა და როზეტების არასწორად დაგეგმვა - ეს ერთ-ერთი ყველაზე გავრცელებული შეცდომაა, რომელსაც ხშირად ადამიანები მხოლოდ რემონტის დასრულების შემდეგ აღმოაჩენენ ხოლმე. არასწორი დაგეგმვის გამო, ზოგიერთი როზეტი შესაძლოა, სრულიად მოუხერხებელ ადგილას აღმოჩნდეს, ამიტომ ყველა წერტილს  ყურადღება თავიდანვე მიაქციეთ, განსაკუთრებით კი სამზარეულოში, სადაც ყველა მოწყობილობას საკუთარი, ინდივიდუალური როზეტი უნდა ჰქონდეს. ელექტრობის დაგეგმვისას წინასწარ დაფიქრდით განათების წერტილებზეც და არ გამოგრჩეთ კარადების განათება, რომელიც, სავარაუდოდ, აუცილებლად დაგჭირდებათ, რემონტის დასრულების შემდეგ კი მათი დამატება ძალიან გაგიჭირდებათ.

ავეჯისა და ტექნიკის განლაგების გვიან დაგეგმვა - ზოგჯერ ადამიანები ფიქრობენ, რომ ავეჯის ან ტექნიკის განლაგებას რემონტის შემდეგ დაგეგმავენ, რაც, სამწუხაროდ, არასწორია. თუნდაც ელექტროგაყვანილობის ოპტიმალურად შესრულებისთვის ავეჯისა და ტექნიკის მონახაზი აუცილებლად გჭირდებათ. გაითვალისწინეთ ისიც, რომ ავეჯის საბოლოო ზომები  კედლების დასრულების შემდეგ აიღოთ და სამზარეულოში, უსაფრთხოებიდან გამომდინარე, მაცივარი და გაზქურა ერთმანეთს დააშოროთ.

სამომავლო სურვილებზე უარის თქმა - ხანდახან კონკრეტულ მომენტში კონდიცირება ან ჭურჭლის სარეცხი მანქანა აუცილებლობას მართლაც არ წარმოადგენს, თუმცა, შესაძლოა, მოგვიანებით მათი გამოყენება ძალიან დაგჭირდეთ, მაგრამ ოპტიმალური სივრცე აღარ გქონდეთ. ყოველთვის სჯობს, ტექნიკის განლაგების დაგეგმვისას სავარაუდო მოწყობილობებიც გაითვალისწინოთ, მათთვის წინასწარ დენის წყაროც გამოყოთ და - სივრცეც.

არაპრაქტიკული ფილები და საფარის ზომები - შესაძლოა, ფილა ხარისხითაც მოგწონდეთ და ფერითაც, მის პრაქტიკულობაზე კი აღარ დაფიქრდეთ და მოგვიანებით აღმოაჩინოთ, რომ იატაკი ძალიან სრიალებს. პროდუქციის შერჩევისას ეს ფაქტორიც გაითვალისწინეთ, ხოლო აივანზე დასაგებად  აუცილებლად ყინვაგამძლე ფილები შეიძინეთ. ზოგადად, იატაკის ყველა მასალა წინასწარ შეარჩიეთ, რათა, მაგალითად, მოხვეწის ხელოსანმა, მათი ზუსტი ზომების მიხედვით, თანაბარი დონის დაცვა შეძლოს.

ხელოსანი თავადაც მიხვდება - არა, ხელოსანი შესაძლოა, არ მიხვდეს ან უფრო მეტიც: მიხვდეს, მაგრამ სამუშაო არ გაირთულოს. მაგალითად, თუ არ დაუკონკრეტებთ, რომ სააბაზანოს კედლების კიდეებში ფილების 45-გრადუსიანი დამუშავება გსურთ, ისე გაგიკრავთ, თითქოს კუთხოვანის გამოყენებას აპირებთ. შესაბამისად, ხელოსნებთან ყველაფერი კარგად დააკონკრეტეთ და დეტალურად შეათანხმეთ.

ფულის წინასწარი გადახდა - არსებული რეალობიდან გამომდინარე, ეს ერთ-ერთი ყველაზე მტკივნეული შეცდომაა. არ გადაუხადოთ ხელოსანს თანხა წინასწარ, რადგან მოტყუების ალბათობა მაღალია. უმჯობესია, თანხა შესრულებული სამუშაოს შესაბამისად აუნაზღაუროთ. უფრო მეტიც: უკეთესი იქნება, თუ ფულს გადაურიცხავთ და თავს ამითაც დაიზღვევთ.

პრაქტიკულობაზე უარის თქმა - ყველაზე კარგი სახლი პრაქტიკული სახლია, ამიტომ ყოველთვის მხედველობაში იქონიეთ თქვენი და იმ ადამიანების თავისებურებები, რომლებიც ამ სახლში იცხოვრებენ. მაგალითად, თუ ცაცია ხართ, როზეტების დაგეგმვისას, აბაზანის აქსესუარების განლაგებისას და ა.შ. ეს ფაქტორი აუცილებლად გაითვალისწინეთ.

ზუსტი ბიუჯეტის განსაზღვრა - სამწუხაროდ, რემონტს დამატებითი ხარჯი ყოველთვის ახლავს, ამიტომ წინასწარ დათვლილი საერთო ღირებულების 10-15% გაუთვალისწინებელი შემთხვევებისთვის გამოყავით. გახსოვდეთ, რომ რემონტის დროს დაშვებული შეცდომების დიდი ნაწილი სწორედ ამ თანხით სწორდება. და რა თქმა უნდა, აუცილებლად შეინახეთ ქვითრებიც, რომლებიც შესაძლოა, პროდუქციის დაბრუნების ან გადაცვლის დროს დაგჭირდეთ.

რადგან ამ ჩამონათვალს გაეცანით, უკვე ღირებულ ცოდნას ფლობთ, თუმცა რემონტს თუ აპირებთ, „დომინოს“ კონსულტანტებიც მაქსიმალურად დაგეხმარებიან, პროდუქციის შერჩევისას ყველა დეტალს გაითვალისწინებენ და შეეცდებიან, სახლი თავიდან ბოლომდე ისე გაარემონტოთ, რომ შეცდომა არ დაუშვათ.