ჰობი, რომელიც თან ანტისტრესულია და თან — პრაგმატული

ჯერ მოგიყვებით, თუ როგორ და რატომ იქცა ქალაქური ბოსტანი პოპულარულ ტრენდად. დავიწყოთ იმით, რომ მცენარეებთან ურთიერთობა განტვირთვისა და ყოველდღიურ სტრესთან გამკლავების ერთ-ერთი საუკეთესო გზაა. კვლევები ადასტურებს და თავად ადამიანებიც, რომლებიც „მწვანე მეგობრებს“ უვლიან, ხშირად ამბობენ, რომ ეს პროცესი ერთგვარი თერაპიაცაა, ამიტომ გვირჩევენ, ბოსტნის გაშენებაზე აუცილებლად დავფიქრდეთ.

მეორე მიზეზი ლამაზი, ჯანსაღი და ეკოლოგიური გარემოა. ბევრი ჩვენგანი აივანზე დიდ დროს ატარებს, განსაკუთრებით მზიან ამინდებში, როცა ფინჯანი ყავის მირთმევას, მეგობრებთან საუბარს ან თუნდაც მუშაობას სწორედ ამ სივრცეში ამჯობინებს. რა თქმა უნდა, ასეთ სასიამოვნო ატმოსფეროს ქალაქურ ბოსტანში ჩარგული მწვანე მცენარეები კიდევ უფრო აჯანსაღებენ, ჟანგბადით ამდიდრებენ და თან სილამაზესა და სასიამოვნო არომატსაც სძენენ.

და ბოლოს, არც პრაგმატული მიზეზი უნდა გამოგვრჩეს: ქალაქური ბოსტანი საშუალებას გვაძლევს, საკუთარი ხელით მოყვანილი მოსავალი წელიწადის ნებისმიერ დროს გვქონდეს, გემრიელ კერძებს ეკოლოგიურად სუფთა, ქორფა ბოსტნეულითა თუ მწვანილით ვამზადებდეთ და მერე სტუმრებსაც განსაკუთრებული სიამაყით ვუმასპინძლდებოდეთ.

რა შეგვიძლია მოვიყვანოთ ქალაქურ ბოსტანში

რასაკვირველია, ქალაქურ ბოსტანში უპირველესად მწვანილებისა და სანელებლების დათესვას ანიჭებენ ხოლმე უპირატესობას. ქინძი, კამა, ოხრახუში, რეჰანი, ბაზილიკი, ქონდარი, როზმარინი, ზაფრანი, წიწმატი, ორეგანო, პიტნა, კვლიავი, პრასი, ხახვი და ნიორი ახალბედა მებოსტნეებისთვის მარტივი და მოსახერხებელი სტარტია.  ისინი კარგად ხარობენ ნებისმიერ ადგილას და კარგი მოსავლიანობაც აქვთ. სხვათა შორის, როზმარინი, პიტნა და რეჰანი მწერებსაც აფრთხობს და მათი დათესვა ამ მხრივაც სასარგებლოა.

თუმცა, ეს ყველაფერი არ არის: ქალაქურ ბოსტანში სალათის ფურცლები, ისპანახი  ბულგარული წიწაკა, სტაფილო, ჭარხალი, კიტრი და ჩერი პამიდორიც ხარობს. ასე რომ, არჩევანი დიდია.

როგორ გავაშენოთ ბოსტანი

პირველ რიგში, უნდა გადაწყვიტოთ, რისი დათესვა გსურთ, რომ მერე ინვენტარიც შესაბამისი მოიმარაგოთ. ბოსტნეულისა და მწვანილის დასათესად ყუთები ან ქოთნები დაგჭირდებათ. გაითვალისწინეთ, რომ ყუთების სიმაღლე მინიმუმ 12 სმ უნდა იყოს. რაც შეეხება ქოთნებს, მათი ზომა დამოკიდებულია იმაზე, თუ რამდენ მოსავალს ელით, თუმცა ბოსტნეულის შემთხვევაში, გამოცდილი მებაღეები მაინც უფრო მაღალ და ფართო ქოთნებს გვირჩევენ.

ცხადია, დაგჭირდებათ მიწაც. ალბათ, ბევრისთვის ცნობილია, რომ შავი მიწა გაცილებით ნაყოფიერია, ამიტომ უმჯობესია, არჩევანი სწორედ მასზე შეაჩეროთ. ამასთან, აუცილებელია, ის ნატურალური იყოს და არც ქიმიური სასუქი ჰქონდეს. ქოთანში მიწის გადატანამდე საჭიროა, ძირზე ჯერ კენჭები მოათავსოთ. ისინი მორწყვის შემდეგ წყლის ცირკულაციასა და უკეთ შეწოვას უწყობს ხელს.

მომდევნო ეტაპი უკვე დათესვაა. სასურველ თესლებს, ბოლქვებსა თუ ჩითილებს ასევე მარტივად შეიძენთ. დასაწყისისთვის მცირე რაოდენობით სცადეთ და რომ გაიწაფებით, რაოდენობაში მერე გაზარდეთ.

უშუალოდ ბოსტნის მოვლისთვის ინსტრუმენტებიც დაგჭირდებათ: გამაფხვიერებელი, ნიჩაბი, ხელთათმანი, სარწყავი, დამჭერები და სხვა. სხვათა შორის, ბევრი მათგანი ნაკრების სახითაც იყიდება, რაც უფრო მოსახერხებელიცაა და — ეკონომიურიც.

რამდენიმე რჩევა ბოსტნის მოსავლელად

სასუქი ქალაქური ბოსტნისთვისაც საჭიროა. ამ შემთხვევაში მებაღეები უპირატესობას ბიოსასუქს ანიჭებენ. ის დაგეხმარებათ, არა მარტო უხვი, არამედ ჯანსაღი მოსავალიც გქონდეთ. სხვათა შორის, დღეს ბაზარზე ამ მხრივ საკმაოდ დიდი არჩევანია, ამიტომ სასურველი ბიოსასუქის მოძიება სირთულეს არ წარმოადგენს.

დათესილი ბოსტნეული ან მწვანილი გაფხვიერებას საჭიროებს. პერიოდულად მიწა პატარა ნიჩბით უნდა გააფხვიეროთ, რათა ჰაერი მცენარის ფესვებამდე ჩავიდეს და კარგად გაიხაროს.

არ უნდა გამოგრჩეთ მორწყვაც, თუმცა არც ზომიერება დაგავიწყდეთ. ამ შემთხვევაშიც ოქროს წესი წესი მიწის ხელით მოსინჯვაა. ნამიანი ზედაპირი ნიშნავს, რომ წყალი მცენარეს საკმარისად აქვს, მაგრამ თუ ის მშრალია, მაშინ მორწყვა აუცილებლად ესაჭიროება.

განათავსეთ ქოთნები ან ყუთები შესაფერის ადგილას. გაითვალისწინეთ, რომ მწვანილისთვის ჩრდილი და საღამოს მზე სჯობს, იმ ბოსტნეულს კი, რომელიც ბოლქვს იკეთებს, მათ შორის ხახვსა და ნიორს, პირიქით, მზე უყვარს. შესაბამისად, თითოეული მათგანისთვის შესაფერისი სივრცე წინასწარ უნდა განსაზღვროთ.

და ბოლოს: არ მოაკლოთ ყურადღება თქვენს ბოსტანს და მოუსმინეთ მცენარეებს: ისინი ყოველთვის განიშნებენ, რა სჭირდებათ. თქვენთან ერთად, მოვლაში ჩართეთ ბავშვებიც, ეს პატარებისთვის სასიამოვნო, სახალისო და სასარგებლო პროცესი იქნება.

7-13 აპრილს დომინოში ბაღის კვირეული გვაქვს. გვესტუმრეთ ფილიალებში, ჰკითხეთ რჩევები ჩვენს კონსულტანტებსაც, შეიძინეთ თესლები, ბოლქვები თუ საჭირო ინვენტარი 40%-მდე ფასდაკლებით და გააშენეთ ქალაქური ბოსტანი აივანზე.