მონოქრომული ტონები 

ინტერიერის ერთ ტონში გადაწყვეტა საკმაოდ გავრცელებული მიდგომაა და წელსაც პოპულარულად რჩება. თუ თქვენც ასეთი სადა დიზაინი მოგწონთ, შეგიძლიათ, სახლისთვის თეთრი, რძისფერი, ბეჟი, ნაცრისფერი ან რომელიმე მათგანის გრადაცია შეარჩიოთ. თუმცა, გაითვალისწინეთ, რომ დიზაინერები ფიქრობენ, ამგვარი ინტერიერი მაინც ერთფეროვანი გამოდის, ამიტომ გვირჩევენ, ის ტექსტილით, ავეჯით ან აქსესუარების განსხვავებული ფერებითა და ფაქტურებით გადავახალისოთ. მაგალითად, სადა კედლები შეგიძლიათ, ბეტონის ან აგურის მასალით, ხის ფაქტურის დეკორით, პანოებით, მეტალის ან ლითონის აქსესუარებით გააფორმოთ.

ფერები, რომლებიც ყოველთვის მოდურია

დიახ, არსებობს ტონები, რომლებიც ყოველთვის აქტუალურად რჩება და ძალიან პოპულარულიცაა. მაგალითად, თეთრი, ბეჟი, რძისფერი, ნაცრისფერი, პასტელური ვარდისფერი და მათი გრადაციები მოდიდან თითქმის არასდროს გადადის.

პოპულარობა უპირველესად ამ ფერების პრაქტიკულობიდან გამომდინარეობს. ადამიანები რემონტს ყოველ მეორე ან მესამე წელს არ აკეთებენ. პირიქით: ცდილობენ, წინასწარ ყველაფერი ისე გაითვალისწინონ, რომ ძირეულად დიდხანს არაფერი შეცვალონ. თუ თქვენთვისაც ეს ფაქტორი მნიშვნელოვანია, შეგიძლიათ, უპირატესობა სწორედ ნეიტრალურ ფერებს მიანიჭოთ და კაშკაშა დეტალებთან შეხამებით მართლაც საუკეთესო, გამორჩეული შედეგი მიიღოთ. 

რა უნდა გვახსოვდეს

ფერების შერჩევის პირველი კრიტერიუმი მაინც ბინის ფართობია: მუქი ტონების გამოყენება პატარა სივრცეს ვიზუალურად კიდევ უფრო შეამცირებს, ამიტომ უმჯობესია, უპირატესობა ნათელ ფერებს მიანიჭოთ.

სხვადასხვა ფუნქციის სივრცეებში განსხვავებული ფერების გამოყენება ყოველთვის შეგიძლიათ. მთავარია, ისინი ერთმანეთთან ჰარმონიულად იყოს შეხამებული. მთავარია, ოთახების მიხედვით არ იცვლებოდეს ინტერიერის საერთო სტილი, ტონების შერჩევისას კი მეტად თავისუფალი ხართ.

სასურველი პალიტრის შერჩევისას იხელმძღვანელეთ სტანდარტით 60/40-ზე. ამ შეფარდებაში 60% ძირითადი, უმეტესად ნეიტრალური ფერია, 40% კი — დამხმარე, უფრო მკაფიო აქცენტები.

დაამონტაჟეთ შესაბამისი განათება, რადგან საკმარისი სინათლის გარეშე ფერმა შესაძლოა მთელი დიდებულება დაკარგოს. მნიშვნელოვანია, მისი სიმძლავრე რეგულირდებოდეს და სხვადასხვა ფუნქციონალს — დასვენებას, სამუშაო პროცესს და ა.შ. ერგებოდეს.

მყუდრო და კომფორტული, დახვეწილი და თანამედროვე ინტერიერის შესაქმნელად, იქნება ეს თამამი პრინტები, მყვირალა თუ სადა ტონები, ზომიერება და ბალანსია მნიშვნელოვანი.

და ბოლოს: ერთ-ერთი მნიშვნელოვანი ტრენდი ჯანსაღი გარემოა, ამიტომ ფერებთან ერთად, აუცილებელია, მასალები ეკოლოგიურად სუფთაც იყოს. შესაბამისად, შეძენისას ეს ფაქტორიც გაითვალისწინეთ.